Хасэм хабзэр къыщежьэ
Адыгэр демократическэ зэгъэкIукIэ иIэу псэущтыгъэ. ИжъкIэ къыщегъэжьагъэу хабзэхэр хасэхэм ащаухэсыщтыгъэх. Хасэхэр къызежьагъэр бэдэдэ зэрэшIагъэр нарт эпосым нафэ къытфешIы.
Нартхэм жъы хаси, ны хаси, жъыукI хаси яIагъэу къеIо IорIуатэм. Ары пэпчъ Iофыгъо гъэнэфагъэхэр зэшIуихыщтыгъэх. Жъы хасэм тымрэ къомрэ язэфыщытыкIэ, жъыхэм яукIыжьын зэригъафэщтыгъэ. ЛIы хасэм зэолIхэр зэрэбгъэсэщтхэм, заом укIомэ, пыим узэрезэощтым, уимылъку, уибылым птырахыгъэмэ, ащ къызэребгъэгъэзэжьыщтым ыкIи нэмыкIхэм ащытегущыIэщтыгъэх. Ны хасэр унагъор зэрэзэбгъэкIущтым, зэрэбгъэпытэщтым ыкIи сабыйхэм япIун анахьэу зыпылъыгъэр.
Ны хасэм бзылъфыгъэхэу къекIуалIэщтыгъэхэр ныбжь зиIэхэ, зыгорэ зылъэгъугъэхэу щытыгъэх. ЩыIэныгъэм къыхахыгъэ опытыр ахэм ныбжьыкIэхэм адагощыщтыгъ. Шэн-хабзэхэу ахалъхьэхэрэр ежьхэм ахэлъхэу, ахэм арыпсэухэу щытыгъэх.
Непи нартхэм я Ны хасэ щаухэсыгъэхэ хабзэхэр адыгэхэм агъэфедэх. ГущыIэм пае, зыгорэм имылъку уемынэцIынэу, уимые ущымыгугъынэу, ощ нахь кIочIаджэм уемыбэнынэу ыкIи нэмыкIхэр.
Ны хасэм унашъохэу ышIыхэрэр орэдым хьалъхьэхэти, орэдыIо-тхыдэIуатэхэм къарагъаIощтыгъэх. Джащ тетэу унашъохэр агъэпытэщтыгъэх.
Хасэр зэхэсын зыхъукIэ гъоу агъаджэщтыгъ, шыуаджэ агъакIощтыгъ. Ахэм адыгэхэр зэрысхэ чIыпIэхэр къакIухьэщтыгъэх. «Мыщ фэдэ мафэм, мыщ фэдэ чIыпIэм шъукъекIуалI. Гъомылэ къыздашъушт» аIоти, араIощтыгъ. Чылагъо пэпчъ цIыф Iуш, цIыф акъылышIо, цIыф гупкIэ къызхигъэкIыти, хасэм къыгъакIощтыгъ. Хасэр мази, тIуи, щи зэхэсэу хъущтыгъ. Лъэпкъыр зэрыпсэущт хабзэхэр ащ къыщыхахыщтыгъэх. Уахътэ тешIэмэ, хабзэхэу жъы хъугъэхэр дэгъэзыжьыгъэнхэм, чIэунэ мыхъущтхэм, щыIэныгъэм хэбзакIэу къыздихьыгъэм арыгущыIэщтыгъэх. Жъы хъугъэхэу федэ къэзымыхьыжьыхэрэр щагъэзыехэти, кIэхэр аштэщтыгъэх.
Хасэр зытегущыIэщтыгъэхэм ащыщых Iашэм иIыгъыкIэ, лъыуасэр, лъышIэжъ Iофхэр, тыгъур, нэчыхьэр, хьыкумыр, гъунапкъэхэм якъэгъэгъунэн, нэмыкIхэр.
ИуахътэкIэ тэ нахь къытпэблагъэхэ хасэхэу зигугъу къэтшIыщтхэр ХыIушъо Шапсыгъэм щашIыгъагъэхэ хасэхэр арых.
