Хъярым гугъэр еIэты
Адыгэ ИлъэсыкIэм игъэмэфэкIын фэгъэхьыгъэ зэхахьэр ЗыкIыныгъэмрэ ЗэгурыIоныгъэмрэ ясаугъэтэу республикэм и Къэралыгъо филармоние дэжь щытым гъэтхапэм и 21-м игъэкIотыгъэу щыкIуагъ.
МэфэкI шъуашэ иIэу пчэгур агъэкIэрэкIагъ. Адыгэ Республикэм культурэмкIэ и Министерствэрэ республикэм лъэпкъ культурэмкIэ и Гупчэрэ зэхащэгъэ мэфэкI Iофтхьабзэм Правительствэм, Парламентым якъулыкъушIэхэр, Адыгеим иобщественнэ движениехэм, тирайонхэм, IэкIыб къэралыгъохэм, лъэпкъ зэфэшъхьафхэм ялIыкIохэр, шIэжьыр зыгъэлъапIэхэрэр, кIэлэцIыкIухэмрэ ныбжьыкIэхэмрэ хэлэжьагъэх.
Адыгэ Республикэм иансамблэхэм, орэдыIохэм, лъэпкъым иIэпэIасэхэм мэфэкIыр къагъэдэхагъ. Пчэгум къыщызэIуахыгъэ къэгъэлъэгъоным ПIатIыкъо Айдэмыр, Хъуажъ Даутэ, ШъхьакIэмыкъо Фатимэ, Сет Сафыет, Цурмыт Рузанэ, Агъыржьэнэкъо Анжелэ, Гостэкъо Руслъан, фэшъхьафхэм ялъэпкъ Iэпэщысэхэр къагъэлъэгъуагъэх.
ШыкIэпщынэм, лъэпкъ тамыгъэхэм якъэбархэм ПIатIыкъо Айдэмыр къатегущыIагъ. Гумэ Ларисэрэ Абрэдж Гощэфыжьрэ пшъашъэхэр хъэным фэгъэхьыгъэ Iофыгъохэм ащагъэгъозагъэх. Уджыхъу Вячеслав пхъэм хэпшIыкIын плъэкIыщт Iэмэ-псымэхэр, унагъом ищыкIэгъэ пкъыгъохэр кIэлэеджакIохэм аригъэлъэгъугъ.
— ЦIыфым ылъэгъурэр шIогъэшIэгъон зыхъукIэ, къыфэпIуатэрэр нахьышIоу къыгурэIо, — ягупшысэхэр къаIуатэ Гумэ Ларисэ, Гостэкъо Руслъан, Уджыхъу Вячеслав. — Адыгэхэм яискусствэ урысхэр, къэндзалхэр, ермэлхэр, фэшъхьафхэри къыкIэупчIэх. Республикэм щызэдэпсэухэрэ лъэпкъхэр адыгэхэм я ИлъэсыкIэ зэфищагъэх, гушIуагъор зэдагощы.
КъафэгушIуагъ
Республикэм и Парламент и Тхьаматэу Владимир Нарожнэр ти ЛIышъхьэу КъумпIыл Мурат ыцIэкIэ мэфэкIым хэлажьэхэрэм къафэгушIуагъ. Адыгэхэм ижъырэ лъэхъаным къыщыублагъэу шэн-хабзэу яIагъэхэр лIэшIэгъухэм ахэкIуакIэхэрэп. ИлъэсыкIэм пэгъокIыхэзэ, лъэпкъ культурэм ибаиныгъэ къагъэлъагъо.
— Лъэпкъ пшIы пчъагъэ зэгурыIохэу непэ Адыгеим щызэдэпсэух. ИлъэсыкIэр дгъэмэфэкIы зыхъукIэ, лъэпкъэу республикэм исхэр зэIукIэнхэр шэнышIу тфэхъугъ, — къыIуагъ Владимир Нарожнэм.
Иорданием илIыкIоу Урысыем щыIэ Амджад Оде Адайле адыгэхэм я ИлъэсыкIэ фэгъэхьыгъэ мэфэкIым зэрэщыIэр В. Нарожнэм къызеIом, хьэкIэ лъапIэм Iэгу фытеуагъэх, гущыIэгъу нэбгырэ пчъагъэ фэхъугъ.
