Дамир непэ тырегъэблагъэ
Адыгэ Республикэм искусствэхэмкIэ икIэлэцIыкIу еджапIэу Лъэцэрыкъо Кимэ ыцIэ зыхьырэр илъэс 30 зэрэхъурэм фэгъэхьыгъэ Iофтхьабзэхэр Мыекъуапэ щэкIох.
2010-рэ илъэсым республикэм искусствэхэмкIэ икIэлэцIыкIу еджапIэ фольклор къутамэ къыщызэIуахыгъ. Ижъырэ орэдхэр къызэраIохэрэм дакIоу, лъэпкъ музыкальнэ Iэмэ-псымэхэмкIэ адыгэ орэдышъохэр агъэжъынчых. КIэлэеджакIохэр адыгабзэкIэ нахьышIоу гущыIэхэ хъугъэх, еджэкIэ-тхэкIэ амалхэр къызыIэкIагъахьэх. Фестивальхэм, зэнэкъокъухэм ахэлажьэхэзэ, щытхъуцIэхэр къыдэзыхыгъэхэм ащыщых Сирием къикIыжьыгъэхэ зэш-зэшыпхъухэу ЛIыбзыу Шанрэ ЛIыбзыу Джантирэ, Паштэ Гупсэ, Сихъу Джэнэт, нэмыкIхэри яIэпэIэсэныгъэкIэ еджакIохэм къахэщых.
Гъуагъо Дамир Джыракъые къыщыхъугъ. Фольклор къутамэм щеджэзэ, искусствэм щызэлъашIэрэ ГъукIэ Замудин ипащэу шыкIэпщынэм ишъэфхэм зафигъасэу ыублагъ. Бзэпси 2 ыкIи бзэпси 4 хъурэ шыкIэпщынэхэр Д. Гъуагъом шIогъэшIэгъоных. Налщык щыпсэурэ Еуазэ Зубер искусствэм щыцIэрыIу. Ар упчIэжьэгъу ышIызэ, шыкIэпщынэмкIэ адыгэ орэдышъохэр ыгъэжъынчыгъэх. Нарт шъаор Урысыем ифестиваль-зэнэкъокъухэм чанэу ахэлажьэ, ишIэныгъэ хигъахъозэ тегъэгушIо.
Ансамблэу «Тыжьыныр» игъусэу гъэтхапэм и 14-м Д. Гъуагъом концерт Мыекъуапэ къыщитыщт. Республикэ филармонием мафэм сыхьатыр 12-м зэхахьэр щаублэщт. ХьакIэщ шIыкIэм тетэу концертэу къатыщтым Нэгэрэкъо Казбек, Абыдэ Артур, нэмыкIхэу искусствэм щашIэхэрэр щытлъэгъущтых.
ЗэхэщакIохэм лъэпкъ искусствэр зышIогъэшIэгъонхэр зэхахьэм рагъэблагъэх.
Сурэтым итыр: Гъуагъо Дамир.