IорIуатэм къызэриIорэмкIэ, Атэкъэ псынэкIэ заджэхэрэ чIыпIэм шапсыгъэхэм хасэ щызэхащэгъагъ. Ащ шапсыгъэхэмрэ абдзахэхэмрэ хэлэжьагъэх. Бжъэдыгъухэми къафаIопщыгъ, хасэм рагъэблэгъагъэх, ау тетыгъор зыIыгъхэм ар адагъэп. Зы нэбгыри агъэкIуагъэп. Шапсыгъэу пщырэ пщылIырэ зимыIэхэм адэжь лэжьакIохэр агъэкIонхэу бжъэдыгъупщхэр фэягъэхэп. Илъэсибгъу зытешIэ нэужым ятIонэрэ хасэр ХьаплъкIэ еджэхэу станицэу Холмскэм дэжь щашIыгъ, ау джыри бжъэдыгъухэр къэкIуагъэхэп. Илъэс заулэ зытешIэм ящэнэрэу бжъэдыгъухэмрэ шапсыгъэхэмрэ ягъунапкъэ шапсыгъэхэм хасэ щашIыгъ, ау ящэнэрэуи бжъэдыгъухэр къекIолIагъэхэп.
Аужырэ хасэу шапсыгъэхэм ашIыгъагъэм Хьэуц хасэкIэ еджагъэх. Мэзихэ хасэр зэхэсыгъ. Бжьыхьэм зэхэтIысхьэхи, гъатхэм хьэуцэу къэкIыгъэм хэсхэу зэфэхьысыжьхэр, унашъохэр ашIыхи, хабзэхэр аштэхи зэхэкIыжьыгъэх. Джары ащ Хьэуц хасэкIэ зыкIеджагъэхэр.
ЩыIэныгъэр зы чIыпIэ итырэп, зэхъокIыныгъэхэр къызыдехьых. Ащ къыхэкIэу шэн-хабзэхэу шапсыгъэ обществэм хэлъхэми зэхъокIыныгъэхэр афэхъущтыгъэх. Общественнэ-политическэ строим, экономическэ щыIакIэм, хъугъэ-шIэгъэ инэу обществэм хэхъухьэхэрэ-хэшIыхьэхэрэм шэн-хабзэхэри зэблахъущтыгъэх. Зы хабзэхэр кIодыжьыщтыгъэх, зэхъокIыныгъэ фэмыхъоу, зытетым тетэу къэнэжьи къахэкIыщтыгъ, кIэхэри къэхъущтыгъэх. А зэпстэур зэзыгъафэщтыгъэр хасэр ары. Шапсыгъэхэм я XVIII — XIX-рэ лIэшIэгъухэм гъогогъуитфэ хасэр зэхащэгъагъэу ары къызэраIорэр. Тэ зигугъу къэтшIыгъэр нахь зикъэбар тшIэрэр ары. Хьэуц хасэр ары аужырэу щыIагъэр.
Хасэм щытегущыIагъэх яхэгъэгу хабзэу илъын фаем.
Апэрэ упчIэу щытыгъэр лIыр укIыгъэ е уIагъэ хъумэ, цIыфхэм мыхъун къяхъулIэмэ, мыхъо-мышIэ горэ яобществэ хэхъухьагъэмэ, зыгорэ мытэрэзэу зекIуагъэмэ зэрадэпсэущтхэр ары. ГущыIэм пае, лIы зыукIырэр чэм шъэныкъокIэ агъэпщынэнэу унашъо ашIыгъ.
Зэгъунэгъухэм зэфыщытыкIэу зэфыряIэщтым фырикъужьэу, чIыгоу аубытырэм, чэоу къашIыхьащтым анэсыжьэу атегущыIагъэх. ЦIыфым зыкъызэриухъумэжьыщт шIыкIэм, шъобжэу къырахын алъэкIыщтым чэщ-мэфиблэ тегущыIагъэх.
Хасэу мэзихэ зэхэсыгъэм щаIуагъэхэр цIыфхэм зэкIэмэ анэсыжьын фаети, «хэта къэзыIотэжьыщтыр?» заIом, Хьасанэкъо Бязрыкъо сохътэм «къэсIотэжьын» ыIогъагъ.
