Урысыем щыкIорэ Iофтхьабзэм республикэм инысхъэпэ театрэу «Дышъэ къошыныр» хэлажьэ, къэгъэлъэгъонхэм нэбгырабэ яплъы.

«Чебурашкэрэ ащ иныбджэгъухэмрэ» зыфиIорэр Эдуард Успенскэм ытхыгъэм техыгъэу Нэгъой Асыет ыгъэуцугъ.

Федеральнэ Iофтхьабзэу «Театрэр кIэлэцIыкIухэм апай» зыфиIоу партиеу «Единэ Россиер» кIэщакIо зыфэхъугъэм республикэ филармониер хэлажьэ. «Дышъэ IункIыбзэжъыер, е Буратинэ къехъулIагъэхэр» зыфиIорэм кIэлэцIыкIухэр, ны-тыхэр къыкIэлъэIух джыри къагъэлъэгъонэу.

«Чебурашкэрэ ащ иныбджэгъухэмрэ» ыпкIэ амытэу искусствэр зышIогъэшIэгъонхэр еплъыгъэх. Театрэм ихудожественнэ пащэу, Адыгэ Республикэм инароднэ артистэу Сихъу Станислав тызэрэщигъэгъозагъэу, цIыфхэм нахь агу рихьырэ спектаклэхэр тапэкIи къагъэлъэгъощтых.

Сурэтым итхэр: Чебурашкэ ыкIи ащ иныбджэгъухэм яхьылIагъэр артистхэм къагъэлъагъо.

ЕМТIЫЛЪ Нурбый.