Адыгэ литературэр ыкIи бзылъфыгъэхэр
КIочIэшIу зиIэ гущыIэр
АкъылышIуагъэр — тын лъапI. Ар зыхэлъым IуакIи шIыкIи ешIэ, игущыIи уасэ фашIы.
Адыгэ жэрыIо творчествэмкIэ укъикIымэ ащ бзылъфыгъэ цIэрыIуабэ зэрэхэтыр хэти ешIэ, ахэм ацIэ лъэпкъ тхыдэм, хъишъэм пытэу хэкIыхьагъ — Сэтэнэе-гуащэр, Адыиф Iапшъэ нэфыр, Исп-гуащэр, нэмыкIхэри.
Адыгэхэм ижъыкIэ къыщегъэжьагъэу бзылъфыгъэр агъэлъапIэу къызэрэрыкIуагъэм ищысэх ащ ыпашъхьэ сэр къызэрэщырамыхырэр, хъулъфыгъэ зэфилъыгъитIумэ азыфагу бзылъфыгъэм ишъхьэтехъо къызыридзэрэм, зэо-банэхэр зэрэзэпагъэущтыгъэхэр, бзылъфыгъэм шъхьэкIафэ фашIэу шыухэр шым къызэрепсыхыщтыгъэхэр, ыпэ рэзэзэпачыщтыгъэр; ныбжь иIэмэ, исэмэгукIэ щытхэу агъэкIуатэщтыгъ; хъяр ыкIи нэмыкI зэхэхьэ зэфэшъхьафхэми ащ чIыпIэ гъэнэфагъэ щыриIагъ. Бзылъфыгъэр адыгэхэмкIэ — ны, шыпхъу, шъхьэгъус ыкIи ныбджэгъу, онджэкъ машIом иухъумакIу, лIакъор зэзыщхэу ибынхэмкIэ зыгъэбагъорэ. ИгумэкI-гулъытэкIэ, илыуз иныкIэ псэр къегъэгъунэ, еухъумэ. Арышъ, бзылъфыгъэм идахэ фэдиз къабзэу лъэныкъуабэкIэ дэгъури къебэкIы.
Тхыгъэ лъэпкъ литературэр тиIэ зыхъугъэр бэдэдэ мышIагъэми, ащ чIыпIэ дахэ тиадыгэ бзылъфыгъэхэм щагъотыгъ. Къедгъэжьэн апэрэ лъагъор ащ щызыдзыгъэмкIэ.
Долэтхъан
Натхъо Долэтхъан Мыхьамчэрые ыпхъур Кавказ заом ыуж адыгэ чылэ закъоу Кубань хэкум къи-нэжьыгъэгъэ Хьатрамтыку (Суворово-Черкесскэм) гъэтхапэм и 15-м, 1913-рэ илъэсым къыщыхъугъагъ. 1925-рэ илъэсым къуаджэр Адыгэ хэкоу зэхащагъэм къэкощыжьи, Тэхъутэмыкъуае пэгъунэгъоу тIысыгъэ, цIэу Натыхъуай фаусыгъ.
Долэтхъан апэрэ адыгэ бзылъфыгъэхэу еджэн-гъэсэныгъэм фэкIуагъэхэм ащыщ. Краснодар рабфакым щеджагъ, Краснодар кIэлэегъэджэ институтым филологиемкIэ ифакультет адыгабзэмрэ адыгэ литературэмрэкIэ иотделение чIэхьэ. Еджэзэ тхэным зыреты, 1929-рэ илъэсым пьесэу «ЦIыфыкIэхэр» хэкум культурэм иунэхэу итхэм апае етхы. Ащ къыкIэлъыкIуагъ нэмыкI ипьесэу «ЩыIакIэм игушIуагъохэр» зыфиIорэр. Апэрэр журналэу «Тихахъом» къыщыхиутыгъ, ятIонэрэр тхылъ шъхьафэу 1936-рэ илъэсым Краснодар къыщыдэкIыгъ. Долэтхъан 1934-рэ илъэсым институтыр къызеухым, Адыгэ кIэлэегъэджэ техникумым адыгабзэмрэ литературэмрэкIэ заулэрэ щыригъэджагъэх, ащ ыужым адыгэ театральнэ техникумым кIэлэегъаджэу Iоф щишIагъ.
