Эстрадэ орэдхэм якъэIон фэгъэхьыгъэ зэнэкъокъур гъэтхапэм и 28 — 29-м республикэм искусствэхэмкIэ иколледж щэкIо.

Адыгэ Республикэм искусствэхэмкIэ икIэлэцIыкIу еджапIэу Лъэцэрыкъо Кимэ ыцIэ зыхьырэр зэнэкъокъум икIэщакIу. Адыгеим культурэмкIэ и Министерствэ зэхэщакIохэм IэпыIэгъу афэхъу. Къалэхэм, районхэм къарыкIыгъэ орэдыIохэр 60-м нахьыбэ мэхъух. Аныбжьхэм ялъытыгъэу ахэр купи 4-у гощыгъэх. Илъэси 7 – 9-м ит­хэм зэнэкъокъур тыгъуасэ рагъэжьагъ.

Адыгэ Республикэм инароднэ артистэу, орэдусэу Михаил Арзу­мановыр, Урысыем, Абхъазым язаслуженнэ артисткэу, Адыгеим инароднэ артисткэу Нэхэе Тэма­рэ, республикэм искусствэхэмкIэ иколледжэу У. Тхьабысымым ыцIэ зыхьырэм эстрадэмкIэ икъутамэ икIэлэегъаджэу Оксана Стефаненкэр осэшI купым хэтых.

— ОрэдыIохэм тигуапэу тядэIу, артист цIэрыIо хъун зылъэкIыщтхэр ахэтэлъагъох, — къытаIуагъ Михаил Арзумановымрэ Нэхэе Тэмарэрэ. — ЕджакIохэр зэнэкъо­къум нэIуасэ зэфешIых, искусствэм нахь пыщагъэ мэхъух.

Адыгеим, Пшызэ язаслуженнэ артисткэу Лъэцэр Римэ Тэхъутэмыкъуае щыригъаджэхэрэм япащ. Зэнэкъокъухэм яшIуагъэкIэ кIэлэеджакIохэм яшIэныгъэхэм зэрахагъахъорэр тизэдэгущыIэгъу къыщыхигъэщыгъ.

Дзэ къулыкъум, лIыхъужъны­гъэм, мамыр псэукIэм, шIулъэгъум, зэкъошныгъэм, нэмыкIхэм афэгъэ­хьыгъэ орэдхэр кIэлэеджакIо­хэм къаIох. «IэпэIасэм иеджапI» зыфи­Iорэ зэхахьэм зэлъашIэрэ орэдыIоу Нэхэе Тэмарэ искусст­вэм ехьылIэгъэ къэбархэр къащы­фиIотэщтых. Зэнэкъокъум яIэпэIэсэныгъэ къыщагъэлъагъо, ащ да­кIоу, яшIэныгъэ щыхагъахъо. ОсэшI купым непэ зэфэхьысыжьхэр ышIыщтых, орэдыIо анахь дэ­гъухэм шIухьафтынхэр афашIыщтых.