Фильмым еплъынхэ алъэкIыщт
Мыекъуапэ щыщхэми, ащ ихьакIэхэми короткометражнэ фильмэу «Испун» зыфиIоу тиреспубликэ щытырахыгъэм апэрэу еплъынхэ алъэкIыщт. «В фокусе – регион» зыцIэ программэм къыдыхэлъытагъэу я III-рэ Дунэе фестивалэу SIFFA-2018 зыфиIорэм мы фильмыр хэлэжьагъ.
Мистическэ драмэу «Испун» зыфиIорэм ирежиссерыр Н. С. Михалковым ирежиссерскэ мастерской Академие къэзыухыгъэ Оксана Белоусовар ары. Мыекъуапэ щыпсэухэрэр фильмым еплъынхэ зэралъэкIыщтым имызакъоу, авторми дэгущыIэнхэу амал яIэщт.
КультурэмкIэ къэлэ гъэIорышIапIэр кIэщакIо зэрэфэхъугъэм тетэу гъэтхапэм и 26-м культурэмкIэ Унэу «Гигантым» ар къыщагъэлъэгъощт. Къэлэ администрацием ипресс-къулыкъу къызэритыгъэмкIэ, Iофтхьабзэр сыхьатыр 18.00-м рагъэжьэщт, ыпкIэ хэмылъэу ащ еплъынхэ алъэкIыщт.