Орэдыжъхэр ыкIи адыгэ лъэпкъыр
Гуманитар ушэтынхэмкIэ Адыгэ республикэ институтэу КIэрэщэ Тембот ыцIэ зыхьырэм гъэтхапэм и 26-м проектэу «Адыгэ орэдым итарихъ» изы Iахьэу «Орэдым ихьакIэщ» зыфиIорэр щыIагъ.
Iофтхьабзэм институтым иIофышIэхэр, Адыгэ къэралыгъо университетым адыгэ филологиемкIэ икафедрэ къикIыгъэхэр, зэлъашIэрэ орэдыIохэр, Адыгэ драмтеатрэу И. Цэим ыцIэкIэ щытым иартистхэр, искусствэхэмкIэ кIэлэцIыкIу еджапIэу К. Лъэцэрыкъом ыцIэ зыхьырэм иеджакIоу, шыкIэпщынаоу Гъогъо Дамир, кIэлэегъаджэхэр, Адыгэ Хасэм хэт нахьыжъ куп хэлэжьагъэх.
ХьакIэщыр къызэIуихыгъ философие шIэныгъэхэмкIэ докторэу, профессорэу, гуманитар ушэтынхэмкIэ Адыгэ республикэ институтым ипащэу ЛIыIужъу Адам.
— Бзэр бгъэлэжьэн, бгъэфедэн фае, — къыIуагъ ащ, — мыщ фэдэ гущыIэпIэ чIыпIэхэр къызфэдгъэфедэхэзэ, адыгабзэм изэтегъэуцожьын лъыдгъэкIотэщт. Адыгэ Республикэм и Правительствэ ыкIи и ЛIышъхьэ яунашъокIэ адыгабзэм Iоф дэзышIэщт Проектнэ офис зэхащагъ ыкIи мы IофыгъомкIэ ащ апэрэ лъэбэкъухэр едзых. Сигуапэу хьакIэщым «Гъогумаф!» есэIо.
Ащ пыдзагъэу гущыIэр фигъэшъошагъ институтым иIорIотэ отдел ипащэу, филологие шIэныгъэхэмкIэ докторэу, АР-м шIэныгъэмкIэ изаслуженнэ IофышIэу Цуекъо Нэфсэт. Ащ адыгэ орэдыжъхэм ямэхьан, гъогоу къакIугъэр къыриIотыкIыгъ. — ХьакIэщыпчъэр непэ къызфызэIутхыгъэр адыгэ орэдэу зие лъэпкъым гопчынэу щымытыр ары, — къыIуагъ Нэфсэт. — Сабыим кушъэ орэд къыфаIо, ныбжьыкIэм — шIулъэгъу, нысэщэ, шъузыщэ орэд, лэжьакIом ищытхъу орэдым щаIуатэ. ЩыIэныгъэм илъэныкъуабэкIэ орэдхэр гъэзагъэх, ахэр лъэпкъым ицIыф акъылышIохэу усэкIо- орэдусхэм зэхалъхьэщтыгъэх. Дэгъури дэири псынкIэу адыгэхэм орэд ашIыщтыгъ, ащ къыхэкIэу усакIохэм защадзыещтыгъ, ежьхэри зыфэсакъыжьыщтыгъэх. Анахь щынэгъуагъэр, орэдым пцIэ IаекIэ хэхьаныр арыгъэ, ащ псынкIэу зиIэтыщтыгъ ыкIи мыхъункIэ уаригъашIэщтыгъ. Ауми, мытэрэзэу зекIуагъэм лъэшэу илъэкI рихьылIэмэ, гущыIэм пае, лIыгъэшIапIэ ифагъэмэ, ипсэемыблэжь-зэфагъэкIэ, илIыгъэ хабзэкIэ, ар мыпсынкIагъэми, зыкъаригъэштэжьын ылъэкIыщтыгъ. Орэдыр лъэпкъымкIэ Iэшэ иныгъ. Адыгэ лъэпкъым зэо-бэнэ зэпымычыжьмэ ахэтэу игъэшIэ гъогу къыкIугъ. КIодыкIае хъугъэ цIыфым гъыпчъэ фашIыщтыгъ е гъыбзэ фаусыщтыгъ илIыгъэ-цIыфыгъэ кIигъэтхъэу. Мы зэкIэми япхыгъэу IорIотаIоу Шъхьэлэхъо Алый ыIогъагъэр тишIэныгъэлэжь-нартоведэу ХьэдэгъэлIэ Аскэр мырэущтэу къыIотэжьыщтыгъ: «Адыгэ лъэпкъыр къэнэнэу шъуфаемэ, адыгэ орэд шъуусы». Узэгупшысэн ащ хэлъ.
