«Тилъэхъан илIыхъужъ» къагъэлъагъо
Къэралыгъо академическэ театрэу Моссоветым ыцIэ зыхьырэм режиссерэу Ю. Ереминым ыгъэуцугъэ спектаклэр апэрэу къыщагъэлъэгъуагъ.
Михаил Лермонтовым ироманэу «Тилъэхъан илIыхъужъ» («Герой нашего времени») зыфиIорэм техыгъэ къэгъэлъэгъоныр агъэуцуным фэшI Кукэнэ Бэллэ упчIэжьэгъу ашIынэу зэхэщакIохэм рагъэблэгъагъ.
— Дунаим щызэлъашIэрэ тхакIом ироман лъапсэ зыфэхъугъэ къэгъэлъэгъоныр театрэ цIэрыIом щагъэуцуным сызэрэхэлажьэрэр сэрыкIэ гушIуагъоу щытыгъ, — къытиIуагъ Кукэнэ Бэллэ. — Ащ дакIоу, пшъэрылъ ин къызэрэсфашIыгъэр къыдэслъытэзэ, зэгъэпшэнхэр сшIыгъэх.
Театрэм иартистхэм, режиссерэу Ю. Ереминым нахь благъэу нэIуасэ афэхъугъэ Кукэнэ Бэллэ къызэриIорэмкIэ, спектаклэр агъэуцузэ, адыгэхэм яшэн-хабзэхэм, тарихъ гъогоу къакIугъэм, лъэпкъым икультурэ, иискусствэ артистхэр къакIэупчIагъэх. Ролэу нэбгырэ пэпчъ къышIырэр нахь къыпкъырыхьаным фэшI тикъашъохэр, музыкэр ашIогъэшIэгъон.
Адыгэ шъуашэм и Мафэ Адыгэ Республикэм апэу щыхагъэунэфыкIи, дунаим щагъэмэфэкIэу зэраублагъэри Б. Куканэм артистхэм къафиIотагъ. Къашъохэр агъэуцунхэу зыфежьэхэм, Адыгэ Республикэм илIыкIоу Урысые Федерацием и Президент дэжь ренэу щыIэр Къэбэртэе Эммэрэ Кукэнэ Бэллэрэ упчIэжьэгъу зэфэхъугъэх. Къашъохэр ыгъэуцунхэу Батыр Михаил къыхахыгъ.
Дунэе фестиваль-зэнэкъокъоу «Адыгэ пшъашъ» зыфиIоу апэрэу Мыекъуапэ щыкIуагъэм шIухьафтын шъхьаIэр къыщыдэзыхи, дышъэ паIор зыфагъэшъошэгъэ Кукэнэ Бэллэ лъэпкъ Iофыгъохэм ягъэцэкIэн чанэу хэлажьэ. Адыгэхэр дунаим нахьышIоу щашIэнхэм иIахь хелъхьэ. Опсэу, Бэлл! УишIушIагъэ Тхьэм къыуегъэтэжь. Культурэмрэ искусствэмрэ зыщагъэлъапIэхэрэ адыгэ унагъом ущапIугъ. Адыгэхэм яилъэсыкIэ гушIуагъоу къыпфихьырэм уигъэгушхонэу, уимурадхэр къыбдэхъунхэу тыпфэлъаIо.