Тидокторхэм къахэхъуагъ
Адыгабзэм фэщагъэу, хэшIыкI фызиIэу, зисэнэхьат зыгъэлъапIэу, зиIофшIэн шIу зылъэгъурэмэ ащыщ Биданэкъо Марзият.
Биданэкъо Марзият Мухьдинэ ыпхъур бэдзэогъум и 5-м, 1967-рэ илъэсым къуаджэу Гъобэкъуае къыщыхъугъ. 1984-рэ илъэсым гурыт еджапIэр къыухыгъ. А илъэс дэдэм Адыгэ къэралыгъо кIэлэегъэджэ институтым филологиемкIэ ифакультет чIэхьагъ. Дэгъу дэдэу еджэрэ студентхэм ар ащыщыгъ. Ащ иеджэгъу илъэсхэр ары адыгабзэм идэлэжьэн зыригъэжьагъэр. Усэ ыкIи пшысэ цIыкIухэр зэхилъхьэщтыгъэх.
1989-рэ илъэсым Марзият институтыр дэгъоу къыухыгъ, адыгабзэмрэ урысыбзэмрэкIэ кIэлэегъэджэ сэнэхьатыр зэригъэгъотыгъ. 1989-рэ илъэсым гурыт еджапIэм кIэлэегъаджэу щылэжьэнэу регъажьэ. Ащ илъэситфырэ Iоф щишIагъэу 1994-рэ илъэсым кIэлэегъаджэхэм ясэнэхьат зыщыхагъэхъорэ институтым иадыгэ кафедрэ Iоф щишIэнэу рагъэблагъэ. 1995-рэ илъэсым аспирантурэм чIахьэ ыкIи ар заочнэу къеухы.Iофэу ышIэрэм ыкIи Iофыгъоу къэтэджыхэрэм яджэуапхэм алъыхъузэ, кандидатскэ диссертацием итхын къыфэкIо. 2004-рэ илъэсым кандидатскэ диссертациеу «Становление норм адыгейского литературного языка» зыфиIорэр Къэбэртэе-Бэлъкъар къэралыгъо университетэу Бэрбэч ХьэтIутIэ ыцIэкIэ щытым къыщиушыхьатыгъ. Ащ ыуж иIофшIэн лъегъэкIуатэ, ушэтынхэр ешIых. ЗэрэшIэныгъэлэжьым имызакъоу, Марзият цIыф хьалэл, ныбджэгъу шъыпкъ, шъхьэгъусэ дэгъу, ны гукIэгъу, нэнэ ныбжьыкI.
Биданэкъо Марзият 2008-рэ илъэсым щегъэжьагъэу гуманитар ушэтынхэмкIэ Адыгэ республикэ институтэу КIэрэщэ Тембот ыцIэкIэ щытым бзэмкIэ иотдел щылэжьэнэу регъажьэ. ШIэныгъэлэжь ныбжьыкIэм зэпымыоу иIофшIагъэхэр дунэе, всероссийскэ ыкIи чIыпIэ конференциехэм къащыхилъхьагъэх, нэIуасэ афишIыгъэх. 2019-рэ илъэсым институтым ипащэ игуадзэу агъэнэфагъ.
Институтым зыщылэжьэрэ илъэсхэм Марзият икъэлэмыпэ къыпыкIыгъэх IофшIэгъэ инхэу «Адыгейский литературный язык» (2014), «Исторические и социально-культурные аспекты языковых процессов» (2018) зыфиIохэрэр, проектэу «Адыгейский язык за 30 дней» зыфиIорэм игъэхьазырын 2018-рэ илъэсым ыухыгъ, научнэ статья 60-м ехъу чIыпIэ зэфэшъхьафхэм къащыдигъэкIыгъ. Марзият иIофшIагъэхэм ащыгъозэ шIэныгъэлэжьхэм ахэм осэшхо къафашIыгъ.Биданэкъо Марзият игъэхъэгъэ анахь инхэм ащыщ докторскэ диссертациеу «Языковая оформленность отечественного художественного текста (на примере прозы Хазрета Ашинова)» зыфиIоу бэдзэогъум и 4-м, 2018-рэ илъэсым Дагъыстан къыщиушыхьатыгъэр. А IофшIагъэр Москва Апшъэрэ аттестационнэ комиссием щыпхырыкIыгъ ыкIи филологие шIэныгъэхэмкIэ доктор цIэр къыфагъэшъошагъ. Ар къэзыушыхьатырэ тхылъри гъэтхапэм и 14-м къыратыжьыгъ. Ащ ехъулIэу тыгу къыддеIэу Марзият тыфэгушIо. Псауныгъэ пытэ иIэнэу, игъашIэ кIыхьэ хъунэу, иунагъо узынчъагъэр илъ зэпытынэу, игъэхъагъэхэм ахигъахъоу, илъэпкъ фэлажьэу илъэсыбэрэ псэунэу тыфэлъаIо.
Гуманитар ушэтынхэмкIэ Адыгэ республикэ институтэу КIэрэщэ Тембот ыцIэкIэ щытым бзэмкIэ иотдел ишIэныгъэлэжьхэр.