«УиблэкIыгъэ пшIэным уапэкIэ уегъаплъэ ыкIи улъегъэкIуатэ»
Джыри зы тарихъ романыкI, джыри зы хъугъэ-шIэгъэ гупшыс. Зэманыр ыкIи цIыф лъэпкъ зэфыщытыкIэхэр ащ пхырыщыгъэ зэрэхъухэрэр куоу къыщигъэлъэгъуагъ.
Адыгэ Республикэм, Къэбэртэе-Бэлъкъарым, Къэрэщэе-Щэрджэсым янароднэ тхакIоу, СССР-м, Урысыем, литературнэ премиеу М. А. Шолоховым ыцIэкIэ щытым я Къэралыгъо шIухьафтынхэм ялауреатэу МэщбэшIэ Исхьакъ итарихъ романыкIэу «Дорога смерти» зыфиIорэр бэмышIэу къыдэкIыгъ. Ар зэлъашIэрэ романистым ия 21-рэ тхылъ. Адыгэ-черкесхэм ягъашIэ къыхэхъухьэгъэ Къэнджал заоу Iоныгъо мазэм, 1708-рэ илъэсым Къэбэртаем щыкIуагъэм фэгъэхьыгъ.
ЗэлъашIэрэ тхакIоу МэщбэшIэ Исхьакъ лъэпкъым пэкIэкIыгъэ тарихъ хъугъэ-шIэгъэ иныр художественнэ шъуашэм ригъэкIугъ.
Тарихъ романыкIэр ытхынэу зэрэхъугъэр, ащкIэ IэубытыпIэ ышIыгъэхэр, заор къежьэныр къызхэкIыгъэр, ащ щызэпэIутыгъэхэ кIуачIэхэр ыкIи текIоныгъэр къыдэзыхыгъэхэр зэдгъашIэхэмэ тшIоигъоу МэщбэшIэ Исхьакъ зыфэдгъэзагъ.
— Романыр птхынэу зэрэхъугъэр, уахътэу, кIуачIэу текIодагъэр къытаIохэба.
Зиилъэсхэр, мазэхэр, мафэхэр гупшысэкIэ зэлъыпкIэгъэ тхэкIошхор пшъыгъашъоу зэ шъхьакIэ хэплъызыкIыгъ, етIанэ макIэу къыIугушIукIи къысэупчIыгъ:
— Уеджагъэба джыри романым?
Сэри журналэу «Зэкъошныгъэм» къызэрэдахьэщтыгъэр сэшIэми, «Джы тхылъыр къыдэкIыгъэшъ, седжэщт» есIожьыгъ. ТигущыIэ лъыкIотагъ.
— Мафэ горэм Налщык къыришIыкIи, адыгэ дунаим щызэлъашIэрэ ХьашIуцIэ Мыхьамэд къысфытеуагъ, — къеIуатэ Исхьакъ. — «Сикъош нахьыжъ, Къэбэртаем щыпсэурэ адыгэ шIэныгъэлэжь заулэмэ ялъэIу къыосэIожьы: тилъэпкъ ианахь хъугъэ-шIэгъэшхомэ ащыщ Къэнджал заом фэгъэхьыгъэ тарихъ роман птхынэу къыпщэгугъых» еIо.
— Къэнджал заор адыгэ шIэжьым икъежьапI, — зигугъу къысфишIыгъэ хъугъэ-шIэгъэ чыжьэм сыщыгъуазэти, тпэкIэкIыгъэ тхьамыкIагъомэ джыри зэ сыгу къагъэбырсырыжьызэ, Мыхьамэд есIожьи, кIэкIэу сеупчIыжьыгъ: — Ар зытхын тхакIо Къэбэртае исба?
— Ис, ау ар о нахь къыуапэсы, пфызэшIокIынэу яцыхьэ къыптелъ.
