Агропромышленнэ комплексым ылъэныкъокIэ Адыгеим инвестиционнэ проект ин щагъэцакIэ. 2019-рэ илъэсым пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Молзавод Новый» зыфиIорэм щэ гъушъэм хэшIыкIыгъэ къоепсыр (сыворотка) къэзышIыщт цехым Iоф ригъашIэу ригъэжьагъ.

Адыгэ Республикэм мэкъу-мэщымкIэ и Министерствэ къызэрэщыха­гъэщыгъэмкIэ, «Молзавод Новый» зыфиIорэр хэхъоныгъэшIухэр зы­шIыхэрэ предприятиехэм ащыщ. Заводым къыдигъэкIырэ продукциер шэпхъэшIухэм адиштэным фэшI предприятием ыкIуачIэ хагъахъо. А гухэ­лъыр гъэцэкIэгъэным пае сомэ миллион 250-рэ фэдиз республикэм инвестициеу къыхалъхьагъ.

— Непэрэ мафэм ехъулIэу зы чэщ-зымафэм къоепс цIынэ тонн 200 къыдагъэкIыжьы. Оборудованиеу чIэтым тонн 400 фэдиз къырыдагъэ­кIыжьын алъэкIыщт, — къеты АР-м мэкъу-мэщымкIэ и Министерствэ.

Мы щэ заводым имызакъоу нэмыкI предприятиехэу щэм епхыгъэу Iоф зышIэхэрэм якъоепс икъыдэгъэкIыжьын пылъых, ащ фэдэ екIолIакIэм ишIуагъэкIэ Адыгеимрэ Краснодар краимрэ яэкологие ухъумагъэ мэхъу.

Предприятием игъэкIэжьын IофшIэпIэ чIыпIэ 30 къытыщт. Мыщ Iоф щызышIэхэрэм гурытымкIэ сомэ мин 27-рэ къагъахъэ. Рахъухьагъэр зэшIохыгъэ зыхъукIэ, бюджет зэфэшъхьафхэм арыхьэхэрэ хэбзэIахьхэм ахэхъощт.

(Тикорр.).