ЩыIэныгъэр ясурэт
КъокIыпIэм щыпсэурэ лъэпкъхэм яискусствэхэмкIэ Къэралыгъо музееу Мыекъуапэ дэтым къэгъэлъэгъонэу къыщызэIуахыгъэр Сергей Олешнерэ Лариса Ушаковамрэ яIофшIагъэхэм афэгъэхьыгъ.Сергей Олешне Ростов хэкум къыщыхъугъ. Къыблэ шъолъыр федеральнэ университетым икафедрэ ипрофессор, академик, Урысыем изаслуженнэ сурэтышI, общественнэ пшъэрылъхэр егъэцакIэх. Живописым, графикэм, скульптурэм, искусствэм инэмыкI лъэныкъохэм иIэпэIэсэныгъэ къащегъэлъагъо. Джэрзым, пхъэм, мыжъом фэшъхьафхэм пкъыгъохэр ахешIыкIых. Тарихъым ехьылIэгъэ IофшIагъэу иIэр макIэп. Адам ыкIи Евэ, цIыф цIэрыIохэм, инэIуасэхэм ясурэтхэр шэпхъэ лъагэхэм адештэх, блэкIыгъэ лIэшIэгъухэр, тызхэт лъэхъаныр нэгум къыкIегъэуцох.
Лариса Ушаковам урыс художественнэ еджапIэм ишэн-хабзэхэр лъегъэкIуатэх, искусствэм ижанрэ зэфэшъхьафхэмкIэ Iоф ешIэ. Тарихъым, тыкъэзыуцухьэрэ дунаим, къэгъагъэхэм яхьылIагъэхэр гъэшIэгъоных. Аспирантурэр Москва къыщиухыгъ, Урысыем исурэтышIхэм я Союз хэт.
Хы ШIуцIэм, Азов хым янэпкъхэм, зыгъэпсэфыпIэхэм, къэгъэгъэ лъэпкъхэм яхьылIэгъэ сурэтхэр шъо зэфэшъхьафхэмкIэ гъэкIэрэкIагъэх.
Къэгъэлъэгъоным икъызэIухын фэгъэхьыгъэ зэхахьэм музеим ипащэу Кушъу Нэфсэт, Адыгэ Республикэм культурэмкIэ и Министерствэ иотдел ипащэу Шэуджэн Бэлэ, Адыгеим исурэтышI цIэрыIохэу Хъуажъ Рэмэзан, Эдуард Овчаренкэр, нэмыкIхэри къыщыгущыIагъэх. Сергей Олешнерэ Лариса Ушаковамрэ ти ЛIышъхьэу КъумпIыл Мурат, Правительствэм икъулыкъушIэхэм аIукIагъэх. Республикэм и ЛIышъхьэ, къэгъэлъэгъоным изэхэщакIохэм зэрафэразэхэр С. Олешнерэ Л. Ушаковамрэ хагъэунэфыкIыгъ.
Гъэтхапэм и 30-м нэс къэгъэлъэгъоныр музеим щыкIощт.