Цуекъо Нэфсэт къызэриIуагъэмкIэ, Ны хасэм иунашъокIэ орэдышъом ралъхьэгъэ гущыIэр къызэтенэу щытыгъ. Шэн-хабзэхэр, зекIокIэ-шIыкIэхэр орэдымкIэ къагъэгъунэщтыгъэх. «ТхэкIэ-еджакIэ зимыIэгъэ лъэпкъымкIэ орэдым мэхьанэ иIагъ, лъэпкъым игъогу дытетэу орэдыр къырыкIуагъ, щыIагъ ыкIи лъэпкъыр щэIэфэ щыIэщт» — кIигъэтхъыгъ Нэфсэт. Мы илъэсым Адыгэ шIэныгъэ институтыр зызэхащагъэр илъэс 90-рэ зэрэхъурэр къыхигъэщыгъ, тиныдэлъфыбзэ икъызэтегъэнэнкIэ Iофышхо тшIэн зэрэфаер, егъэжьапIэ иIэ хъугъэшъ, мурад ехьыжьагъэр зэрэлъыкIотэщтыр къыIуагъ.
«Орэдым ихьакIэщ» зыфиIорэ проектым изы Iахь зыгъэхьазырыгъэу ыкIи ар зезыщэщтэу, филологие шIэныгъэхэмкIэ кандидатэу, IорIуатэмкIэ отделым иIофышIэ шъхьаIэу Нэхэе Саидэ гущыIэр ратыгъ. Ащ къыдеIагъ АР-м искусствэхэмкIэ изаслуженнэ IофышIэшхоу Нэхэе Азэмат.
Орэдыр ыкIи лъэпкъыр зы псэ кIапсэ зэриIыгъхэр, цIыфым игушIуагъуи игумэкIи орэдкIэ къызэриIорэр, цIыфым къиныр орэдым къыфигъэпсынкIэу, гушIуагъор зэрэфигъэбагъорэр Саидэ хигъэунэфыкIыгъ. Орэдым ыкIи ар зие лъэпкъым ягъогу нахь ашIэным пае непэ зэрэзэхэхьагъэхэр адыгэ хьакIэщ шIыкIэм тетэу ар зэрэкIощтыр, адыгэ орэдхэу институтым чIэлъхэм ялъэтегъэуцо Iоф дэзышIагъэр мы институтым итхылъеджапIэ ипащэу Быгъушъэ Нэфсэт арэу зэрэщытыр къыIуагъ.
Джащ фэдэу Нэхэе Саидэ игущыIэ къыщыхигъэщыгъ илъэс минхэм адыгэхэр, лъэпкъ гупшысэр, лъэпкъ дунэететыкIэр зыухъумагъэр орэдыр арэу зэрэщытыр. «Мытхыгъэ тарихъым ахэр изехьакIох», — къыIуагъ ащ. Институтым ифонд мэкъамэхэр зытет кассетэ 70-м ехъу зэрэхэлъыр, Едыдж Батырай Германием, Косовэ къащиугъоижьыгъэ орэди 150-м ятарихъ къызэраритыжьыгъэмкIэ зэрэфэразэхэр къыIуагъ.
ХьакIэщым иапэрэ зэхэхьагъу «Къэрэкъамылым» (сэмэркъэу орэд») ыкIи ар дэдэр (гъыбзэм илъэу, «Мерэм игъыбз» ыкIи «Заремэ игъыбз» щатегущыIагъэх.
Фольклористэу, АР-м изаслуженнэ журналистэу, Адыгэ телевидением иIофышIэу Кушъу Светэ «Къэрэкъамылым» игъогу къыIотагъ.
«Къэрэкъамылыр» сэмэркъэу шIыкIэм илъэуи гъыбзэуи зэрэщыIэр, ащ къыIуатэрэм С. Кушъур къатегущыIагъ, орэдым къэбарэу пылъыр агу къыгъэкIыжьыгъ. Абдзэхэ-кIэмгуе шъолъырым пшъашъэм къыIорэм фэдэу зэрэщаусыгъэр къыхигъэщыгъ.
ЗэлъашIэрэ шIэныгъэлэжьэу Унэрэкъо Рае адыгэ орэд зэхэлъхьэкIэ хабзэр зыфэдагъэр къыIуагъ, пшъэшъэ хэхыгъэ гъэшIуагъэм ыцIэкIэ зэраусыщтыгъэр къыхигъэщыгъ. А зы орэдым мэхьэнабэ иIэн зэрилъэкIыщтыгъэр: мыскъарэ е лакъырд хэлъэу, сэмэркъэур къебэкIэу е гумэкI-гукIаер ыкупкIэу (гъыбзэр) къыIуагъ, IорIуатэмкIэ хабзэу щытыгъэр, аусыгъэм тамэ зэригъотырэр, цIыфмэ къызэраIорэр арэу ылъытагъ.
«Къэрэкъамыл» (гъыбзэр) Къэбэртэе-Бэлъкъарымрэ Адыгеимрэ язаслуженнэ артистэу Быщтэкъо Азэмат къыIуагъ, шыкIэпщынэм къезгъэIуагъэр Дунэе зэнэкъокъухэм ялауреатэу Гъогъо Дамир.
