Режиссер цIэрыIоу КIуращынэ Аскэр къызыхъугъэр илъэс 80 хъугъэ
Дунаир нахьышIу ышIынэу фэягъ
РСФСР-м искусствэхэмкIэ изаслуженнэ IофышIэшхоу, Урысыем щызэлъашIэрэ режиссерэу КIуращынэ Аскэр 1962-рэ илъэсым ГИТИС-м иактерскэ факультет къыухыгъ. Ащ ыуж режиссер сэнэхьатыр театрэм, музыкэм ыкIи кином я Къэралыгъо институтэу Ленинград дэтым щызэригъэгъотыгъ.
Ар къызеухым, Адыгэ хэку театрэм къегъэзэжьышъ, режиссерэу Iоф щешIэ. ЕтIанэ 1979 – 1981-рэ илъэсхэм режиссер-стажерэу Сатирэм итеатрэу Москва дэтым щэлажьэ. А лъэхъаным театрэм щагъэуцухэрэ спектаклэхэм СССР-м инароднэ артистэу Вячеслав Плучек игъусэу Iоф адешIэ.
1981 – 1990-рэ илъэсхэм Армавир дэт драматическэ театрэм КIуращынэр пащэ фашIы. Театрэр анахь ныбжь зиIэу Урысыем итхэм ащыщыгъ, ау иIофхэри къызэтеуцуагъэхэу щытыгъ. Ащ режиссер IэпэIасэм зыкъыригъэIэтыжьын ылъэкIыгъ.
ЦIыфхэр щыIэх узаIукIэкIэ пщымыгъупшэжьхэу, илъэсыбэ тешIагъэми, шIукIэ гум къинэжьхэу. Ахэм ащыщ КIуращынэ Аскэр. Ар зэрэрежиссер IэпэIасэм, зэрэкIэлэегъэджэ дэгъум анэмыкIэу цIыф зафэу, гукIэгъу хэлъэу, зищыкIагъэм IэпыIэгъу фэхъунэу хьазыр зэпытэу щытыгъ. Аскэр Кощхьаблэ къыщыхъугъ, икIэлэгъур зэо илъэсхэм атефагъ. Ятэ заом зыхэкIуадэм ежь илъэситIу ыныбжьыгъ, ышнахьыкIэу Казбек ащ нахьыкIэжьыгъ.
Театрэм епхыгъэ сэнэхьатым егупшысэу, кIэхъопсэу щытыгъэп. 1957-рэ илъэсым ГИТИС-м и Адыгэ студие чIэхьанэу кIорэ ишъэогъум игъусэу дэкIуагъ, кIэлэ лъэпэ-лъагэу, кIэлэ дахэу зынэшхохэм чэфынчъагъэ зыкIэлъхэм Ахэджэго Мэджыдэ ынаIэ къытыридзагъ, уплъэкIунхэр ыкIунхэу къытыригъэнагъ. А лъэхъаным Ахэджэго Лилии институтым чIэхьанэу зигъэхьазырыщтыгъ. Баснэхэр, усэхэр, прозэр зэдызэрагъашIэщтыгъ. Ащ тетэу Аскэр театрэм игъогу техьагъ.
Институтыр дэгъу дэдэу къыухи Мыекъуапэ къыгъэзэжьыгъ, зэрэактер IэпэIасэм нэмыкIэу режиссурэми хэшIыкIышхо фыриIэу къычIэкIыгъ.
Илъэс заулэрэ Мыекъуапэ Iоф зыщешIэ ужым КIуращынэр театрэм, музыкэм ыкIи кинематографием якъэралыгъо институтэу Ленинград дэтым ирежиссер факультет чIэхьагъ, къызеух нэуж илъэси 10-рэ Армавир дэт драматическэ театрэм Iоф щишIагъ. Театрэм зыкъыригъэIэтыжьыгъ, ащ Iоф щишIэзэ гу къылъати, Сатирэм итеатрэу Москва дэтым рагъэблэгъагъ. 1979 – 1981-рэ илъэсхэм, ыпшъэкIэ къызэрэщысIуагъэу, Вячеслав Плучек игъусэу театрэм Iоф щешIэ. А уахътэр еджэпIэ дэгъу режиссер ныбжьыкIэмкIэ хъугъагъэ. ЕтIанэ Пшызэ шъолъыр къызегъэзэжьым, культурэм ыкIи искусствэм яуниверситетэу Краснодар дэтым щылэжьагъ. Ригъэджагъэхэм ащыщхэм культурэм чIыпIэ гъэнэфагъэхэр щаубытыгъэх, непэ режиссерэу Москва итеатрэхэм Iоф ащызышIэхэрэри ахэтых.