— Ащ фэдэу тиныбджэгъухэр къызэрэсщыгугъхэрэр сигуапэ. Ау ахэри згъэгугъэхэрэп, сэри зызгъэгугъэжьырэп. — Ардэдэм сIуагъэм сыфыкIэгъожьызэ, кIэлъысIожьыгъ: — Ары, ары, Мыхьамэд, сыдэу тшIын, тинахьыжъ пIашъэмэ хьылъэу Тхьэм къатырилъхьагъэр тэри тихьылъэ. КIо, теплъын…
Сиджэуап мытырэ тятэжъмэ ялIыгъэрэ сагъэгумэкI-сагъэгушхозэ мэфэ заулэ исхыгъ, сщыгъупшэжьымэ, сыгу къэкIыжьызэ мэзэ зыщыплIи, илъэс заули тешIагъ Урыс-Кавказ заом фэгъэхьыгъэ романиплIым къакIэлъыкIогъэ «Рафыгъэхэр», «Хэхэсхэр» къыдэзгъэкIыгъэх. Джа уахътэм загъорэ къысэхъулIагъэр сымышIэу синыбджэгъумэ стхынэу къысапэсыгъэ Къэнджал заор слъы къыхэукIыщтыгъэ, сшъхьэ икIыщтыгъэп.
Ащ фэдэ мафэ горэм ХьашIуцIэ Мыхьамэд сыфытеуагъ:
— Зэрэсфэгъэхъущтыр сшIэрэп, Мыхьамэд, Къэнджал заом сыфэхьазыр.
— Илъэс 300-м ехъу зытешIэжьыгъэ заом итхын анахьэу сыда къызыщебгъэжьагъэр?
— Лъэхъэнэ чыжьэ хъугъэ-шIагъэу, къэралыгъо ыкIи цIыф лъэпкъ зэфэшъхьафхэр зыхэлэжьагъэхэр зэхэугуфыкIыгъэу, шъыпкъэм тетэу сшIэн зэрэфаер къызгурыIуагъ. Адыгэ дунаим бэ техъухьагъэр: Бзыикъо заор, Пщы-оркъ заор, Фэрзэпэ заор, нэмыкIхэри. Ау 1708-рэ илъэсым Къэбэртаем къихъухьэгъэ тарихъ хъугъэ-шIагъэр анахь тхьамыкIэгъо гуихэу лъэпкъым ыщэчыгъэм апшъэжь. Къырым къикIыхэти, бэдэдэрэ, 67-рэ фэдизрэ, къырым къэндзалхэр, тыркухэри ядзэ хэтхэу Къэбэртаем къибанэщтыгъэх, ары къэс мылъку Iахь ин аIахыщтыгъ, аратызэ афэмыщэчыжь зэхъум, апэуцужьыгъэх, нэмыкI хэкIыпIэ яIэжьыгъэп.
Стхыщтыр зэкIэ пстэуми апэу гукIэ исэхъухьэ, джащ паекIэ Къэнджал заор зыдэщыIэгъэ Iошъхьэмафэ изы Iахь инэу къушъхьэ-Iошъхьэ шIуцIэшхор сыкIуи, мызэу, мытIоу зэзгъэлъэгъугъэ, къушъхьэхъупIэ мэлахъохэми, нэмыкI цIыфхэу мы заом хэшIыкI фызиIэхэми саIукIагъ. Тхыгъэ литературэ инэу заомкIэ щыIэр, Къэнджал заор заухыгъэр илъэс 300 зэхъум (2008) Налщык шIэныгъэ конференциеу щыIагъэм иматериалхэр зэпырызгъэзагъэх, зы нэбгырэу щымытэу, Адыгеим, Къэбэртаем, Урысыем, нэмыкI къэралыгъохэм яшIэныгъэлэжь инхэм мы тарихъ хъугъэ-шIагъэмкIэ яIофшIагъэхэм зафэзгъэнэIосагъ, зэкIэ зэхэсфыгъ, зэфэсхьысыжьыгъ ыкIи джащ тетэу романым итхын сыфежьагъ. Къырым къэндзал пщыгъор зыфэдагъэр, зэрэгъэпсыгъагъэр, ар Тыркуем зэригъэIорышIэщтыгъэр, мылъку шъхьаIэу зыхэбаикIыщтыгъэхэр, цIыфхэр зэращэщтыгъэр — адыгэ кIалэхэр, пшъашъэхэр, кIэлэцIыкIухэр, пшъэшъэжъые цIыкIухэр атыраххэмэ, ращыхэу, лъэпIэ дэдэу ащэхэу е тырку пачъыхьэм, е нэмыкI лъэрыхьэхэм яунэIутынхэр, е егъэзыгъэкIэ шъхьэгъусэ афэхъунхэр янасыпэу