«Щыгъыжъыер» тиджэмакъ
КIэлэцIыкIу театральнэ зыгъэсапIэу «Щыгъыжъыем» ипчыхьэзэхахьэхэр Адыгэ Республикэм мы мафэхэм щэкIох. Адыгабзэмрэ тхыбзэмрэ я Мафэ фэгъэхьыгъэм республикэм и ЛIышъхьэу КъумпIыл Мурат хэлэжьагъ.
Тилъэпкъэгъухэу Тыркуем къикIыжьыгъэхэр кIэщакIо фэхъухи, «Щыгъыжъыер» зызэхащагъэр илъэси 10 хъугъэ. Художественнэ пащэу, Урысыем изаслуженнэ артисткэу, Адыгеим инароднэ артисткэу Уджыхъу Марыет апэрэ мафэхэм къащыублагъэу мурадэу ышIыгъэхэр щыIэныгъэм щыпхырещых.
Къиным щыщынэрэп, гъогу къурпэнхэр къызэренэкIых, лъэпкъ шIэжьымрэ дэхагъэмрэ кIэлэцIыкIухэр афегъасэх. АдыгабзэкIэ гущыIакIи, еджакIи зымышIэхэрэр театрализованнэ едзыгъохэм ахэлажьэх. Жъы уимыIэу кIэ зэрэуимыIэщтым ехьылIэгъэ пычыгъом, щыIэныгъэм урегъэгупшысэ. Ныбджэгъум ехьылIагъэм, бэлыджыр къызэрэчIахыжьыгъэм, сымаджэм е уIагъэ зытещагъэм пае «Iупау» зыфиIорэр зэрэзэхащэрэм, адыгэ джэгухэм, фэшъхьафхэм яхьылIагъэхэр пIуныгъэ нэшанэм дештэх, гущыIэ щэрыохэр IупкIэу агъэфедэх. Едзыгъохэр къашIыхэзэ, адыгабзэм изэгъэшIэн, игъэфедэн афэгъэхьыгъэ гупшысэхэм уафащэ. Лъэпкъ шэн-хабзэу тиIэхэр зэрэпытэхэр кIэлэцIыкIухэм адыгабзэкIэ къаIуатэ, ныдэлъфыбзэм ибаиныгъэ едзыгъохэм къахэщы.
Лъэпкъ шъуашэм изехьакIи узыIэпищэу къагъэлъагъо. Сабыир кушъэм зэрэхапхэрэм уеплъызэ щыIэныгъэр зэрэлъыкIуатэрэм, неущрэ мафэр нахьышIу зэрэхъущтым уицыхьэ телъэу кIэлэцIыкIухэм Iэгу уафытео.
Беданыкъо Тембот, Гогон Нэрыс, Цопсын Эльбруз, Цопсын Налбек, нэмыкIхэм ярольхэр дэгъоу къашIыгъэх. Республикэм и Правительствэ икъулыкъушIэхэр, Адыгэ Хасэм хэтхэр, кIэлэеджакIохэр къэгъэлъэгъоным ягуапэу еплъыгъэх. Къэгъэлъэгъоныр къызаухым, ти ЛIышъхьэу КъумпIыл Мурат едзыгъохэр къэзышIыгъэхэм, Уджыхъу Марыет яIофшIагъэ осэ ин фишIыгъ. «Щыгъыжъыем» игъэхъагъэхэм ахигъэхъонэу афиIуагъ.
«Щыгъыжъыер» 2017-рэ илъэсым КАФФЕД-м Тыркуем ригъэблагъи, театрализованнэ едзыгъохэр къыщигъэлъэгъуагъэх. «Сыбзэ — сибаиныгъ» зыфиIорэ Iофтхьабзэм хэлажьэзэ, республикэм пчыхьэзэхахьэхэр щызэхещэх. «Щыгъыжъыем» икъутамэхэр Адыгеим ирайонхэм къащызэIуахынэу, адыгабзэм изэгъэшIэнкIэ IофшIагъэу иIэхэм ахигъэхъонэу тыфэлъаIо.
Бзэр щыIэмэ, лъэпкъыри щыIэщт, бэгъощт.
ЕмтIылъ Нурбый.