Илъэс къэс зэхащэщт
Кощхьэблэ районым иадминистрацие ипащэ ишIухьафтынхэр къыдэхыгъэнхэмкIэ районым изэIухыгъэ зэнэкъокъу дзюдомкIэ Кощхьаблэ щыкIуагъ. 
Краснодар, Лабинскэ, Ермэлхьаблэ, Адыгэ Республикэм икъалэхэм, районхэм ябэнакIохэр Кощхьаблэ дэт спорт Унэшхом щызэнэкъокъугъэх. Урысыем и Къэралыгъо Думэ идепутатэу, дунаим самбэмкIэ гъогогъу 11 дышъэр къыщыдэзыхыгъэ Хьасанэкъо Мурат, Кощхьэблэ районым иадминистрацие ипащэу Хьамырзэ Заур зэхахьэм къыщыгущыIагъэх, дзюдомкIэ бэнакIохэм, физкультурэм пыщагъэхэу къоджэ спортым изыкъегъэIэтын хэлажьэхэрэм гущыIэгъу афэхъугъэх. Спорт Унэшхо зэтегъэпсыхьагъэм зэнэкъокъур гъэшIэгъонэу щызэхащагъ. Яонтэгъугъэхэм ялъытыгъэу апэрэ чIыпIэхэр къыдэзыхыгъэхэм шъуащытэгъэгъуазэ.
Дэхъу Азэмат, кг 60, Георгий Ломидзе, кг 66-рэ, Къуижъ Бислъан, кг 73-рэ, Ордэн Заур, кг 81-рэ, Тулпэрэ Айдэмыр, кг 90-рэ, Арсен Михайлян, кг 90-м къехъу.
Дэхъужь Хъызыр, Езыгу Азэмат, Андрей Сабининыр, Апэзэо Бислъан, Нэгые Бислъан, Аулъэ Айдэмыркъан, Джарымэкъо Даут, Бат Аскэр, Гъыщ Къэплъан, Джумбер Липаридзе, Ингъуш Владимир, Датхъужъ Алый, ШъэоцIыкIу Рустам хагъэунэфыкIыхэрэ чIыпIэхэр къахьыгъэх.
Дзюдом, самбэм, нэмыкI спорт лъэпкъхэм ныбжьыкIэхэр афэгъэсэгъэнхэмкIэ амалхэу щыIэхэм атегущыIагъэх Кощхьэблэ районым иадминистрацие ипащэу Хьамырзэ Заур, дунэе спортым щыцIэрыIоу Хьасанэкъо Мурат, Адыгэ Республикэм дзюдомкIэ испорт еджапIэу Кобл Якъубэ ыцIэ зыхьырэм ипащэу, спортымкIэ дунэе класс зиIэ мастерэу КIуае Хьазрэт, Адыгэ Республикэм дзюдомкIэ ихэшыпыкIыгъэ командэ итренер шъхьаIэу Бастэ Сэлым, нэмыкIхэри.
Кощхьаблэ щапIугъэхэ бэнакIохэу Дэхъу Азэматрэ Тулпэрэ Айдэмыррэ, атлетикэ онтэгъумкIэ Урысыем иныбжьыкIэхэм язэнэкъокъу апэрэ чIыпIэр къыщызыхьыгъэ Дзэсэжъ Аслъан районым ипащэхэм къыхагъэщыгъэх, шIухьафтынхэр афашIыгъэх. Илъэс къэс ащ фэдэ зэIукIэгъухэр, дзюдомкIэ зэнэкъокъур Кощхьаблэ щызэхащэ ашIоигъоу пащэхэм къаIуагъ.
Сурэтым итхэр: зэнэкъокъум хэлэжьагъэхэр.
ЕМТIЫЛЪ Нурбый.