Непи адыгэхэм хасэхэр яIэх. Краснодар краим иобщественнэ организациеу «Общество «Адыгэ Хасэ» Причерноморских адыгов-шапсугов» зыфиIорэр 1989-рэ илъэсым мэлылъфэгъу мазэм зэхащагъ. Ащ адыгэу Шъачэрэ ТIопсэ районымрэ ащыпсэухэрэр зэрепхых. Хасэр поселкэу ПсышIуапэ (Лазаревскэм) дэт. Апэрэ тхьаматэу ащ ТIэшъу Мурдинэ иIагъ. Непэ хасэм итхьаматэр КIакIыхъу Мэджыд.
IэкIыб адыгэхэми хасэхэр яIагъэх ыкIи яIэх. ГущыIэм пае, Черкес зыкIыныгъэ-зэдеIэжь хасэ 1908-рэ илъэсым Осмэн хэгъэгур реформакIэм зытехьэм Стамбул щызэхащагъ.
Черкес бзылъфыгъэ шIушIэ хасэр Мэт Иззэт игукъэкIкIэ ыкIи иIэпыIэгъукIэ 1918-рэ илъэсым иIоныгъо мазэ Стамбул щызэхащагъ. Тхьаматэр Хъунджэ Хьэйрие Мелеч, купым хэтыгъэх Бэрзэдж Макъбулэ, Дзэлыкъо Эминэ, Пэхъу Сеза ыкIи Фаика Ханум.
ЗэрэхъурэмкIэ, адыгэхэр тыдэ зыщэIэхи зэрыпсэущтыгъэхэ хабзэхэр хасэхэм, зэфэсхэм ащаухэсыщтыгъэх. «Хасэм ыIорэр хабзэ, хабзэм ыIорэр Iуагъэ», еIо адыгэ гущыIэжъым. Зэфэсыр е хасэр щыIэн зыхъукIэ гъоу агъаджэщтыгъэ. Адыгэхэр зэрысхэ чIыпIэхэр къакIухьэщтыгъэх ыкIи «Мыщ фэдэ мафэм, мыщ фэдэ чIыпIэм зэфэс е хасэ щыIэщтышъ, шъукъекIуалI, гъомылэ къызыдашъушт», — аIощтыгъ.
Чылагъо пэпчъ цIыф Iушэу, къаIорэр къэзыIотэжьын зылъэкIынэу губзыгъэу дэсыр зэфэсым агъакIощтыгъэ. Хасэхэр, зэфэсыр мэзэ зытIущэ зэхэсэуи хъущтыгъэ. Лъэпкъыр зэрыпсэун, зэрылэжьэн шэн-хабзэхэр теурыкIоу къыхахыщтыгъэхэп. Iофыгъошхоу адыгэ обществэм зао къэхъущтмэ, гъаблэм ищынагъо къашъхьарыхьагъэмэ, дин зэблэхъу къэхъугъэмэ, цIыфхэр зэрэзекIощтхэмкIэ хабзэхэр къыхэхыгъэнхэ, унашъохэр шIыгъэнхэ фэягъэ.
ЩыIэныгъэр зы чIыпIэ итырэп, уахътэми цIыфхэми захъожьы. Обществэр зэрылэжьэрэ ыкIи зэрыпсэурэ шапхъэхэри зэхъокIых. Зыхэм зэхъокIыныгъэ горэхэр яIэхэу лIэшIэгъухэр къызэпачыхэшъ, щыIэкIакIэм къыхахьэх, ятIонэрэхэр мэкIодыжьыпэх. ЩыIэкIэжъым зыдехьыжьых. КIэхэри къэхъух тIуагъэ, ау сыдигъокIи мыкIодыжьэу, зэблэмыхъоу, ухэIэзыхьан умылъэкIынэу щыт хабзэхэри щыIэх. Ащ фэдэх ны-тыхэм ясабыйхэр апIун, алэжьыныр; ны-тэу жъы хъухэрэр ялъфыгъэхэм аIыгъыжьынхэр, яжъышъхьэ агъэдэхэжьын, ядунай нэф заухыкIэ, дахэу апкъышъол чIым рагъэкIужьыныр ыкIи нэмыкIхэр.
