Зэнэкъокъум зыфагъэхьазыры
Театрэм и Илъэс фэгъэхьыгъэ зэхахьэу республикэм и Лъэпкъ музей щыкIуагъэм Адыгеим культурэмкIэ иIофышIэхэр хэлэжьагъэх. Республикэм и Къэралыгъо Iофтхьабзэу «Культурэм хэхъоныгъэ ышIыным пай» зыфиIоу 2014 — 2021-рэ илъэсхэм ателъытагъэм къыпкъырыкIыхэзэ, зэхахьэр Мыекъуапэ щызэхащагъ. Анахьэу зытегущыIагъэхэр театрэм пыщагъэхэм япащэхэм сценарием Iоф зэрэдашIэрэр ары.
— Шъолъыр егъэджэн зэIукIэгъур зэхэтщэным фэшI апэу къыдэтлъытагъэр районхэм, къалэхэм ятеатрэхэм якупхэм япащэхэр уахътэм диштэу зэрэдгъэгъозэщтхэр ары, — къытиIуагъ Адыгэ Республикэм лъэпкъ культурэмкIэ и Гупчэ театрэм иIофыгъохэм щафэгъэзагъэу Анжела Исаевам. — Театрэм хэшIыкI фызиIэхэр къедгъэблэгъагъэх.
Зэхахьэм къыщыгущыIагъэх, театрэм иIофышIэхэм аIукIагъэх Адыгэ Республикэм лъэпкъ культурэмкIэ и Гупчэ ипащэу Бадый Къэплъан, республикэм искусствэхэмкIэ иколледжэу У. Тхьабысымэм ыцIэ зыхьырэм икIэлэегъаджэхэу Сихъу Анастасие, Ацумыжъ Сарыет, Унэрэкъо Гунэс, Адыгэ Республикэм и Лъэпкъ театрэу И. Цэим ыцIэ зыхьырэм ирежиссерэу, Къалмыкъым изаслуженнэ артистэу, Адыгеим искусствэхэмкIэ изаслуженнэ IофышIэшхоу Хьакъуй Аслъан, республикэм Лъэпкъ культурэмкIэ и Гупчэ иIофышIэу КIэмэщ Светланэ, нэмыкIхэри.
Республикэм и Лъэпкъ театрэу И. Цэим ыцIэ зыхьырэм ирежиссерэу Хьакъуй Аслъан спектаклэм образхэр къыщыхэгъэщыгъэнхэм, рольхэр къэзышIыщтхэр къызэрэхэпхыщтхэм IупкIэу къатегущыIагъ.
— Театрэм и Илъэс мыщ фэдэ зэIукIэ зэрэзэхащагъэр лъэшэу сигуапэ хъугъэ, — къытиIуагъ А. Хьакъуим. — Районхэм, къуаджэхэм культурэмкIэ яунэхэм Iоф ащызышIэхэрэм таIукIагъ, упчIэжьэгъу тызэфэхъугъ.
— КIэлэцIыкIу театрэхэм яфестиваль-зэнэкъокъу мэлылъфэгъум и 20-м Мыекъуапэ щызэхэтщэщт. Ащ зыфэдгъэхьазырызэ республикэм культурэмкIэ иIофышIэхэр зэIудгъэкIагъэх, — къытиIуагъ А. Исаевам.
ЕМТIЫЛЪ Нурбый.