Къэралыгъо ыкIи муниципальнэ щыкIагъэхэм апае товарэу, IофшIэнэу ыкIи фэIо-фашIэу къащэфыхэрэм (госзакупки) алъэныкъокIэ зэзэгъыныгъэ шIыкIэу щыIэм фэгъэхьыгъэ федеральнэ хэбзэгъэуцугъэм зэхъокIыныгъэу фашIыщтхэр ары АР-м и Къэралыгъо Совет – Хасэм зимычэзыу я XXXVI-рэ зэхэсыгъоу тыгъуасэ иIагъэр зыфэгъэхьыгъагъэр. Зэхэсы­гъор зэрищагъ Парламентым и Тхьаматэу Владимир Нарожнэм.

Мы хэбзэгъэуцугъэм зэхъо­кIыныгъэхэр фэшIыгъэнхэм УФ-м и Президентэу Владимир Путиныр кIэщакIо фэхъугъ. Ащ къыщыдэлъытагъэхэр нахь къы­зэ­рыкIо ыкIи гъэцэкIэгъошIу шIыгъэнхэу, ар зэрэгъэпсыгъэщтым Iоф дашIэнэу унашъо 2018-рэ илъэсым итыгъэгъэзэ мазэ къышIыгъагъ.

Владимир Нарожнэм зэхэсыгъор къызэIуихызэ, УФ-м и Президент лъэныкъо пэпчъ зэшIохыгъэн фаехэмкIэ субъект­хэм якъэралыгъо хэбзэ органхэм пшъэрылъ гъэнэфагъэхэр къызэрафишIыгъэхэр, законихъу­хьанымкIи парламентариехэм Iоф зыдашIэщтхэми кIэщакIо зэрафэхъугъэр къыхигъэщыгъ.

— Ащ тынаIэ тырытегъадзэ АР-м и ЛIышъхьэу КъумпIыл Мурати, — къыIуагъ Парламентым и Тхьаматэ. — Ащ фэшI лъэпкъ проектхэр пхырыщы­гъэнхэм ыкIи УФ-м и Президент ижъоныгъокIэ унашъохэр гъэцэкIэгъэнхэм афытегъэпсыхьэгъэ зэхъокIыныгъэхэр законхэм афэшIыгъэнхэм тэри Iоф дэтэшIэ. Урысыем зэхъокIыныгъэу рихъухьэхэрэм адиштэу хэбзэгъэуцугъэхэр гъэкIэжьыгъэнхэр пшъэрылъ шъхьаIэу тиIэхэм ащыщ.

Къэралыгъо закупкэхэм афэгъэхьыгъэ хэбзэгъэуцугъэхэм Адыгеим и Парламент идепутатхэр нахьыпэкIи мызэу-мытIоу зэратегущыIагъэхэри, ахэр кIэщакIо фэхъугъэхэу Урысыем и Къыблэ шъолъыр и Парламентхэм я Ассоциацие иконференцие къызэрэхалъхьэгъагъэри Владимир Нарожнэм къыIуагъ.

УФ-м и Президент иунашъо гъэцэкIэгъэным фэшI культурэм ылъэныкъокIэ къэралыгъо закупкэу ашIыхэрэм афэгъэхьыгъэ зэхъокIыныгъэу федеральнэ хэбзэгъэуцугъэм фашIыщтхэм афэгъэхьыгъэ законопроектыр УФ-м и Правительствэ къыгъэ­хьазыри, Къэралыгъо Думэм мэлылъфэгъум и 4-м зэхэсы­гъоу иIагъэм апэрэ еджэгъумкIэ щаштагъ. ЯтIонэрэ еджэгъумкIэ хэплъэнхэм ыпэкIэ, законопроектым субъектхэм язаконихъу­хьэ органхэр тегущыIэнхэу афагъэхьыгъ. Ары АР-м и Къэ­ра­лыгъо Совет — Хасэм зимычэзыу зэхэсыгъо иIэным лъапсэ фэхъугъэр.

Мы законопроектыр ары апэу депутатхэр зытегущыIагъэхэр. Социальнэ политикэмкIэ, унагъом иIофхэмкIэ, псауныгъэм икъэухъумэнкIэ ыкIи культурэмкIэ Парламентым и Комитет ипащэу Евгений Саловым ащ къыщыдэлъытагъэхэм ащигъэгъозагъэх. Депутатхэм зыпари амыгъэ­тэрэзыжьэу ыкIи хамыгъахъоу УФ-м и Къэралыгъо Думэ и Комитетэу ащ фэгъэзагъэм фагъэхьынэу зэдаштагъ.

Джащ фэдэу лъэпкъ проектхэм ыкIи къэралыгъо программэхэм къахиубытэу псэолъэшIын Iофэу зэшIуа­хыхэрэм алъэныкъокIэ къэралыгъо закупкэу ашIыхэрэм афэгъэхьыгъэ зэхъокIыныгъэхэр федеральнэ хэбзэгъэуцугъэм фэшIыгъэнхэм фэгъэхьыгъэ законопроектыри УФ-м и Правительствэ ыгъэ­хьазырыгъ. Ащ къыщыдэ­лъы­тагъэ­хэм АР-м и Парламент идепутатхэр щигъэгъозагъэх ащ и Тхьаматэ игуадзэу, бюджет-финанс, хэбзэIахь ыкIи экономикэ политикэмкIэ, предпринимательствэмкIэ ыкIи Iэ­кIыб экономическэ зэпхыныгъэ­хэмкIэ Комитетым ипащэу Iэщэ Мухьамэд.

Нэужым депутатхэр законопроектым зэдытегущыIэхи, ды­рагъэштагъ. Охътэ благъэм УФ-м и Къэралыгъо Думэ апэрэ еджэгъумкIэ ащ хэплъэщт.

ХЪУТ Нэфсэт.