Чанэу Iоф зэрашIэрэм ишIуагъэкIэ
Культурэм иучреждениехэр гъэцэкIэжьыгъэнхэм, кIэу шIыгъэнхэм афытегъэпсыхьэгъэ программэхэм Адыгеир чанэу ахэлажьэ. Ащ фэдэ екIолIакIэм ишIуагъэкIэ мы аужырэ илъэсхэм республикэм щызэшIуахыгъэр бэ. Адыгэ Республикэм и ЛIышъхьэу КъумпIыл Мурат мы лъэныкъомкIэ IофшIэныр зэхэщагъэ зэрэхъурэм лъэплъэ, профильнэ министерствэм пшъэрылъ гъэнэфагъэхэр фешIых. 
УФ-м и Президент иIэпэчIэгъэнэ фонд къыхэхыгъэ мылъкур пэIуагъахьи Джэджэ районымкIэ культурэм иунитIу агъэцэкIэжьыгъ, ащ сомэ миллион 32,2-м ехъу пэIуагъэхьагъ. Республикэ бюджетым къытIупщыгъэ сомэ миллиони 10-м ишIуагъэкIэ къуаджэу Блащэпсынэ мыщ фэдэ учреждениеу дэтри зэтырагъэпсыхьагъ. Партиеу «Единэ Россием» ипроектэу «Культура малой Родины» зыфиIорэм къыдыхэлъытагъэу культурэм и Унэу Хьатикъуае дэтри агъэкIэжьыгъ. Джащ фэдэу муниципалитетхэм ябюджет къыхэхыгъэ мылъкумкIэ учреждениехэм илъэс къэс гъэцэкIэжьынхэр ащэкIох, блэкIыгъэ илъэсым ащ сомэ миллион 13,6-рэ пэIуагъэхьагъ. Мыщ фэдэ екIолIакIэм ишIуагъэкIэ псэуалъэхэм язытет аужырэ шапхъэхэм адиштэ мэхъу, ящыкIэгъэ оборудованиери зэрагъэгъоты.
ЗэрагъэнэфагъэмкIэ, федеральнэ гупчэм къытIупщыщт мылъкумкIэ мы илъэсым культурэм иучреждении 7-мэ игъэкIотыгъэ гъэцэкIэжьынхэр ащыкIощтых, ащ нэмыкIэу культурэм и Унэу къуаджэу Фэдз щашIырэр лъагъэкIотэщт. Джащ фэдэу къоджэ псэупIэхэм культурэм иучреждениехэр ащышIыгъэнхэм, ащыгъэцэкIэжьыгъэнхэм ипрограммэу 2020-рэ илъэсым телъытагъэм хэлэжьэнхэ гухэлъ зиIэхэм тхылъхэр агъэхьазырых. ЗэрэрахъухьагъэмкIэ, культурэм иуни 2 кIэу ашIыщт – Улэпэ ыкIи Белосельскэ къоджэ псэупIэхэм адэтыщтхэр.
Учреждениехэр зэрагъэцIэжьхэрэм, зэрашIыхэрэм адакIоу, ахэм къапэIулъхэ чIыпIэхэри шэпхъэшIухэм адиштэнхэм, гъэкIэрэкIэгъэнхэм пылъынхэ зэрэфаехэр АР-м и ЛIышъхьэ къыхегъэщы.
ТХЬАРКЪОХЪО Адам.