Адыгеим автономие зиIэр илъэси 100 зэрэхъурэм изыфэгъэхьазырын тегущыIагъэх
2022-рэ илъэсым республикэм автономие иIэ зыхъугъэм ия 100-рэ илъэс Адыгеим хигъэунэфыкIыщт. Къэралыгъо лъэгапIэм тетэу юбилеир агъэмэфэкIыщт. 2017-рэ илъэсым чъэпыогъум Урысые Федерацием и Президентэу Владимир Путиным ащ фэгъэхьыгъэ Указым ыIапэ кIидзэжьыгъ.
Урысые Федерацием и Правительствэ и Тхьаматэ игуадзэу Виталий Муткорэ Адыгэ Республикэм и ЛIышъхьэу КъумпIыл Муратрэ тыгъуасэ Москва щызэдыряIэгъэ зэIукIэгъум ащ изыфэгъэхьазырын епхыгъэ Iофыгъохэм щатегущыIагъэх.
Адыгеим автономие иIэ зыхъугъэм ия 100-рэ илъэс ихэгъэунэфыкIын изыфэгъэхьазырынкIэ зэхэщэкIо комитетым итхьаматэр Виталий Муткор ары. Юбилеим фэгъэхьыгъэхэ Iофтхьабзэхэу зэшIуахыщтхэм алъэныкъокIэ Iофэу агъэцакIэрэм ар къыкIэупчIагъ.
Шъугу къэтэгъэкIыжьы: Урысыем и Правительствэ иунашъокIэ зэхащэгъэ комитетым хэхьагъэх хабзэм ифедеральнэ ыкIи ишъолъыр къулыкъухэм ялIыкIохэр, Къэралыгъо Думэм идепутатхэр, Урысые Федерацием ФедерациемкIэ и Совет исенаторхэр. Республикэм и ЛIышъхьэ Урысыем ивице-премьер къыфиIотагъ зэхэщэкIо комитетым иапэрэ зэхэсыгъо зыщэIэм Виталий Мутко къафишIыгъэгъэхэ пшъэрылъхэр Адыгеим зэрэщагъэцакIэхэрэм фэгъэхьыгъэу. 2018-рэ илъэсым шышъхьэIум Москва апэрэ зэхэсыгъор щыкIогъагъ.
Непэ Iофтхьабзэхэм языфэгъэхьазырын макIо. Урысые Федерацием культурэмкIэ и Министерствэ ягъусэу планыр зэхагъэуцуагъ, ар пычыгъуиплIэу зэтеутыгъ. ЦIыфхэр жъугъэу зыхэлэжьэщтхэ Iофтхьэбзэ зэфэшъхьафыбэ ащ къыхеубытэ. Социальнэ мэхьанэ зиIэ псэуалъэхэр зэтырагъэпсыхьажьыщтых, культурэм иучреждение заулэ агъэцэкIэжьыщт. Ащ нэмыкIэу республикэмкIэ анахь мэхьанэ зиIэ инфраструктурнэ псэуалъэхэм алъэныкъокIэ федеральнэ гупчэм иIэпыIэгъу Адыгеир щэгугъы. Ахэм ахэхьэх псэуалъэхэм яшIын, магистральнэ псырыкIуапIэм игъэпсын лъыгъэкIотэгъэныр.
А Iофыгъохэм язэшIохынкIэ ыкIи Iофтхьабзэхэм яплан нэфэгъэ икъу хэлъхьэгъэнымкIэ Адыгеим и ЛIышъхьэ игъо афилъэгъугъ Адыгеим иавтономие ия 100-рэ илъэс изыфэгъэхьазырынкIэ зэхэщэкIо комитетым идэкIыгъо зэхэсыгъо зэхащэнэу.
Къапыщылъ хъугъэ-шIагъэм мэхьанэшхо зэриIэр Виталий Мутко къыкIигъэтхъыгъ, Урысыем и Президентэу Владимир Путиныр ащ фэгъэхьыгъэ Указым кIэтхэжьыгъ. Республикэм ипащэхэм игъоу алъытэхэрэм ахэплъэным В. Муткор фэхьазыр.
Адыгэ Республикэм и ЛIышъхьэ ипресс-къулыкъу