Непи адыгэхэм хасэхэр, хэсашъхьэхэр, хэсэ тхьаматэхэр тиIэх, зэфэсхэр ашIых. Адыгэу дунаим тетхэм яIорэ яшIэрэ зэхэлъэу адыгэ Iофхэм зэфэс инэу хасэхэм зэхащэхэрэм ащытегущыIэх. Бзэм, шэн-хабзэхэм агъэгумэкIых. Ау илъэсым зэ Дунэе адыгэ зэфэс ошIыкIэ, адыгэ алфавитым изытет, ащ буквэ пчъагъэу хэтыр бгъэкIэкIыным уапэлъыкIэ адыгэ шэн дэйхэр дэбгъэзынхэшъ, шэн-хэбзэ дэгъухэу щыIагъэхэм къябгъэгъэзэжьын, хэбзэ дэгъухэр кIэу къэпштэнхэ плъэкIыщта? Сэ сишIошIыкIэ, плъэкIыщтэп. Адэ сыда шIэгъэн фаер? ЗэкIэ ышIэу зи щыIэп, сэри сшIэрэп, ау шIошIэу сиIэхэр къасIохэ сшIоигъу. Ахэр мыщ фэдэх.
1. Чылэ хасэхэр зэхэщэгъэнхэр.
2. Хасэхэм нахьыпэм мэхьанэу яIагъэм къегъэгъэзэжьыгъэныр: ныбжьыкIэхэм япIункIэ яшIуагъэ къэкIоныр мыхъо-мышIэ зышIэрэр аумысыныр, пшъэдэкIыжь рагъэхьыныр; мытэрэзэу зекIохэрэ кIалэхэм янэ-ятэхэми пшъэдэкIыжь яIэныр; тыгъуагъэр, пшъашъэм ебэныгъэр, лIыжъ-ныожъхэм мыхъунэу адэзекIохэрэр чIамыукъуащэу, хъуш-сыш амышIыжьэу пшъэдэкIыжь арагъэхьынэу.
3. Ны хасэхэри зэхэщэжьыгъэнхэр. Бзылъфыгъэ хэкIотагъэхэр, щыIэныгъэм, щыIакIэм, унэгъо зэгъэкIукIэм, сабый пIукIэм фэнэIуасэхэм ныбжьыкIэхэр агъэсэнхэу, агъэдэIонхэу апшъэ ралъхьанэу. Пшъэшъэ ныбжьыкIэхэр зэрэзекIонхэ фаехэр, унагъо ихьэхэмэ зэрыхьэгъэхэ унагъом зызэрэрагъэкIущтыр; сабый къафэхъумэ зэрапIущтыр; хъулъфыгъэу шъхьэгъусэ къафэхъугъэм шъхьэкIафэу рахыщтыр; пщэрыхьаным фэIазэ зэрэфэхъунхэ фаер ыкIи нэмыкIхэр арагъэшIэнхэу. НыбжьыкIэ хасэхэр чылэхэм къащызэIуахынхэр. Ахэм пшъэрылъэу афэшIыгъэн фаехэр гъэнэфэгъэнхэр.
4. Непэ еджапIэм, хасэм, кIэлэцIыкIу IыгъыпIэм япшъэрылъ бзэм зегъэужьыжьыгъэныр, адыгэ шэн-хабзэхэр къэIэтыжьыгъэнхэр, ау ахэмкIэ а Iофыгъохэр зэшIопхынхэ плъэкIыщта? ПлъэкIыщтэп. ЗэкIэ къызыщежьэрэри зыщиухыжьырэри унагъор ары.
Адэ унагъо пэпчъ адыгабзэ илъа? Адыгабзэр унагъом исхэм агъэфеда? Хьау! Унагъохэм адыгэ шэн-зэхэтыкIэхэр арылъха? Хьау! Унэгъошъхьэ пэпчъэу адыгагъи адыгабзи арылъыжьэп сIорэп, ау, щэч хэмылъэу, унагъохэм янахьыбэм бзэри хабзэри ащыкIосагъэх.