КIуращынэр проект гъэшIэгъонхэм ягупшысэщтыгъ, гухэлъышIухэр иIагъэх, Адыгеим хэхъоныгъэхэр ышIынхэм, лъэпкъым ишэн-хабзэхэр къэIэтыжьыгъэнхэм кIэхъопсыщтыгъ. Культурэм игупчэ зэтегъэпсыхьагъэ Адыгеим иIэнэу фэягъ. Урысыем исыдрэ чIыпIэ къикIыгъэр чIахьэмэ, лъэпкъым ищыIэкIагъэм, непэ ипсэукIэ, ишэн- хабзэхэм ащыгъуазэ хъун амал щыIэным лъэшэу кIэхъопсыщтыгъ. А гупчэм адыгабзэр щызэбгъэшIэн плъэкIынэу гъэпсыгъэнэу фэягъ.
Аскэр цIыфыгъэм, хьалэлыгъэм уасэ афишIэу къэтэджыгъ, иунагъо, икъуаджэ, ихэку шIу зылъэгъурэ цIыфэу щытыгъ. ЗыкъызеIэтым, ятэ зыщыфэхыгъэм лъыхъоу ригъэжьагъ, лIыпкъым зеуцом, унагъо ышIэнэу зырегъажьэм ятэ икъашъхьэ къыгъотыжьынэу нахь ишъыпкъэу пылъыгъ. Ыпхъоу Москва щыпсэурэ Лейлэ а Iофым ишъыпкъэу пылъыгъ. Пшъашъэмрэ ятэрэ лъэшэу зэгурыIохэу щытыгъ. Заом къимыкIыжьыгъэ ятэ икъэ къэгъотыгъэным АскэркIэ мэхьанэу иIэр Лейлэ дэгъоу къыгурыIощтыгъ. Ленинград дэжь зэрэщыфэхыгъэр ашIэщтыгъ, нэмыкIэу гъуазэ яIагъэп. Бэрэ, бэдэдэрэ Лейлэ ятэжъ зыщыфэхыгъэ чIыпIэм лъыхъугъ, сыдэу щытми, къыгъотыгъ. Ленинград хэкумкIэ псэупIэу Карбусель ар щыфэхыгъэу къычIэкIыгъ. А чIыпIэм щагъэпсыгъэ къэхэлъэшхоу дзэкIолIхэр зыщагъэтIылъыгъэхэм КIуращынэ Хъусен дэлъ. Пшъашъэм къыфагъэхьыгъэ тхылъым итхэгъагъ «1916-рэ илъэсым къэхъугъэу лейтенантэу КIуращынэ Хъусен Ахьмэд ыкъор гъэтхапэм и 21-м, 1943-рэ илъэсым фэхыгъэ, Ленинград хэкум ит псэупIэу Карбусель ар щагъэтIылъыжьыгъ». А къэбарыр къалэу Подольскэ иархив къызыхэкIыгъэр.
ЕтIанэ Санкт-Петербург щыпсэурэ Бырсыр Бислъан Iофым къыхэхьагъ. Ащ зэригъэунэфыгъэмкIэ, Карбусель дэжь щыфэхыгъэхэр зэкIэ Синявскэ лъэгапIэм щагъэтIылъыжьыгъагъэх. Ащ тетэу зы къэхэлъэшхо – комплексышхо Санкт-Петербург дэжь щагъэпсыгъ.
Мы къош къэхэлъэшхом зэшитIур – Аскэррэ Казбекрэ щыIагъэх. Ащ къыщегъэжьагъэу унагъор къэхалъэм макIо.
КIуращынэр заом фэгъэхьыгъэ спектаклэ ыгъэуцунэу ренэу фэягъ. Театрэр заом пэуцужьырэ трибунэу щытын фаеу режиссерым ылъытэщтыгъ.
Аскэр унэгъо дахэ ышIагъ. Ишъхьэгъусэу Симэ, ыпхъухэу Лейлэрэ Оксанэрэ, ыкъоу Тимур, ипхъорэлъфхэу Варерэ Даянэрэ ягукъэкIыжьхэм тапашъхьэ къырагъэуцорэр Iушэу, зафэу, щыIэныгъэр шIу зылъэгъурэ, IэпэIэсэныгъэшхо зыхэлъ, бэмэ шIу алъэгъурэ ыкIи шъхьэкIафэ зыфашIырэ цIыф.
