ЩыIэныгъэр къагъэлъагъо

Адыгэ Республикэм культурэмкIэ и Министерствэ театрэм и Илъэс фэгъэхьыгъэ къэгъэлъэгъоныр гъэшIэгъонэу зэ­хи­щагъ. — Сурэти 190-рэ къэгъэлъэ­гъуапIэм щытлъэгъугъ, — къыщиIуагъ зэIукIэгъум зэлъашIэрэ сурэтышIэу, архитекторэу Бырсыр Абдулахь. — Тыкъэ­зыуцухьэрэ дунаим, бгъэфедэн плъэкIырэ искусствэм, театрэм ищыIэныгъэ, мэкъэгъэIухэм ахэр яхьылIагъэх.

Республикэм исурэт къэгъэлъэгъуапIэ, Адыгэ Республикэм и Лъэпкъ театрэу Цэй Иб­рахьимэ ыцIэ зыхьырэр, Урыс къэралыгъо драматическэ теат­рэу А.С. Пушкиным ыцIэ зы­хьырэр, Камернэ музыкальнэ театрэу Хьанэхъу Адамэ ыцIэ зыхьырэр, Адыгэ къэралыгъо университетыр, искусствэхэмкIэ республикэ колледжэу Тхьабысым Умарэ ыцIэ зыхьырэр зэ­хэщэн Iофыгъохэм ахэлэ­жьагъэх.

— Театрэм Iоф щысшIэнэу синасып къыхьыгъ, — тизэдэ­гущыIэгъу лъегъэкIуатэ Адыгэ Республикэм и Къэралыгъо премие къызыфагъэшъошэгъэ сурэтышIэу Бырсыр Аб­дулахь. — Театрэм щыIэныгъэр IупкIэу къегъэлъагъо. ЦIыф гъэшIэгъоных театрэм Iоф щызышIэхэрэр. Артистхэм зыща­лъэхэрэ щыгъынхэм ащыщхэр къэгъэлъэ­гъоным къырахьылIагъэх.

Адыгэ къэралыгъо универ­ситетым имузыкальнэ къэгъэлъэгъонэу театрэу «Арт-Ритоным» зэхищагъэр Санкт-Петербург щыкIуагъ. СурэтышI Iэпэ­Iасэу Цэй Саидэ иIофшIагъэ осэшIхэм къыхагъэщыгъ.

Лъэпкъ театрэу И. Цэим ыцIэ зыхьырэм спектаклэхэм ащи­гъэфедэхэрэ адыгэ шъуашэхэр лъэгъупхъэх. СурэтышIхэу Бырсыр Абдулахь, ПэтIыощэ Феликс, Тыгъужъ Мыхьамодэ, фэшъхьаф­хэм яIофшIагъэхэр гъэшIэгъоных. Давид Манакьян исурэтхэм узыIэпащэ, щыIэныгъэм къы­хэхыгъэх, лъэгъупхъэх.

ИскусствэхэмкIэ республикэ колледжым илъэсыбэ хъугъэу икIэлэегъаджэх Надежда Тыртышник ыкIи Ацумыжъ Сарыет. Студентхэр ягъусэхэу къэгъэлъэгъоным еплъыхэзэ, зэгъэ­пшэнхэр ашIыгъэх. Анахьэу анаIэ зытырадзагъэр театрэм щыкIохэрэ къэгъэлъэгъонхэм ащыщ едзыгъохэр уахътэм ди­штэхэу зэрэгъэпсыгъэхэр ары.

Театрэм и Дунэе мафэ гъэтхапэм и 27-м игъэкIотыгъэу республикэм щагъэмэфэкIыщт. Зэхахьэхэм артистхэр, сурэтышIхэр, искусствэр зышIогъэшIэгъонхэр ахэлэжьэщтых.

Сахьидэкъо Нурбый. Сурэтхэр къэгъэлъэгъоным къыщытетхыгъэх.