Игуфэбэныгъэ алъэIэсы
Адыгеим инароднэ сурэтышIэу, ювелирэу Еутых Асе игугъу къызытшIыкIэ, сэнаущыгъэу хэлъым тегупшысэ, иIофшIагъэхэм гукIэ талъэIэсы. Ау ежь идунэееплъыкIэ, гухахъо зыхигъуатэрэр, насыпыгъэкIэ ылъытэрэм щыгъуазэр макIэ. Бзылъфыгъэхэм я Дунэе мафэ ипэгъокIэу Еутых Асе гущыIэгъу тыфэхъугъ. ЗэIукIэгъу фабэр тигъэзетеджэхэм тигуапэу алъыдгъэIэсыжьыщт.
— Пстэуми апэу сэркIэ мэхьанэ зиIэр сиунагъо гуфэбэныгъэ илъыныр ары, — игущыIэ къыщыхегъэщы Еутых Асе. —Сишъхьэгъусэ, силъфыгъэхэр, сигупсэхэр згъэгушIонхэр сикIас. Дэхагъэр хэти ежь къыщежьэ. ЦIыфым рэхьатныгъэ иIэу, тыгъэнэбзыеу, фэбагъэу ыгу илъыр къыпэблагъэхэм афигощы зыхъукIэ, ежьыми ащ гухахъо хегъуатэ.
ТигущыIэгъу ицIыкIугъом къыщегъэжьагъэу шIулъэгъуныгъэр игъогогъоу мэпсэу. ЗекIо кIоныр, къэралыгъо зэфэшъхьафхэр къыкIухьанхэр икIас, ау къызфигъэзэжьын ылъэкIыщтыр гупсэфыпIэ фэхъугъэ чIыпIэхэр ары. Ащ фэдэу Индиер ыгъэнэфагъ. Мыщ жьэу къыщепщэрэми шIулъэгъуныгъэ, гуфэбэныгъэ хэлъэу тигущыIэгъу елъытэ.
— Къэралыгъохэм яискусствэ зыфэдэр, архитектурэр зэзгъэлъэгъуныр сикIас, — игущыIэ лъегъэкIуатэ Еутых Асе. — СшIогъэшIэгъонэу бэ къэсплъыхьагъэр, ау Индием гухэхъоныгъэ щысэгъоты. Дунаим ыгу мыщ щыI. Мы къэралыгъом щыпсэухэрэм, сабыйхэм къащегъэжьагъэу зыныбжь хэкIотагъэхэм анэсэу, дунаим щыгушIукIынхэ, такъикъ пэпчъ рэхьатныгъэ щагъотын алъэкIы. Ахэм агу зэкIэми афызэIухыгъ. Ащ сэри кIуачIэ къысхилъхьагъэу, гухэхъоныгъэ щызгъотыгъэу сихэку къэсэгъэзэжьы.
ТигущыIэгъу къыхегъэщы сыд фэдизэу нэмыкI къэралыгъохэр дахэу, гупсэфэу къыпщыхъухэми, укъызщыхъугъэ хэкум, лъапсэ зыщыбдзыгъэм пэпшIын зэрэщымыIэр. Ар пстэуми анахь шъхьаIэу елъытэ. Укъызщыхъугъэ унэу рэхьатныгъэ зыщыбгъотырэм уигуапэу къыфэогъэзэжьы, ащ кIуачIэ къыпхелъхьэ, тапэкIэ гъэхъэгъэшIухэр пшIыным укъыфегъэущы.
Еутых Асе Iэдэбныгъэ зы-хэлъ бзылъфыгъ. Ащ узеплъыкIэ, Iэшэ онтэгъухэр, тIысыпIэ инхэр ыIапэхэм къачIэкIын зэралъэкIырэр гурыIогъуае мэхъу. Тызэресагъэу, мыщ фэдэ пкъыгъо инхэр хъулъфыгъэхэм нахь ятэпэсы. Сэнэхьат гъэшIэгъоныр къыхихынэу зэрэхъугъэр къытфиIотэнэу тигущыIэгъу зыфэдгъэзагъ.
— СицIыкIугъом къыщегъэжьагъэу сэнаущыгъэу схэлъыр сятэжъ-сянэжъ пIашъэхэм, сянэжъ-сятэжъхэм къысхалъхьагъ. ГъучIым сызэрэдэзекIощтыр сятэжъ къысигъэлъэгъущтыгъэ, дэн-бзэныр, дышъэ IуданэкIэ хэсыдыкIыныр сянэжъ сигъэшIагъ. НэмыкI сэнэхьат къыхэсхынэуи сегупшысагъэп, — къытфеIуатэ Асе. — Сянэжъ сыригъусэу нысхъап цIыкIухэр сшIыщтыгъэх, ахэм щыгъынхэр афэсыдыщтыгъэх, дышъэ IуданэкIэ хэсыдыкIыщтыгъэ. Ахэм сапылъэу мафэхэр кIощтыгъэх. Сянэжъ пшысэхэр, тхыдэжъхэр къысфиIуатэщтыгъэх, щыIэныгъэм анахь мэхьанэ ин щызиIэ лъэныкъохэр сигъэлъэгъугъэх.
ТигущыIэгъу тызэрэщигъэгъозагъэмкIэ, унэгъо хъызмэтыр икIас ыкIи ащ игуапэу пылъ. Пщэрыхьаным, унэр ыгъэдэхэным, ащ гупсэф илъэу зэIуихыным афэщагъ. Сэнэхьатэу зэрылажьэрэр Тхьэм къыхимылъхьагъэу щытыгъэмэ, игуапэу унэм исыщтыгъэ, унэгъо хъызмэтым ищыIэныгъэ рипхыщтыгъэ.
— Бзылъфыгъэхэм я Мафэ къыхэзгъэщыныр, ар анахь згъэмэфэкIыныр сихабзэп, — къытфеIуатэ тигущыIэгъу. — Мафэ къэс бгъэмэфэкIын плъэкIыщт уиунагъо угу фызэIухыгъэу, агу къыдэпщэеным, бгъэгушIонхэм упылъы зыхъукIэ.
Хэтрэ бзылъфыгъи унагъом анахь мэхьанэшхо зэрэритырэм фэдэу, Еутых Асе игуфэбэныгъэ зылъыIэсырэр ишъхьэгъус, илъфыгъэхэр, игупсэхэр ары. Ахэр зэригъэшIощтхэм пылъ, ежьхэри анахь лъапIэу яIэм ыгу къыдащэеным дэшъхьаххэрэп. ТигущыIэгъу ыгу пстэуми зэрафызэIухыгъэр зэхэошIэ, ащ фэбагъэу, рэхьатныгъэу хэлъыр ынэхэм къачIэщы. Апэрэ такъикъэу гущыIэгъу узыфэхъугъэм къыщыублагъэу упэблагъэ охъу, нурэу хэлъым узэлъеубыты, уегъэгупсэфы.
Гъонэжьыкъо Сэтэнай. Сурэтыр Артур Лаутеншлегер тырихыгъ.