Гур агъэшIу
АдыгабзэкIэ къыдэкIырэ художественнэ-литературнэ журналэу «Зэкъошныгъэм» мы илъэсымкIэ иапэрэ номер къыдэкIыгъ.
Адыгэ, Къэбэртэе-Бэлъкъар, Къэрэщэе-Щэрджэс республикэхэм ялъэпкъ тхакIоу, СССР-м, Урысыем, Адыгэ Республикэм я Къэралыгъо премиехэм литературэмкIэ ялауреатэу МэщбэшIэ Исхьакъ итарихъ романэу «Аджал Iуашъхь» зыфиIорэр мыщ джыри щылъыкIотагъ. Къэбэртаем илъэс 300-м ехъукIэ узэкIэIэбэжьмэ щыкIогъэ Къэнджал заор пкъы фэхъугъ мы произведением, адыгэхэм ящыIэкIэ-псэукIэ хабзэу хэлъыгъэхэр, мытхыгъэ хабзэу адыгагъэр ыкIи нэмыкI шIыкIэ-зэхэтыкIэхэр, унэ къеIэрэм, ыпсэ уеIэжьын фаеу зэрэхъурэр тарихъ куур иIэубытыпIэу тхакIом гъэшIэгъонэу къыщырегъэлъэгъукIых.
ПрозэмкIэ гъэзагъэу джыри зы гукъэкIыжь повесть мыщ дэт «Джыри сипкIыхь ухэт, Къэзэныкъуай» ыIоу. Ар лъэпкъ тхакIоу Пэнэшъу Сэфэр зыер, тхылъеджэхэр ашIуабэ шIэу ежэх.
УагъэгушIо ыкIи уагъэгугъэ журналистэу Сихъу СултIан иусэхэми; ахэр зигъо кIэхьагъэх, адыгабзэр зыщышъуашIох.
«Лъэпкъым хьалэлэу уфэлэжьагъ, Адыгэр дунаим зэлъебгъэшIагъ. Дахэу тфэпIуагъэр непи ташъхьагъ, Тыгъэу къыщепсы, тфэхъу ушъхьагъу. Лъэпкъым ынапэ тетымыхынкIэ, Тиадыгабзэ шъхьащэ фэтшIынкIэ, Непи упсэоу тэ укъытхэт, Лъэпкъ тхыдэIуатэу КIэрэщэ Тембот».
Лъэпкъ поэзиер непэрэ мафэм зэрэхэуцорэм ищысэ дэгъу Хьакъунэ Заремэ ирассказ кIэкIхэр, ахэр ахэбдзын ахэмылъэу шъабэх, гоIух, гучIэ макъэх.
Журналым къыдэхьагъэх тхакIоу ГутIэ Саныет ирассказэу «Насыпым узыхигъадэрэп», Уайкъокъо Рэмэзанэ ибаснэхэр. Литературэмрэ критикэмрэкIэ гъэзагъэу тхагъэх Шъхьэлэхъо Дарико, ГъукIэлI Нурбый.
Тиюбилярхэм афэгъэхьыгъэ гущыIэхэр къашIыгъэх Агъыржьанэкъо Симхъанрэ (Жэнэ Къырымызэ илъэси 100 зэрэхъугъэмкIэ) Мамый Руслъанрэ (ЩэшIэ Казбек къызыхъугъэр илъэс 80 зэрэхъугъэмкIэ).
Журналым къыдэхьагъэх Хъот Замрэт итхыгъэу Хьанэхъу Адамэ фэгъэхьыгъэр, лъэужышIу къэзыгъэнэгъэ журналистэу, хэку гъэзетым илъэсыбэрэ иредакторыгъэ Андырхъое Джантэмыр ехьылIагъэу ЛIэхъусэжъ Хьаджэрэтбый ытхыгъагъэр, Дзыбэ Кимэ итхыгъэу «Тыхэмрэ къохэмрэ» зыфиIохэрэр.
Журналым чIыпIэ щагъотыгъ шIэныгъэлэжьхэу Джэнчэтэ Иринэрэ Ситымэ Сарэрэ жабзэм ыкIи адыгабзэм иIофыгъохэмкIэ къаIуагъэхэм ыкIи Мыекъуапэ ихъишъэ щыщ нэкIубгъохэу журналистэу Мамырыкъо Нуриет къыгъэхьазырыгъэхэм.
Дзэукъожь Нуриет.