Я ХХ-рэ лIэшIэгъум ия 30-рэ илъэсхэм адыгэ литературэмкIэ илъэсибл еджапIэхэм ащызэрагъашIэрэ тхэкIуи 8-мэ Натхъо Долэтхъан итворчествэ ащыщыгъ.
1935-рэ илъэсым Темыр Кавказым итхакIохэм яконференциеу Ростов-на-Дону щыIагъэм Долэтхъан хэлэжьагъ.
Ау тхэным, гупшысэным нэмыкIэу, театрэ искусствэм лъэшэу ыгукIэ зыфищэщтыгъ ыкIи 1938-рэ илъэсым Москва макIо, ГИТИС-м ирежиссер факультет чIэхьэ. Ау Хэгъэгу зэошхор къызежьэм, иеджэн зэпигъэун фаеу хъугъэ. Натхъом 1943-рэ илъэсым къыщегъэжьагъэу Адыгэ хэку драматическэ театрэм иартисткэу, режиссерым иIэпыIэгъоу Iоф щишIагъ. Зы къэшIыгъо хъухэрэ пьесэхэу «Фыжь», «Чэщ гумэкIыгъу», «Асиет игукъау», рассказэу «Къурамбый» ыкIи литературнэ критическэ статьяхэр етхых. Ау лъэхъэнэ къиным, гъогу зэпымычыжьхэм — гастрольхэми уахэтэу Iоф пшIэныр псынкIэгъуагъэп, бзылъфыгъэм ипсауныгъэ къыхэIэ, сымаджэ мэхъу.
Зэо ужым, 1947 — 1953-рэ илъэсхэм, Долэтхъан Кощхьаблэ дэсыгъ, Кощхьэблэ гурыт еджапIэм адыгабзэмрэ литературэмрэкIэ щыригъаджэщтыгъэх. ЗэлъашIэрэ шIэныгъэлэжьэу Къуныжъ Мыхьамэт Долэтхъан зэрэригъэджагъэр, шIыкIэшIо-шэнышIоу, гъэсэныгъэ дэгъу IэкIэлъэу, егъэджакIэм тегъэпсыхьагъэу зэрэщытыгъэр лъэшэу фэбагъэ хэлъэу къысфиIотэжьыгъагъ. Долэтхъан адыгэ драматургыгъ, актрисагъ, режиссерыгъ, критикыгъ, лъэужышIу щыIэныгъэм къыхигъэнагъ, итхыгъэхэмкIэ лъэпкъ литературэм хахъо фишIыгъ, апэрэ бзылъфыгъэ тхэкIуагъ.
Тхэныр ягъогу
Апэрэ лъагъор лъагъэкIотагъ тиадыгэ тхэкIо бзылъфыгъэхэу Хъунэго Нурет, Емыж МулиIэт, Ергъукъо-ЩэшIэ Щамсэт, Хъунэго Саидэ, Мамрыкъо Фатимэ, ГутIэ Санят, Гъыщ Рахьмэт, Ацумыжъ-Къумыкъу Разиет, Хьакъунэ-Хъуажъ Заремэ.
Бзылъфыгъэ гупшысэр, бзылъфыгъэ акъылыр ыкIи губзыгъагъэр, IэпкIэ-лъэпкIэгъэ къэIокIэ дахэхэр, тхыгъэ гузэхашIэхэр лъэпкъ литературэм ишъхьангъупчъэ дахэу зэIузыгъэкIотыгъэх ыкIи нэф лъэшыр, гудэчъыгъо гуапэр тилитературэ къыхэзытIупщыхьагъэх. Хэти итворчествэ ежь ыгу тешIыкIыгъ ыкIи ыпсэ илэгъу, щэч зыхэмылъыр бзылъфыгъэ къэлэмыр сыд фэдэрэ литературэри къэзыгъэшъуашIоу, къизыгъэджэгукIэу, псэм ифабэ зэхэозыгъашIэу зэрэщытыр ары.
Мамырыкъо Нуриет.