Республикэм къыщыдагъэкIырэ продукциер федеральнэ ыкIи дунэе бэдзэрхэм ащыIугъэкIыгъэнымкIэ проектхэм ягъэцэкIэн илъэситIу хъугъэу Адыгеим щырагъэжьагъ. Адыгэ Республикэм и ЛIышъхьэу КъумпIыл Мурат мы лъэныкъомкIэ къэуцурэ пшъэрылъхэр зэрифэшъуашэу зэшIохыгъэнхэм ынаIэ тет.

Зэфэхьысыжьхэм къызэрагъэлъагъо­рэмкIэ, экспортым ылъэныкъокIэ шъо­лъырым амалэу IэкIэлъхэм хэпшIыкIэу ахэхъуагъ. БлэкIыгъэ илъэсым имэзибгъу доллар миллион 28-рэ фэдиз зыосэ продукцие IуагъэкIыгъ, ыпэрэ илъэсым егъэпшагъэмэ, а пчъагъэр процент 31-кIэ нахьыб. НэмыкI чIыпIэхэм нахьыбэу ащащэрэр гъомылапхъэр ары. 2024-рэ илъэсым ехъулIэу агропромышленнэ комплексым ипродукцие иэкспорт (анахьэу къуаер, пынджыр) фэди 4,5-кIэ нахьыбэ хъунэу республикэм щагъэнафэ. БлэкIыгъэ илъэсым къэкIыхэрэм ахашIыкIырэ дэгъэ тонн мин 20-м ехъу Китай, Вьетнам, IэкIыб благъэм икъэралыгъохэм ащаIуагъэкIыгъ. Адыгэ къое тонн 27-рэ Германием ащагъ, мы продукциер зы­лъы­Iэсырэ къэралыгъохэм япчъагъэ нахьыбэ ашIын гухэлъ щыI. Пынджыр къэзыгъэкIырэ ыкIи нэмыкI шъолъырхэм, къэралыгъохэм ащыIузыгъэкIырэ предприятиехэм IэпыIэгъу афэхъугъэным фытегъэпсыхьэгъэ региональнэ программэ аштагъ. 2019 — 2024-рэ илъэсхэм федеральнэ ыкIи республикэ бюджетхэм къахэхыгъэ сомэ миллион 70-м ехъу мы лъэныкъом пэIуагъэхьанэу агъэнафэ, 2019-рэ илъэсым – миллиони 10. Джырэ уахътэм мы Iофтхьабзэм хэлажьэ ООО-у «Синдика-Агро» зыфиIорэр.

ЧIыпIэ продукциер къыдэзыгъэкIы­хэрэм къалэу Москва щыIэ сатыушIыпIэ гупчэу «Фуд Сити» зыфиIорэм амалэу къытыхэрэр джы къызфагъэфедэнхэ алъэкIыщт, Адыгеим ипавильон блэкIыгъэ илъэсым мыщ къыщызэIуахыгъ. Европэм ибизнес-площадкэ анахь иным япродукцие къыщагъэлъэгъон амал яIэ хъугъэ республикэм ипредприятиехэм. Тыди щызэлъашIэрэ адыгэ къуаер, мыIэрысэр, нэмыкIхэр щэфакIохэм зэрагъэгъотынхэ алъэкIыщт. Мыщ фэдэ екIолIакIэм иапэрэ зэфэхьысыжь хъугъэ сомэ миллион 210-рэ зытефэрэ зэзэгъыныгъэхэм типредприятиехэр зэракIэтхагъэхэр.

ТХЬАРКЪОХЪО Адам.