Мыекъуапэ иадминистрацие волейболымкIэ и Кубок къыдэхыгъэным бзылъфыгъэ команди 4 фэбэнагъ.

— Къалэм волейболымкIэ изэнэкъокъу апэрэ чIыпIи 4-р къыщыдэзыхыгъэхэ командэхэр арых Кубокым фэгъэхьыгъэхэ зэIукIэгъухэм ахэлэжьагъэхэр, — къытиIуагъ Мыекъуапэ иадминистрацие физкультурэмкIэ ыкIи спортымкIэ и Комитет ипащэу Дмитрий Щербаневым. — Мэ­къуогъу мазэм ехъулIэу хъулъфыгъэ командэхэри Кубокым фэбэнэщтых.

Спорт еджа­пIэу Джэнчэтэ СултIан ыцIэ зыхьырэм ибзылъфыгъэ командэ ящэнэрэ чIыпIэр къыди­хыгъ. МГТУ-р ПФР-м 3:2-у текIуи, апэрэ чIыпIэр фа­гъэшъошагъ.

ЕшIэгъухэр гъэшIэгъонэу кIуагъэх. Адыгэ Республи­кэм волейболымкIэ и Федерацие ипрезидентэу Андрей Шопиныр, Дмитрий Щербаневыр хагъэунэфыкIырэ чIыпIэхэр къыдэзыхыгъэхэм афэгушIуагъэх, шIухьафтынхэр аратыжьыгъэх.

Сурэтхэм арытхэр: волейбол зэдешIэх; Д. Щербаневыр Кубокыр къыдэзыхыгъэ МГТУ-м икапитанэу Анастасия Ховроньчевам фэгушIо.

ЕМТIЫЛЪ Нурбый.