Адыгеимрэ Иорданиемрэ культурэм, щыIэныгъэм язэфыщытыкIэхэр щыпытэнхэм фэшI зэIукIэгъухэр тиреспубликэ щыкIуагъэх.
МэфэкIыр лъэкIуатэ. Адыгэ шхыныгъохэр, нахьыбэу щэламэр, лъэпкъ шъуашэхэр зыщыгъ ныбжьыкIэхэм пчэгум къырахьэх, мэфэкIым къеблэгъагъэхэр гъомылапхъэм хагъэIабэх. Тэтэжъ жэкIэфым мэшIоустхъур лъагэу ыIэтызэ пчэгум къехьэ, сэе фыжьыр зыщыгъ пшъашъэр ащ игъус.
— ИлъэсыкIэ хъяр техьащтхэм ащыщ зэкIэхэми Тхьэм тешI, — къыIуагъ Тэтэжъ жэкIэфым.
Пчыхьэзэхахьэр зэращагъ артистхэу Бэгъ Алкъэс, Хьакъуй Андзаур, «Адыгэ пшъашъ» зыфиIорэ зэнэкъокъоу республикэм щыкIуагъэм шIухьафтын шъхьаIэр къыщыдэзыхыгъэ Нащ Эммэ.
Шэн-хабзэхэр
Лъэпкъ шэн-хабзэхэм адиштэрэ Iофыгъохэр зэхахьэм щызэрахьагъэх. Нахьыпэрэм фэдэу хьамышхунтIэ чъыгыр агъэкIэрэкIагъ, лIакъохэм ятамыгъэхэр къыщагъэлъагъох. Тэтэжъ мэшIо фабэу пчэгум къырихьагъэр зэрэблэрэр кIэлэцIыкIухэм ашIогъэшIэгъон. Чъыгэу къэнэфырэм ыпашъхьэ концертыр щылъагъэкIуатэ.
КъэшъокIо ансамблэу «Налмэсыр», къэшъокIо купхэу «Абрекхэр», «Мыекъуапэ инэфылъэхэр», «Майкопчанкэр», «Зэрдахэр» ермэл лъэпкъ ансамблэу «Еразанкыр», нэмыкIхэри мэуджых.
Республикэм иорэдыIо-къэшъокIо ансамблэу «Ислъамыем» иорэдыIоу Нэгъой Азэ, Адыгеим инароднэ артистэу, пщынаоу Мышъэ Андзаур мэфэкI концертыр лъагъэкIуатэ.
Къэндзал обществэу «Дуслыкым» хэтэу Галия Ульмасовам иныдэлъфыбзэкIэ орэд къыIуагъ. Талъэкъо Заирэ ипщынэ макъи тедэIугъ. ОрэдыIохэу Кушъэкъо Симэ, Дзыбэ Мыхьамэт, Лъэчэ Альберт, Сихъу Темыркъан, Лъэцэр Римэ, нэмыкIхэм мэфэкI зэхахьэр къагъэдэхагъ.
Республикэм иобщественнэ движениехэм ялIыкIохэу ЛIымыщэкъо Рэмэзан, Александр Даниловыр, Алям Ильясовыр, Габил Ризаевыр, фэшъхьафхэри пчыхьэзэхахьэм къыщыгущыIагъэх.
Адыгэ джэгу
МэфэкIыр адыгэ джэгукIэ аухыгъ. Анахь дэгъоу къэшъуагъэхэм Адыгэ Хасэм ыцIэкIэ ЛIымыщэкъо Рэмэзанрэ Болэкъо Аслъанрэ афэгушIуагъэх. Бгъуашэ Заремэ, Къулэ Альбинэ, Мэт Жаннэ пшъэшъэ къэшъуакIохэм якуп апэрэ чIыпIэхэр къыщыдахыгъэх. Пщыжъ Джэнэт гум рихьэу къэшъуагъ, ащ дакIоу, «Анахь дах» зыфиIорэ шIухьафтыныр фагъэшъошагъ.
Лъэпкъхэр зэфэзыщэгъэ мэфэкIыр гум шIукIэ къинэжьыщт.
Сурэтыр зэхахьэм къыщытетхыгъ.
ЕМТIЫЛЪ Нурбый.