Краснодар къыщагъэлъэгъощтых
Адыгэ кином и Мафэхэр мэлылъфэгъум и 9 — 14-м Краснодар щыкIощтых. Кинотеатрэу «Кубанькином» Нэгъаплъэ Аскэрбый ифильмхэр къыщагъэлъэгъощтых.
Тилъэпкъ итарихъ фэгъэхьыгъэ фильмэу «Черкесием», адыгэ хабзэм ехьылIагъэм, тилъэпкъэгъухэу IэкIыб къэралхэм ащыпсэухэрэм, Хэкужъым къэзыгъэзэжьыгъэхэм, адыгэ бзылъфыгъэм, адыгэ шэу «Щагъдыим», апэрэ адыгэ художественнэ фильмэу «Гугъэм имэзахэм», Адыгеим ирежиссер ныбжьыкIэхэм агъэхьазырыгъэ фильмэу «Автобусым», нэмыкIхэм искусствэр зышIогъэшIэгъонхэр яплъыщтых.
Краснодар краим, Адыгэ Республикэм культурэмкIэ яминистерствэхэм, Урысыем икинематографистхэм я Союз икъутамэу Адыгеим щыIэм, Адыгэ Республикэм илIыкIоу Краснодар краим и Губернатор дэжь щыIэм Iофтхьабзэр зэхащэ.
Мэлылъфэгъум и 9-м къызэIуахыщт. А мафэм ыпкIэ амытэу къэгъэлъэгъоным еплъыщтых, фэшъхьаф мафэхэм чIэхьапкIэм ыуасэр соми 120-рэ.
Краснодар краимрэ Адыгэ Республикэмрэ язэфыщытыкIэхэр гъэпытэгъэнхэмкIэ Урысыем икинематографистхэм я Союз икъутамэу Адыгеим щыIэм ипащэу, режиссерэу Нэгъаплъэ Аскэрбый кIэщакIохэм ащыщ.
Ащ зэрилъытэрэмкIэ, фыльмхэм яплъыхэрэм тилъэпкъ тарихъ гъогоу къыкIугъэм нахьышIоу зыщагъэгъозэн алъэкIыщт.