Ишъхьэгъусэу Сим: Iушэу, хьалэлэу, зиунагъо шIу зылъэгъурэ цIыфыгъ. ЦIыф гъэшIэгъонэу щытыгъ, сэмэркъэур икIэсагъ, сыдрэ зэгурымыIоныгъэ къэхъугъэми, сэмэркъэукIэ зэшIуихыщтыгъ. Сычэфынчъэ зыхъукIэ, «Сима, учэфынчъэныр къыокIурэп, учэфэу щыIэныгъэм ущыгушIукI зыхъукIэ, онэфы, тэри уинэф, уифэбагъэ къытлъэIэсы».
Ипшъашъэу Лейла: Лъэшэу сыгу къео папэ тхылъ зэримытхыгъэр. Бэ гъэшIэгъонэу ышIэщтыгъэр, ылъэгъугъэр, зыIукIагъэр. Тятэ ыгу ихыгъэу, гукъабзэу, цIыф зафэу щытыгъ.
Ипшъашъэу Оксанэ: Сятэ къыспэблэгъэ, сызэхэзышIыкIырэ цIыфэу щытыгъ. Къин чIыпIэ ифагъэм IэпыIэгъу фэхъунэу сыдигъуи хьазырыгъ. ТиунагъокIэ ары анахь шъхьаIэу тиIагъэр. Ары зэкIэри тызэзыпхыщтыгъэр.
Ыкъоу Тимур: Сятэ тыдэ кIуагъэми сыздищэщтыгъ. Къыхэмыщэу гъэсэпэтхыдэр стхьакIумэ ригъэтыщтыгъ. Сятэ сырыгушхощтыгъ. СянэкIэ сыцIыкIу зэпытыгъ, ау сятэ зыныбжь икъугъэм фэдэу ренэу къысэплъыщтыгъ, сызэрэзекIорэмкIэ пшъэдэкIыжь зэрэсхьырэр къызгуригъаIощтыгъ. Р. Киплинг усэ иI «Наставление» ыцIэу. Ащ ренэу сятэ къысфеджэщтыгъ, ары къэс мэхьанэу хэлъым сызэлъиштэщтыгъ, лъэшэу сыригъэгупшысэщтыгъ. Емыджагъэр ащ еджагъэмэ дэгъугъэ, анахьэу кIэлакIэхэр ары зищыкIагъэр.
Ипхъорэлъф цIыкIухэу Варерэ Даянэрэ ятэжъ ыпсэ ахэтIэгъагъ. Ежьхэми ар лъэшэу шIу алъэгъущтыгъ.
Студентхэри якIэлэегъаджэ лъэшэу пыщэгъагъэх, ятэм фэдэу алъытэщтыгъ, шъхьэкIэфэшхо фашIыщтыгъ. Шекспир, Мольер ятворчествэ режиссерым лъэшэу икIэсагъ, студентхэми ахэр шIу аригъэлъэгъугъ.
Спектаклэ ужым КIуращынэр залым къычIанэу изакъоу бэрэ щысэу къыхэкIыщтыгъ. Спектаклэр зэрэкIуагъэм егупшысэщтыгъ, актерхэм ярольхэр къызэрашIыгъэр, ахэм цIыфхэр къызэряплъыщтыгъэхэр ынэгу къыкIэуцожьэу хъущтыгъ…
Краснодар телевидением Iоф щысшIэ зэхъум, адыгэ лъэпкъым фэгъэхьыгъэ къэтынхэр сшIыщтыгъэх. Ащ фэдэ къыдэкIыгъо пэпчъ Аскэр къысфытеоти, «Нуриет, сыдэу умолодеца! Сыдэу дэгъу дэдэу пшIыгъа?!» ыIощтыгъ. А гущыIэхэм сэ лъэшэу сыгу къаIэтыщтыгъ, лъэпкъым итарихъ фэгъэхьыгъэ материалхэр нахьыбэу къэзгъотыным сыпылъыгъ.
КIуращынэ Аскэр тэ, зышIэщтыгъэхэм зэкIэми, шIукIэ тыгу илъыщт.
ШъэуапцIэкъо Нуриет. Краснодар.