Хырыхыхьэ зэIукIэгъухэр

«Динамо-МГТУ» Мые­къуапэ – «Локомотив-­Кубань-ЦОП» Краснодар — 85:66 (24:16, 19:15, 22:22, 20:13). Гъэтхапэм и 15-м республикэ спорт Унэшхоу «Ошъутенэм» щызэIукIагъэх. Мыекъуапэ иешIа­кIохэу Максим Абызовым, Хьа­къунэ Руслъан, Артем Гапошиным, Кирилл Майбородэ, нэмыкI­хэм хъурджанэм Iэгуаор бэрэ радзагъ. «Динамо-МГТУ-м» те­кIоныгъэр къызэрэдихыщтымкIэ джэнджэш зэрэщымыIэр тренер шъхьаIэу Андрей Синельниковым къыдилъыти, ешIэкIо нахь ныбжьыкIаIохэри зэIукIэгъум хигъэлэжьагъэх.

ЯтIонэрэ ешIэгъур

«Динамо-МГТУ» — «Локомотив-Кубань-ЦОП» — 63:70 (21:13, 18:13, 15:19, 9:25). ТиешIакIохэу нахь тызыгъэгугъэхэрэр зэрэсымаджэхэм къы­хэкIэу зэIукIэгъум икъоу хэлэжьагъэхэп. Краснодар къикIыгъэхэр кIэухым нахь щылъэшыгъэх.

Гъэтхапэм и 28 — 29-м «Динамо-МГТУ-р» Уфа, мэлылъфэгъум и 1 — 2-м Чебоксары якомандэхэм адешIэщт.

— ЗэIукIэгъухэр къин къытфэ­хъущтых, «Уфимец» ыкIи «Чебоксарские Ястребы» зэнэкъо­къум щылъыкIотэнхэ ямурад, — къытиIуагъ Андрей Синельниковым. — Мыекъуапэ иешIакIохэу Николай Ереминым, Артем Га­пошиным, Юрий Кочевым япсау­ныгъэ зыпкъ рагъэуцожьы, зэ­IукIэгъухэм зафагъэхьазыры.

Адыгеим икомандэ я 9-рэ чIыпIэм щыI, тиешIакIохэм гуетыныгъэ ин къызыхагъафэмэ, «Динамо-МГТУР» нахь лъагэу дэкIоен ылъэкIыщт. ЗэIукIэгъухэр хырыхыхьэхэм афэтэгъадэх, зы­хьыщтхэр къэшIэгъуае.