Дунаир орэдым егъэдахэ
ОрэдыIо цIэрыIоу Дэрбэ Аслъан фэгъэхьыгъэ урысые фестивалэу «Дахэ си Дунай» зыфиIорэр ятIонэрэу Мыекъуапэ щыкIуагъ. Джэджэхьаблэ щапIугъэ Дэрбэ Аслъан мэкъэ шъэбэ къабзэкIэ къыIохэрэ орэдхэр Кавказ шъолъырым, Сыбыр, КъокIыпIэ Чыжьэм ащыIущтыгъэх. Ансамблэу «Оридам», Адыгэ хэку филармонием яорэдыIоу ар щытыгъ. Патриотическэ пIуныгъэм, Хэгъэгу зэошхом, шIулъэгъум афэгъэхьыгъэ орэдхэр ыгъэжъынчыхэзэ, лъэпкъэу зыщыщым иискусствэ зыригъэушъомбгъущтыгъ. Адыгэ Республикэм инароднэ артистэу Дэрбэ Аслъан игъонэмысэу идунай зехъожьым, ишIушIагъэ тщыгъупшагъэп.
— Адыгеим, Краснодар краим якIэлэцIыкIухэмрэ ныбжьыкIэхэмрэ фестивалым хэлажьэх, — къытиIуагъ осэшI купым ипащэу, Адыгэ Республикэм искусствэхэмкIэ изаслуженнэ IофышIэшхоу, Урысыем культурэмкIэ изаслуженнэ IофышIэу Хъот Заур. — Дэрбэ Аслъан дэгъоу тшIэщтыгъэ. Валерий Васьковцовыр, нэмыкI кIэщакIохэр къыхэзгъэщыхэ сшIоигъу. Дэрбэ Аслъан фэдэ орэдыIохэр гъашIэм ищысэтехыпIэх.
— ЛIэужхэр зэфэтщэнхэмкIэ, шIэжь яIэу ныбжьыкIэхэр пIугъэнхэмкIэ фестивалым мэхьэнэ ин етэты, — зэдэгущыIэгъур лъегъэкIуатэ зэхэщэкIо купым хэтэу Валерий Васьковцовым. — Адыгэ Республикэм и ЛIышъхьэу КъумпIыл Мурат, культурэмкIэ иминистрэу Аулъэ Юрэ, Къэралыгъо академическэ къэшъокIо ансамблэу «Налмэсым» ипащэу Тхьаркъохъо Азэмат IэпыIэгъу къызэрэтфэхъугъэхэм фэшI «тхьашъуегъэпсэу» ятэIожьы. Фестивалым хэлэжьэщтхэм япчъагъэ нахьыбэ зэрэтшIыщтым иамалхэр зетхьащтых.
ПэшIорыгъэшъ зэIукIэгъухэр районхэм, къалэхэм гъогогъуитIо ащыкIуагъэх. ТекIоныгъэр къыдэзыхыгъэхэр фестивалым икIэух щызэнэкъокъугъэх. Краснодар краим къикIыгъэхэм хагъэунэфыкIырэ чIыпIэу къыдахыгъэр макIэп. Вероника Рыбинам, Алиса Рябчиковам, фэшъхьафхэм яорэд къэIуакIэ гум рехьы. Къалэу Шытхьалэ иансамблэ апэрэ чIыпIэр фагъэшъошагъ.
Тэхъутэмыкъуае искусствэхэмкIэ икIэлэцIыкIу еджапIэ эстрадэ орэд къэIонымкIэ икIэлэегъаджэу, Адыгэ Республикэм, Пшызэ язаслуженнэ артисткэу Лъэцэр Римэ ыгъасэхэрэр фестивалым щытлъэгъугъэх. ГущыIэгъу тызыфэхъугъэхэм къэзэрэтаIуагъэу, Дэрбэ Аслъан орэд къызэриIощтыгъэм щыгъуазэх, Лъэцэр Римэ якIэлэегъаджэу лъэпкъ искусствэр нахьышIоу зэрагъэшIэным пылъых.
Сэхъутэ Суандэ Тэхъутэмыкъое районым щэпсэу. Искусствэр зэрэшIогъэшIэгъоным фэшI эстрадэ орэдхэм якъэIуакIэ зыфегъасэ. Абсэлямэ Данэ, Носирэ Миленэ, КIэлэбый Замирэ, Едыдж Рэмэзанэ, нэмыкIхэм тигуапэу тядэIугъ. Даниил Гавриловым зэлъашIэрэ орэдэу «Синанэр» адыгабзэкIэ къыхидзи, мэкъэ IэтыгъэкIэ кIыригъэщыгъ.
Нэрылъэгъу IэпыIэгъухэр
Фестивалым ипэгъокIэу мэкъэгъэIу Iофыгъохэр зэхащагъэх. Зэхэугъоягъэу къыдагъэкIыгъэ нэрылъэгъу IэпыIэгъум Дэрбэ Аслъан, Сэмэгу Гощнагъо, Лъэцэрыкъо Кимэ, Бэшкэкъо Мэсхьудэ яхьылIэгъэ къэбархэр сурэтхэмкIэ гъэкIэрэкIагъэхэу къыхаутыгъэх. Фестивалым щызэнэкъокъухэрэм ясурэтхэри лъэгъупхъэх.
«Сюрпризыр» ошIэ-дэмышIэп
КIэлэцIыкIу ансамблэу «Сюрпризыр» Мыекъуапэ щызэхащагъ. Художественнэ пащэу Лариса Тупчиям ыгъасэхэрэр Урысыем икъалэхэм ямызакъоу, IэкIыб къэралыгъохэм ащыIагъэх.
— Фестивальхэм щытхъуцIэхэр къащыдэтхыгъэх, — къеIуатэ Лариса Тупчиям. — КIэлэцIыкIухэм сэнаущыгъэу ахэлъыр къызэIуахыным фэшI къэшъуакIэхэм, орэдхэм афэтэгъасэх. Дэрбэ Аслъан фэгъэхьыгъэ фестивалым зыфэдгъэхьазырзэ, кIэлэцIыкIу-хэм яшIэныгъэ хагъэхъуагъ.
Дэрбэ Аслъан ихэку, илъэпкъ орэд къафиIуагъ. ЛIыхъужъ орэдхэр къызыхидзэхэкIэ, нэпсыр нэбгырабэмэ къяхэу тлъэгъущтыгъэ. Гум лъыIэсэу, псэм хигъахъоу орэдым тамэ езытыжьыгъэм ыцIэкIэ Дунэе фестивальхэр тапэкIэ зэхащэщтых. ЕгъэжьапIэу ашIыгъэм ылъапсэ зэрэпытэщтым тицыхьэ телъ.
Фестивалым ишIухьафтын шъхьаIэу Гран-прир «Сюрпризым» фагъэшъошагъ. ОсэшI купым хэтэу ШхончыбэшIэ Мурат «Сюрпризым» фэгъэхьыгъэ гущыIэ фабэхэр къыIуагъэх, купым шIоу щыIэр къыдэхъунэу фэлъэIуагъ.