Непэ театрэм и Дунэе маф
ИгъэкIотыгъэу хагъэунэфыкIы
Театрэм и Дунэе мафэ фэгъэхьыгъэ зэхэхьэ гъэшIэгъонхэр Адыгэ Республикэм щэкIох. Гъэтхапэм и 25-м къыщыублагъэу хэгъэгу Iофтхьабзэхэм театрэхэр ахэлажьэх.
КIэлэцIыкIухэм апае ыпкIэ хэмылъэу
Урысыем культурэмкIэ игупчэ кIэщакIоу щыт. Гъэтхапэм и 28-м мафэм сыхьатыр 11-м Адыгэ Республикэм и Къэралыгъо филармоние изал цIыкIу шIушIэ къэгъэлъэгъон щызэхащэщт. ЫпкIэ амытэу спектаклэу «Чебурашк ыкIи иныбджэгъухэр» зыфиIорэм искусствэр зышIогъэшIэгъонхэр рагъэплъыщтых.
Нысхъапэхэм ятеатрэу «Дышъэ къошыным» иартистхэр дахэу фэпагъэх. КIэлэцIыкIухэм апае едзыгъохэр узыIэпищэу къагъэлъагъох. ЗэхэщакIохэм искусствэм пыщагъэхэр рагъэблагъэх.
Лъэпкъым ыбзэ къеухъумэ
Республикэм и Лъэпкъ театрэу Цэй Ибрахьимэ ыцIэ зыхьырэм гъэтхапэм и 27-м спектаклэу «Кавказский меловой кругыр» къыгъэлъэгъощт. УрысыбзэкIи адыгабзэкIи заулэрэ ащ теплъыгъ. ГъукIэлI Нурбый адыгабзэкIэ зэридзэкIыжьыгъэм театрэм иныбджэгъухэр ягуапэу еплъыгъэх.
Мурэтэ Чэпай ипьесэу «IэнатIэм игъэрхэр» зыфиIорэм техыгъэу «Ощхым ор еукъэбзы» ыIоу Нэгъой Инвер ыгъэуцугъэр щыIэныгъэм къыхэхыгъ. «Адыгабзэм цIыфхэр фэзэщыгъэх, тиныдэлъфыбзэкIэ спектаклэхэр нахьыбэрэ къагъэлъагъохэ тшIоигъу», — къытаIуагъ спектаклэм еплъыгъэхэм ащыщхэм.
Режиссерэу И. Нэгъоим тыфэраз. Адыгабзэм хэхъоныгъэ ышIыным театрэм Iоф зэрэдишIэрэр спектаклэм къыхэщыгъ.
Лъэпкъ театрэу И. Цэим ыцIэ зыхьырэм ихудожественнэ пащэу ХьакIэгъогъу Къэсэй тыщигъэгъозагъ адыгабзэкIэ тхыгъэ пьесэхэр театрэм къыщагъэлъэгъонхэм фэшI ярепертуар баеу зэрэщытыр, ащ дакIоу кIэу агъэуцущтхэм Iоф адашIэ.
Орэдым уепIу
Камернэ музыкальнэ театрэу Хьанэхъу Адамэ ыцIэ зыхьырэм ихудожественнэ пащэу Сулейманов Юныс тизэдэгущыIэгъу къыщыхигъэщыгъ къэгъэлъэгъонхэм нэбгырабэ зэряплъырэр. Адыгеим икъуаджэхэм ямызакъоу, тигъунэгъу Краснодар краим ирайонхэм къарыкIыгъэхэри спектаклэхэм ащытэлъэгъух.
Гъэтхапэм и 27-м мэфэкI зэхахьэ Камернэ музыкальнэ театрэм щыкIощт. Гъэтхапэм и 29-м «Ослепленные» зыфиIорэр артистхэм къагъэлъэгъощт.
Урыс Къэралыгъо театрэу А. С. Пушкиным ыцIэ зыхьырэм къэгъэлъэгъонхэр щэкIох. МэфэкIым фэгъэхьыгъэ зэхахьэр гъэшIэгъонэу кIуагъэ.
«Щыгъыжъыер» тигунэс
КIэлэцIыкIу зыгъэсапIэу «Щыгъыжъыем» итеатральнэ къэшIынхэр гум лъыIэсыхэу еджакIохэм къагъэлъагъох. Мэфэ заулэкIэ узэкIэIэбэжьмэ, «Щыгъыжъыер» илъэси 10 хъугъэ. Ащ фэгъэхьыгъэ зэхахьэу республикэм и Къэралыгъо филармоние щыкIуагъэм Адыгеим и ЛIышъхьэу КъумпIыл Мурат хэлэжьагъ.
АдыгабзэкIэ едзыгъохэр къашIыгъэх, лъэпкъ шъуашэхэр ащыгъэу къэшъуагъэх. Художественнэ пащэу Уджыхъу Марыет зэхахьэм къыщиIотагъ «Щыгъыжъыем» илъэси 10-м къыкIоцI лъэпсэ пытэ зэришIыгъэр.
2019-рэ илъэсыр театрэм и Илъэс. Адыгабзэм, шэн-хабзэхэм язэгъэшIэн театрэр чанэу зэрэхэлажьэрэр республикэм и ЛIышъхьэу КъумпIыл Мурат зэхахьэхэм къащиIоу бэрэ зэхэтэхы. Бзэр – псэ. Тиныдэлъфыбзэ зэрэбаир фольклорым, ижъырэ адыгэ орэдхэм щыIэныгъэм къыщаушыхьатыгъ.
Къэралыгъо орэдыIо-къэшъокIо ансамблэу «Ислъамыем» типэсэрэ лъэпкъ орэдхэм псэ къапигъэкIэжьыгъ. Художественнэ пащэу, композиторэу Нэхэе Аслъан «Ислъамыем» пае зэригъэфэгъэ произведениехэр дунаим щэIух. Театрэхэмрэ ансамблэхэмрэ зэгъусэхэу лъэпкъ искусствэм фэлажьэх, ныдэлъфыбзэм ибаиныгъэ цIыфхэм алъагъэIэсы.
Театрэм и Илъэс ехьылIэгъэ къэгъэлъэгъонхэр республикэм икъуаджэхэм ащэкIох. Театральнэ едзыгъохэр Теуцожь, Кощхьэблэ, Шэуджэн, Тэхъутэмыкъое, нэмыкI районхэм къащагъэлъагъох. Театрэм и Дунэе мафэ ехьылIэгъэ зэхахьэхэр Адыгэ Республикэм гъэшIэгъонэу щэкIох.
ЕмтIылъ Нурбый. Сурэтхэр къэгъэлъэгъонхэм къащытетхыгъэх.