Театрэм и Илъэс фэгъэхьыгъ
ШIэжь лъэмыджыр агъэпытэ
Театрэм и Дунэе мафэ фэгъэхьыгъэ къэгъэлъэгъонхэу Адыгэ Республикэм щыкIуагъэхэм тагъэгушхуагъ. ЗэIукIэгъухэм лъэпкъ зэфэшъхьафхэр зэфащагъэх.
Адыгэ литературэм, музыкальнэ искусствэм хэхъоныгъэ инхэр афэзышIыгъэхэ Жэнэ Къырымызэрэ Тхьабысым Умарэрэ яюбилейхэр мыгъэ хэтэгъэунэфыкIых. Республикэм и Къэралыгъо филармоние икамернэ музыкальнэ унэ щыкIогъэ зэхахьэр Юлия Никоновам зэрищагъ. Ащ зэрэхигъэунэфыкIыгъэу, Жэнэ Къырымызи, Тхьабысым Умари агухэр къытемыожьхэрэми, непи къытхэтхэу тэлъытэ. Ятхылъхэр, орэдэу зэдаусыгъэхэр щыIэныгъэм къыщыддекIокIых.
Театрэхэм ащагъэуцугъэхэ спектаклэхэм Тхьабысым Умарэ иорэдхэр ащэIух. Жэнэ Къырымызэ иусэхэм ахэлъхэ гущыIэхэр къэгъэлъэгъонхэм ащызэхэтэхых. Андырхъое Хъусенэ фэгъэхьыгъэхэ театрализованнэ къэшIынхэм лIыхъужъ шъыпкъэм ищыIакIэ ухащэ.
ЛIыхъужъхэр тищысэх
Пчыхьэзэхахьэм У. Тхьабысымэм, Къ. Жанэм яIахьылхэр хэлэжьагъэх, ягукъэкIыжьхэр къаIотагъэх. «Жэнэ Аскэр, Жэнэ Заур — ахэр цIыф цIэрыIох, — къыIуагъ Урысыем изаслуженнэ артисткэу, Адыгеим инароднэ артисткэу Жэнэ Нэфсэт. — Тигуапэу Заури, Аскэри тядэIугъ. Тхьаегъэпсэух зэхэщакIохэр».
Хэгъэгу зэошхом Жэнэ Къырымызи, Тхьабысым Умари лIыхъужъныгъэ щызэрахьагъ, пыим пхъашэу пэуцужьыгъэх. Заом щызэпачыгъэхэ гъогу къинхэм яхьылIэгъэхэ орэдхэр зэдатхыгъэх.
ЩыIэныгъэр яорэд
Адыгеим, Къэбэртэе-Бэлъкъарым, Къэрэщэе-Щэрджэсым янароднэ тхакIоу МэщбэшIэ Исхьакъ зэхахьэм къыщиIотагъэм укъыпкъырыкIымэ, тхылъышхо птхын плъэкIыщт. Къ. Жанэмрэ У. Тхьабысымэмрэ щыIэныгъэм зыкъыщагъотыгъ. НэбгыритIури Тхьэм зэфихьыгъэхэу бэмэ алъытэ. Зэдаусыгъэхэ орэдхэм пIуныгъэ кIуачIэу ахэлъым щыIэныгъэм чIыпIэ хэхыгъэ щыряI.
— ЗэлъашIэрэ орэдэу «Синанэм» адыгэу дунаим тетхэр зэфищагъэх, — къыIуагъ МэщбэшIэ Исхьакъ. — Къырымызи Умари Совет хабзэм ыпIугъэх. Лъэхъанэу зыщыпсэухэрэм, лъэпкъым, хэгъэгум афэусагъэх.
Адыгэ Республикэм и Гимн хэлъхэ гущыIэхэр МэщбэшIэ Исхьакъ ыусыгъэх. Ащ егъэжьапIэу фэхъугъэм зэлъашIэрэ тхакIор гъэшIэгъонэу къытегущыIагъ. У. Тхьабысымэр кIэщакIо фэхъуи, Гимныр зэдаусыгъ.
Филармонием иIофышIэхэу Баджэ Дзэхъанэ, Нэгъой Маринэ, Хъут Рустам, Сергей Трутневым, Наталья Амельченкэм, Нэгъой Бэлэ орэдхэр къаIуагъэх. Анна Шапоровамрэ Никита Гнединымрэ музыкальнэ Iэмэ-псымэхэмкIэ произведениехэр агъэIугъэх. ФортепианэмкIэ Набэкъо Бэлэ къадежъыугъ.
Зэхахьэр кIэухым фэкIуагъэу Жэнэ Нэфсэт къэбархэр къыIотагъэх, гум иорэдхэр ыгъэжъынчыгъэх. Бзыужъыем ехьылIагъэр къызыхедзэм, артисткэм залым чIэсхэр дежъыугъэх.
«Гум иорэд къызэхэхи, къэгъэзэжьи садэжь къэкIожь», — къеIо орэдыIом.
Шъэожъ Розэ эстрадэм нахь куоу хэзыщэгъэ орэдэу «О унитIур» егъашIи жъы хъущтэп. И. МэщбашIэмрэ У. Тхьабысымэмрэ зэдаусыгъэхэу «Сишъэогъу», «СшIэщтыгъэр сшIэрэп усимыIагъэмэ», Къ. Жанэм иусэхэм атехыгъэхэу «Сикъуадж», «О унитIу», «Синан», нэмыкIхэм яхьылIэгъэхэ гупшысэхэр зэхахьэм къыщаIотагъэх. Адыгэхэм яшэн-хабзэ фэгъэхьыгъэ усэу Къ. Жанэм ытхыгъэмкIэ тилъэпкъ дунаим нахьышIоу щашIагъ.
Орэдыр о зигъэгъус, Орэдыр о зигъэкIас. ЗикIасэр насыпышIощт, Зигъусэр гушIом хэтыщт.
«Орэдыр о зигъэгъус» зыфиIорэ усэм а гущыIэхэр къыхэтхыгъэх. Тыгъэр тшъхьащытэу чIыр къекIокIыфэ Жэнэ Къырымызэрэ Тхьабысым Умарэрэ зэдаусыгъэхэ орэдхэр щыIэщтых, лъэпкъ шIэжьым илъэмыдж гъашIэм щагъэпытэщт.
ЕМТIЫЛЪ Нурбый.