Лъэпкъ гвардием иструктурэхэм къулыкъур ащыпхьыныр къины ыкIи щынагъо. Ар сэнэхьаткIэ къыхэзыхыхэрэр цIыф бланэхэу алъытэх.

Ащ зищыIэныгъэ езыпхырэ къулыкъушIэ пэпчъ ихэгъэгу къы­ухъумэным ренэу фэхьазырын, ащкIэ ренэу щысэтехыпIэн фае.

УФ-м лъэпкъ гвардиемкIэ и Федеральнэ къулыкъу и ГъэIорышIапIэу АР-м щыIэм иподразделениеу ОМОН-м илъэс 25-рэ хъугъэу къулыкъу щехьы полицием иполковникэу Шъоджэ Налбый.

Мы структурэм ущылэжьэныр мыпсынкIэми, ар къыхихыным лъапсэу фэхъугъэм тыщигъэ­гъозагъ Налбый. Ащ къызэрэтфиIотагъэмкIэ, ятэу Мыхьамэт дзэ къулыкъушIэу зэрэщытыгъэр ары нахьыбэу IэубытыпIэ фэ­хъу­гъэр. Зыкъэухъумэжьыным-­кIэ Министерствэм и УIэшыгъэ КIуачIэхэм ахэтэу илъэс 20-м ехъурэ ятэ къулыкъур ыхьыгъ. 1965-рэ илъэсым Налбый Мые­къуапэ къыщыхъугъ, 1972-рэ илъэсым ятэ зыхэтыгъэ дзэр Томскэ хэкум ит поселкэу Итаткэ агъакIуи, яунагъокIэ дзэ частым щыпсэугъэх, а илъэс дэдэм ащ дэтыгъэ гурыт еджапIэм апэрэ классым щычIэхьагъ. Нэужми къалэу Омскэ илъэси 5-рэ ятэ къулыкъур щихьыгъ. 1979-рэ илъэсым Мыекъуапэ къагъэзэжьыгъ.

1984 — 1986-рэ илъэсхэм Афганистан къулыкъур щихьыгъ. Ащ къызекIыжь илъэсым Адыгэ къэралыгъо кIэлэ­егъэджэ ин­ститутым физическэ культурэмкIэ ифакультет дзэ къулыкъум фэгъэхьазырыгъэнхэмкIэ иот­деление чIэхьагъ. Илъэси 4-м мо­тострелковэ взводым иполигон ащэхэзэ рагъэджагъэх, щэ­рыоным, техникэ хьылъэр зэра­фэным афа­гъэсагъэх. Еджэныр къызеухым Мыекъопэ гурыт еджапIэу N 19-м физическэ куль­турэмкIэ кIэлэегъаджэу илъэ­си 4-рэ Iоф щишIагъ.

1993-рэ илъэсым АР-м хэгъэ­гу кIоцI IофхэмкIэ и Министерствэ иподразделениеу щытыгъэ ОМОН-р зэхащагъ. 1994-м илъэс 28-рэ ыныбжьэу, физическэ ухьазырыныгъэ дэгъу иIагъэ­ти, ицыхьэ зытелъыжьэу Налбый ОМОН-м хэхьагъ.

Ащыгъум хэушъхьафыкIыгъэ подразделением кIэлэ ныбжьыкIэхэу дзэм къулыкъур щызыхьыгъэхэр аштэщтыгъэх. Адрэ къулыкъухэм ягъэпшагъэмэ, мыщ хэтхэм ухьазырыныгъэ дэгъу аIэ­кIэлъыгъ. Отделым ипшъэрылъ шъхьаIэхэм ащыщ общественнэ рэхьатныгъэр, къэралыгъо объект шъхьаIэхэр къэухъумэгъэнхэр, экстремизмэм ыкIи терроризмэм апэуцужьыгъэныр, нэмыкIхэри. Тиреспубликэ имызакъоу, нэмыкI шъолъырхэми ОМОН-м хэтхэм щытхъу хэлъэу къулыкъур ащахьы.

Налбый къызэриIуагъэмкIэ, илъэс 25-м къыкIоцI отрядым икъулыкъушIэхэр террористическэ нэшанэ зиIэ Iофыгъохэм цIыфхэр ащыухъумэгъэнхэмкIэ, гъэры ашIыгъэхэр шъхьафит шIыжьыгъэнхэмкIэ ыкIи бзэджэшIэ щынагъохэм якъэубытынкIэ Iофтхьабзэхэм ахэлажьэх. Непэ анахь мэхьанэшхо зиIэ пэшIорыгъэшъ Iофтхьабзэхэу хэбзэ­ухъумэкIо къулыкъухэм рагъэ­кIокIыхэрэм а отделыр ахэмылажьэу къыхэкIырэп.

Налбый зыпылъ Iофыр шIо­гъэшIэгъонэу, шIу ылъэгъоу зэ­рэщытым къыхэкIыкIэ апэрэ ма­фэхэм къащегъэжьагъэу ар шIокъиныгъэп. 1994-рэ илъэсым къыщыублагъэу непэ къызнэсыгъэм анахь къулыкъушIэ дэгъу­хэм ясатырэ хэтэу ищытхъу аригъаIозэ Iоф ешIэ.

1996-рэ илъэсым къыщегъэ­жьагъэу Чэчэн, Дагъыстан, Ин­гуш рес­публикэхэм ащыIагъэх. Япшъэ­рылъхэр агъэцакIэхэзэ зэо зэпэуцужьхэм якъулыкъушIэ нэ­бгыритIу зэрахэкIодагъэр, ахэм яшIэжь зэрагъэлъапIэрэр къы­Iуагъ Налбый.

— Тикъулыкъу джары зэрэщытыр, Iашэр пштэу пшъэры-лъэу къыпфагъэуцугъэр бгъэцакIэ хъумэ, къыбгурыIонэу щыт уапэ къикIын ылъэкIыщтыр, — еIо Налбый.

Илъэс 25-м IэнэтIэ зэфэ­шъхьафхэр ыгъэцэкIагъ, взводым икомандирыгъ, тылымкIэ командирым игодзагъ, джыдэдэм старшэ юрисконсультэу Iоф ешIэ.

Къулыкъум къыфигъэуцугъэ пшъэрылъхэр дэгъоу зэригъэца­кIэхэрэм пае къэралыгъо тынэу медальхэу «За отвагу», «За от­личие в охране обществен-ного порядка» ыкIи ведомст­веннэ тын лъапIэхэр къыфагъэ­шъошагъэх.

— ОМОН-р зызэхащэм апэ ипэщагъэр Бэщыкъо Мэджыд ары. Синасып къыхьи цIыф дэ­гъухэм Iоф адэсшIэнэу хъугъэ. ОМОН-м къулыкъур щыпхьыныр пшъэдэкIыжь зыпылъ Iофэу щыт, цIыфхэм ярэхьатныгъэ къэтыухъумэныр типшъэрылъ. ТиIоф­шIэн къин, арышъ, кIуачIэу пхэ­лъым имызакъоу, психологическэу уфэхьазырын фае. Пхъэшагъэр, лIыблэнагъэр, цIы­фыгъэр, шъыпкъагъэр — джахэр ары сэ сиIэубытыпIэхэр,— еIо Шъоджэ Налбый.

НэкIубгъор зыгъэхьазырыгъэр КIАРЭ Фатим.