ШыкIэпщынэр гъашIэм щэжъынчы
Адыгэ шыкIэпщынэм, ащ итарихъ, игъэфедэн афэгъэхьыгъэ тхылъэу ГъукIэ Замудин 2017-рэ илъэсым Мыекъуапэ къыщыдигъэкIыгъэм ехьылIэгъэ къэгъэлъэгъон Адыгэ Республикэм и Лъэпкъ музей мэлылъфэгъум и 4-м къыщызэIуахыгъ. Музеим ипащэу Джыгунэ Фатимэ адыгэхэм ямузыкальнэ искусствэ шыкIэпщынэр икIэрыкIэу къызэрэхэуцожьыгъэм къытегущыIагъ. Адыгэ Республикэм культурэмкIэ иминистрэу Аулъэ Юрэ къэгъэлъэгъоныр къызэрэзэIуахырэм мэхьэнэ ин ритыгъ, шыкIэпщынэм итарихъ, адыгэмэ музыкальнэ Iэмэ-псымэр щыIэныгъэм зэрэщагъэфедэрэм еплъыкIэ шъхьаф фэпшIын фаеу ылъытагъ. ИскусствэхэмкIэ республикэм икIэлэцIыкIу еджапIэхэм адыгэ музыкальнэ Iэмэ-псымэхэм ащыфагъэсэнхэм фэшI амалэу щыIэр агъэфедэщтэу министрэм къыIуагъ.
ИскусствоведениемкIэ докторэу, профессорэу, Урысыем икомпозиторхэм я Союз хэтэу Алла Соколовам изэфэхьысыжьхэм къащыхигъэщыгъ ГъукIэ Замудин ишIушIагъэкIэ шыкIэпщынэр тимузыкальнэ искусствэ нахьышIоу щагъэфедэу зэраублагъэр.
Республикэ общественнэ движениеу «Адыгэ Хасэм» итхьаматэу ЛIымыщэкъо Рэмэзан лъэпкъ кадрэхэр музыкальнэ искусствэм фэгъэсэгъэнхэмкIэ амалышIухэр Адыгеим зэриIэхэм, адыгэ музыкальнэ Iэмэ-псымэхэр зыхэт оркестрэ республикэм щызэхащэн зэралъэкIыщтым, ГъукIэ Замудин ригъэжьэгъэ Iофыр лъыгъэкIотэгъэн зэрэфаем иеплъыкIэхэр къариIолIагъэх.
КъокIыпIэм щыпсэурэ лъэпкъхэм яискусствэхэмкIэ Къэралыгъо музееу Мыекъуапэ дэтым ипащэу Кушъу Нэфсэт анахьэу ынаIэ зытыридзагъэр Iофым кIэщакIо фэхъурэм угоуцон, IэпыIэгъу уфэхъун зэрэфаер ары.
Бзэхэр зыщызэрагъэшIэрэ Гупчэу «Активым» ипэщэ шъхьаIэу Едыдж Мэмэт Тыркуем къыщыхъугъ. Къуаджэу зыщыпсэущтыгъэм шыкIэпщынэмкIэ орэдышъохэр къырагъаIохэу зыкIи щызэхихыгъэп. Мэмэт музеим щыкIорэ зэхахьэм къызэрэщиIуагъэу, шыкIэпщынэр ыцIэкIи, имэхьанэкIи адыгэмэ яй. ШыкIэпщынэмкIэ гум иорэд къебгъэIон олъэкIы. ГъукIэ Замудин гушхоныгъэ зыхэлъ цIыф. Iофэу зыфежьагъэм дунэе мэхьанэ иI, ныбжьыкIэу непэ шыкIэпщынэм фагъасэрэм лъэпкъ гупшысэу иIэр неущ щыIэныгъэм щыпхырищыщт.
Къэгъэлъэгъоныр
КIыкI Аслъанбэч, Джарымэкъо Тыркубый, Мэрэтыкъо Аслъан, нэмыкI шыкIэпщынаохэм ясурэтхэр, шыкIэпщынэхэу тятэжъ пIашъэхэм агъэфедэщтыгъэхэр, пхъэм хэшIыкIыгъэ музыкальнэ Iэмэ-псымэхэр, фэшъхьаф тарихъ къэбархэм яхьылIэгъэ пкъыгъохэр, тхыгъэхэр музеим щытлъэгъугъэх.
СтIашъу Юрэ, Мамый Руслъан, Сулейманова Фатимэ, ХъокIо Ларисэ, Чэтэо Ибрахьимэ, Сихьаджэкъо Иринэ, нэмыкIхэм ягупшысэхэр тшIогъэшIэгъоныгъэх. Чэмышъо Гъазый республикэм культурэмкIэ иминистрэу щытыгъ, нэмыкI хэбзэ IэнатIэхэм аIутыгъ. Ащ къызэрэтиIуагъэу, шыкIэпщынэм уасэу иIэр къэIогъуай. ГъукIэ Замудин къыщежьэгъэ Iофыр ишIушIагъ. Пэсэрэ шыкIэпщынаохэм яхьылIэгъэ Iотэжьхэр, сурэтхэр къыугъоигъэх. Замудин шыкIэпщынэр пчэгум къызырехьажьым, бгъэфедэн плъэкIырэ искусствэм пылъыгъ. ПIуаблэхэр, лъэпкъ пкъыгъохэр ышIыщтыгъэх. ЦIыфмэ ашIошъ ыгъэхъугъ шыкIэпщынэмкIэ Iофыбэ зэшIопхын зэрэплъэкIыщтыр.
— ИскусствэхэмкIэ республикэ кIэлэцIыкIу еджапIэм шыкIэпщынэм щыфэдгъэсэнхэу тызыфежьэм, ны-тыхэм ащыщхэр ащ фэягъэхэп, шIуагъэ хэмылъэу алъытэщтыгъ. Джы «Мэшэлахь!» тэIо. Къутамэу къызэIутхыгъэм зеушъомбгъу, кIэлэцIыкIу ансамблэхэр зэхащагъэх, — къытиIуагъ Чэмышъо Гъазый.
Зэхахьэр рамыгъажьэзэ, музеим ичIэхьапIэ шыкIэпщынэм фагъэсэгъэ еджакIохэм адыгэ мэкъамэхэр щагъэжъынчыгъэх. ГъукIэ Замудин зэхэщакIохэм, тхылъым икъыдэгъэкIын пылъыгъэхэм «тхьашъуегъэпсэу» къариIожьыгъ.
Къэгъэлъэгъоныр гъэшIэгъонэу зэрагъэфагъ, узыIэпещэ.
Сурэтхэр зэхахьэм къыщытетхыгъэх.
ЕМТIЫЛЪ Нурбый.