Дунэе зэIукIэгъухэу Ростов-на-Дону щыкIуагъэхэм бзылъфыгъэ гандбол командэхэр ахэлэжьагъэх. Илъэс 20-м нэс зыныбжьхэр апэрэ чIыпIэхэм афэбэнагъэх.— Тикомандэ сэнаущыгъэ зыхэлъ ныбжьыкIэхэр зэрэхэтхэр зэхэщакIохэм къыдалъыти, зэнэкъокъум тырагъэблэгъагъ, — къытиIуагъ Мыекъопэ «АГУ-Адыифым» итренер шъхьаIэу, Урысыем изаслуженнэ тренерэу Александр Реввэ. – Мыекъуапэ щыщ пшъашъэу Алина Морозовар Урысыем ихэшыпыкIыгъэ командэ щешIагъ.

Апэрэ чIыпIэр Урысыем ихэшыпыкIыгъэ командэ къыдихыгъ. Чехием иешIакIохэр ятIонэрэ хъугъэх. Мыекъопэ клубэу «Адыифыр» Бельгием текIуи, ящэнэрэ чIыпIэр къыфагъэшъошагъ.

«Адыифым» щешIэрэ Маргарита Кушнырь къэлэпчъэIут анахь дэгъоу зэнэкъокъум къыщыхахыгъ. Елизавета Краснокутскаяр, Алиса Дворцеваяр ешIэгъухэм къащыхагъэщыгъэх. ЗыцIэ къетIуагъэхэ пшъэшъищми шIухьафтынхэр къаратыгъэх.

Мыекъуапэ испорт еджапIэ зыщызыгъэсэхэрэ еджакIохэу Ангелина Куцеваловар, Диана Казихановар «Адыифым» щешIагъэх. Ахэр джыри ныбжьыкIаIох нахь мышIэми, яIэпэIэсэныгъэкIэ къахэщых, суперлигэм щешIэнхэу загъэхьазыры.

Мэлылъфэгъу мазэм и 2-м къыщыублагъэу суперлигэм хэтхэ командэхэу я 9 – 11-рэ чIыпIэхэр къыдэзыхыгъэхэр къалэу Уфа щызэIукIэщтых. ЗэIукIэгъухэм ахэлэжьэщтых «Алиса» Уфа, «Луч» Москва, «Адыиф» Мыекъуапэ. ЯтIонэрэ, ящэнэрэ къекIокIыгъохэр Москва, Мыекъуапэ ащыкIощтых.

Сурэтым итхэр: «Адыифым» итренерэу Ольга Рюхинар, ешIэкIо ныбжьыкIэу Алиса Дворцеваяр.