Непэрэ сабыйхэм янэ-ятэхэм адыгабзэ къаIуалъхьэрэп. Ежьхэм амышIэрэр аIуалъхьана? Ари гъэшIэгъоны, ау нахь гъэшIэгъоныжьыр янэжъ-ятэжъхэми абзи яхабзи Iэпэдэлэл зэрашIыгъэр ары. Адэ сыда тшIэмэ хъущтыр?
Сэ сишIошIыкIэ, я 60 — 70-рэ илъэсхэм ны-ты ныбжьыкIэхэм апае щыIэгъэ университетхэр зэхэщэжьыгъэхэу, программэ зэхэгъэуцуагъэу, илъэсым къыкIоцI бзэм, хабзэм, шэн-зэхэтыкIэм алъэныкъокIэ арагъэшIэщтыр гъэунэфыгъэу Iоф адашIэмэ ишIуагъэ къэкIощт. Ащ хасэр лъыплъэн фае.
5. Адыгэ лъэпкъыр анахь ныбжь зиIэ цIыф лъэпкъхэм зэращыщыр; щыIэныгъэ гъогу кIыхьэ къызэрикIугъэр; хъугъэ-шIэгъабэ ищыIэныгъэ къызэрэхэхъухьагъэр; адыгэхэр яшэн-хабзэхэмкIэ, лIыгъэу ахэлъымкIэ, адыгэ бзылъфыгъэм идэхагъэкIэ зэрэдунаеу зэрэзэлъашIагъэхэр; дин лъэпкъ зэфэшъхьафэу зэрылэжьагъэхэр, якультурэ, ядунэететыкIэ, ягупшысакIэ къизыIотыкIырэ тхыгъэу, Iогъэ-шIагъэхэу щыIэхэм ныбжьыкIэхэр ащыгъэгъозэгъэнхэр (радиор, телевидениер, гъэзетхэр IэпыIэгъу дэгъу хъущтых).
6. ЩысэтехыпIэ хъунэу лъэпкъым къыхэкIыгъэхэ цIыфхэм яхьылIэгъэ тхылъхэр тхыгъэнхэр.
7. Итэкъухьагъэу зэфэшъхьаф тхылъхэм адыгэхэм шIоу, дахэу, IэкIыбым къикIэу къахэхьэгъэ зекIолIхэм, шIэныгъэлэжьхэм, тхакIохэм, урыс офицерхэм аIуагъэхэр урысыбзэкIэ ыкIи адыгабзэкIэ зэдзэкIыгъэхэу тхылъ шъхьафэу къыдэгъэкIыгъэныр; дунэе зэошхоу лIэшIэгъу зэфэшъхьафхэм ащыIагъэхэм адыгэхэу ахэлэжьагъэхэм ацIэ ыкIи къэбарэу апылъыр къызыщыраIотыкIыхэрэ тхылъхэр къыдагъэкIынхэу.
ЗэкIэрыпчынхэ плъэкIыщтэп бзэмрэ хабзэмрэ. Бзэр зымышIэрэм хабзэри ышIэрэп. Хабзэр зымышIэу, хабзэм рымылажьэрэм бзэри ищыкIагъэп. Адыгэ гущыIэжъым еIо: «Зыбзэ зышIокIодырэм янэ шIокIодыгъ». Ащ зи хэпIухьан плъэкIынэп. ЗэрэхъурэмкIэ, бзэмрэ хабзэмрэ лъэпкъым ынапэх. Хабзэр хасэм къыщежьэ.
ГухэкI нахь мышIэми, непэ «тихабзэхэмрэ тыбзэрэ тIэкIэкIых, гумэкIыгъо чIыпIэ тит» тэIо, ау гугъапIи тиI ахэр дгъэфедэнхэуи, Iоф адэтшIэнэуи, тилIэужхэри рыпсэунхэу ыкIи рылэжьэнхэу къафэдгъэнэнэу. Сыда зыпIокIэ, тиIэшъхьэтетхэр, республикэм и лIышъхьэу КъумпIыл Мурат апэ зэритэу, шIэныгъэлэжьхэр, Адыгэ хасэр, общественностыр — зэкIэ а Iофыгъошхом егъэгумэкIых.
Цуекъо Нэфсэт. Филологие шIэныгъэхэмкIэ доктор.