Нэхэе Саидэ «Мерэм игъыбзэ» орэдыIо-тхыдэIуатэу ХъутIыжъ Хъанмелэч ышыпхъоу игъонэмыс хъугъэм зэрэфиусыгъэр, гъыбзэм пылъ къэбарым къащыуцугъ. Гъыбзэм лъапсэу иIэ хъугъэ-шIагъэр зыфэдагъэр Адыгэ лъэпкъ театрэу И. Цэим ыцIэкIэ щытым иартистхэу Нэхэе Мэрджанэт, Бэгъушъэ Анзор ыкIи ежь Нэхэе Саидэ зэдеIэхэзэ гъыбзэм икъэбар къаIотагъ.
Филологие шIэныгъэхэмкIэ докторэу, профессорэу, АКъУ-м культурэмрэ тарихъымрэкIэ якафедрэ ипащэу Унэрэкъо Рае «А гъыбзэ гущэр къызаIокIэ…» зыфиIорэ гущыIэу «Мерэм игъыбзэ» фэгъэхьыгъэм, мы цIэр иIэу 2004-рэ илъэсым тхылъэу къыдигъэкIыгъэм, ар ХъутIыжъ Заурбэчрэ ыпхъоу Хъанмелэчрэ зэрафэгъэхьыгъэм, тымрэ пхъумрэ адыгэ IорIотэ шIэныгъэм ацIэ зэрэхэуцуагъэм ягугъу къышIыгъ. «Мерэм игъыбзэ» IэпэIэсэгъэ ин хэлъэу УФ-м изаслуженнэ артисткэу, АР-м инароднэ артисткэу ХъокIо Сусаннэ шъхьацышъор къыгъэтэджэу, гум нэсэу къыIуагъ.
Цуекъо Нэфсэт джырэ мафэхэми гъыбзэхэр зэраусырэм къытегущыIагъ. ХъутIыжъ лIакъом джыри бэмышIэу къехъулIэгъэ тхьамыкIагъор – пшъэшъэ зищэгъу дахэу янэшхэм яджэгу Шэуджэнхьаблэ зыдащагъэр, щэкIэ укIыгъэу къызэрафащэжьыгъэм зэрехьылIагъэр. «Заремэ игъыбзэ» зыусыгъэр, щымыIэжь пшъашъэм ятэшыпхъоу, кIэлэегъаджэу Хьашхъуанэкъо Нэфсэт арэу зэрэщытыр, гум- шъом дэлъ гукIаер гъыбзаIом къыриIотыкIын зэрилъэкIыгъэр Н. Цуекъом къыIуагъ. Ежь Нэфсэтэу гъыбзэр зыусыгъэри хьакIэщым щыIагъ ыкIи иусыгъэ цIыфхэм къафеджагъ. Орэдусэу ыкIи орэдыIоу Нэгъуцу Саидэ Хьашхъуанэкъо Нэфсэт игъыбзэ орэдышъом рилъхьагъ, Саидэ къыIоу кассетэм тет «Заремэ игъыбзэ» зэхахьэм хэлажьэхэрэр рагъэдэIугъэх.
Зигъо Iофтхьабзэм хэлэжьагъ АР-м культурэмкIэ иминистрэ игуадзэу ШъэуапцIэкъо Аминэт. Адыгабзэм илэжьын-хэгъэхъонкIэ Iоф ехьыжьагъэм къызэрэхэлэжьэщтхэр ащ къыIуагъ.
Орэдым ихьакIэщ зэрэкIуагъэм, щызэхахыгъэм ащ хэлэжьагъэхэр, анахьэу нахьыжъхэр лъэшэу ыгъэрэзагъэх. Iофтхьабзэм ыкIэм цIыфхэр яеплъыкIэ-шIошIхэмкIэ зэдэгощагъэх, зигъо Iофыгъоу ращэжьагъэр дахэу зэшIуахынэу къафаIуагъ. Пэрэныкъо Чатибэ ипсэлъэ кIэкI щыкIигъэтхъыгъэр «Заремэ игъыбзэ» кIэт мэкъэмэ-орэдышъор зэрэкъэшъо-чэф макъэр, гъыбзэм зэремыкIурэр ары.
Институтым ипащэу ЛIыIужъу Адам хьакIэщым хэлэжьагъэхэм зэкIэми «тхьашъуегъэпсэу» къариIуагъ, анахьэу зэлъашIэрэ артисткэу ХъокIо Сусаннэ гъыбзэр къызэриIуагъэм, артистэу Быщтэкъо Азэмэт ыгу нигъэсэу «Къэрэкъамылыр» зэрэкIыригъэщыгъэм, кIэлэкIэ сэнаущ дэдэу Гъогъо Дамир шыкIэпщынэр зэригъэбзэрэбзагъэм, артисткэу Нэгъуцу Саидэ къыIоу зэдэIугъэхэм гухэлъ инэу зэхахьэм иIагъэр къыраIотыкIыгъэу, афызэшIокIыгъэу ылъытагъ.
Мамырыкъо Нуриет. Сурэтхэр мэфэкI Iофтхьабзэм щытырахыгъэх.