ТелефонкIэ къатыгъ. «Луч» Москва – «Адыиф» Мыекъуапэ – 30:30 (14:14). Москва щызэдешIагъэх.

— «Лучыр» Iэгоуи 2-кIэ тапэ ишъэу, тэри джащ фэдизкIэ бысымхэм якомандэ ыпэ тишъэу уахътэ къыхэкIыгъ. ТекIоныгъэр зыхьыщтыр къэпшIэнэу щыты­гъэп, — къытиIуагъ «Адыифым» итренер шъхьаIэу, Урысыем изаслуженнэ тренерэу Александр Рев­вэ. — ЗэIукIэгъум иаужырэ та­къикъ «Лучым» тикъэлапчъэ Iэгуаор къыдидзагъ – 30:29.

«Адыифыр» гуIэм хэтэу ыпэкIэ илъыгъ. КъэлэпчъэIутыр тренерым ешIакIомкIэ зэблихъугъ. Нэбгыри 6 хъухэу типшъашъэхэр «Лучым» икъэлапчъэ екIух, ау пчъагъэр зэблахъун алъэкIырэп. НэгъэупIэпIэгъуи 7 къэнагъэу А. Реввэ тиешIакIохэм яушъыигъ. Ксения Дьяченкэм Iэгуаор къызыIэкIахьэм, ухъумакIохэр ыгъэплъэхъугъэх, лъэшэу ыдзыгъэ Iэгуаор «Лучым» ихъагъэ щычэрэгъугъ – 30:30 пчъагъэр хъугъэ, нэгъэупIэпIэгъуи 3 къэнагъэр…

КъэлэпчъэIутэу Маргарита Кушнырь, ухъумакIоу Марина Васильевар анахь дэгъоу ешIагъэхэм ащыщых. Алиса Дворцеваям шъобж къызытыращэм, врачыр къеIэзэн фаеу ешIапIэм ращыгъ. А. Дворцеваям пытагъэ къызхигъафи, ешIапIэм къи­хьажьыгъ, къэлапчъэм гъогогъуи 5 Iэгуаор дидзагъ. Ксения Дьяченкэм «Лучым» икъэлапчъэ гъогогъуи 10 Iэгуаор дигъэфагъ.

«Адыифым» очкоуи 5 иI, я 10-рэ чIыпIэм щыт. Ауж къи­нэхэрэм къахэмыкIыжьыгъэми, бзылъфыгъэхэм я Дунэе мафэ ехъулIэу шIухьафтын зыфишIы­жьыгъ.

Сурэтым итыр: «Адыифым» иешIэкIо анахь дэгъухэм ащыщэу Марина Васильевар – N 7-р.