къызэрахьыщтыгъэ- хэр. Зэкъытеогъум нэбгырэ 500 Черкесием ращэуи хъугъэу тхыгъэхэм ахэт, ащ изакъоп, ялэжьыгъэ къэгъэкIыгъи, нэмыкI мылъкуи егъэзыгъэкIэ аIапаххэзэ, зыIэкIагъахьэщтыгъэх. Лъэпкъыр ащ фэдэ хьазаб зэпымычыжьым къызэтыричыгъ, 1708-рэ илъэсым иIоныгъо мазэ изы чэщ, къэбэртаехэр акIуачIэкIэ нахь хъыбэигъэхэми, акъыл-Iушыгъэр къаготэу, къырым татарыдзэу мин 80-м кIахьэрэм пэуцужьыгъэх. АпэрэмкIэ, мылъкоу зыфаIорэр аратыщт фэдэу зашIыгъ, а уахътэу къыдэфагъэр къызфагъэфеди, къэбэртаехэм яшыхэм акIэ мэшIоплъ шIэтыр пылъэу пыидзэ лъэшым жэхэлъэдагъэх. Ащ фэдэ зэо плъырым ежагъэхэпти, къырым татархэр ыкIи тыркухэр – шыхэри, ахэм атесхэри щтагъэх. Къэбэртаехэм Къэнджал къушъхьэтешъо шIуцIэм щыкIогъэ заом апэрэу текIоныгъэр къыщыдахыгъ, лъэпкъ тарихъымкIэ ыкIи УрысыемкIэ мэхьанэшхо зиIэгъэ Къэнджал заор ухыгъэ хъугъэ.
— Хэта къэбэртаехэм ыкIи къырым къэндзалхэм дзэ пащэхэу ахэтыгъэхэр?
— Къэбэртаехэм дзэ пащэу яIагъэр Хьатэхъушъэкъо Кургъокъор ары, къырым къэндзалхэм – Къэплъан-Джэрыер япэщагъ, къыхэгъэщыгъэн фаер Тыркуем ипачъыхьэу я III-рэ Ахьмэд лъэшэу заом къыкIигъэстэу, ащкIэ нэмыкI къэралыгъохэу Швецием, Францием, Украинэм, нэмыкIхэм ялIыкIо-Iэшъхьэтетхэр къотэгъу зэришIыщтыгъэхэр ары. Къэбэртаер зызэхакъутэкIэ, заштэкIэ, Урысыери, пачъыхьэу Петр I-м икъэралыгъо унэшъо ехьыжьагъэхэри пкIэнчъэ ашIынхэм щыгугъыгъэх, ау ямурад жъалым къырым татархэми, тыркухэми къикIыгъэп, къэбэртаехэр атекIуагъэх, ащкIэ ежь яшъхьафитныгъэ къызэраухъумагъэм имызакъоу, Урысыешхом шъхьащытыгъэ щынагъори щагъэзыягъ.
— Мы произведениемкIэ сыда анахь къыхэбгъэщэу, кIэбгъэтхъымэ пшIоигъуагъэр?
— Адыгэхэм япсэемыблэжьныгъэ-лIыхъужъныгъэ, уиIорэ-уишIэрэ зэтехьаным, акъыл— гупшысэ икъур зэрэосэнчъэр, ащкIэ лъэпкъым къыхэкIыгъэ губзыгъэу Къэзанэкъо Джэбагъ ишIуагъэ къызэрэкIуагъэр, узэкъотын зэрэфаер кIэзгъэтхъыгъ.
— РоманыкIэр лъэшэу куоу учIэIабэзэ птхыгъэн фае?
— Илъэс 300 хъугъэ-шIагъэр къибгъэлъэгъукIын фэягъэ; хэгъэгу зэфэшъхьафхэр, гухэлъ зэпыщытхэр, дзэ пэщэ инхэм ягъэпсыкIэ-шIыкIэхэр, ягупшысэкIагъэр зэкIэ, зэкIэ къызэлъиубытэу, зэрэсшIоигъуагъэу романыр стхыгъэ. Произведениер, щэч хэлъэп, лъэныкъуабэр къызэхифэу щыт.
— РоманыкIэм къежагъэха къэбэртаехэр, ыгъэгушIуагъэха?
— Щыгъуазэ сызэрашIырэмкIэ, етIупщыгъэу еджэх, ашIогъэшIэгъон, тарихъ хъугъэ-шIагъэр, зэкIэ адыгэ лъэпкъым идунэететыкIэ игъэкIотыгъэу хэплъагъоу, ишэн-хабзи, игупшыси, ишъхьэлъытэжьи, игъэпсыкIэ-шIыкIи къыреIотыкIы. Романым идееу иIэр «Е улIэн, е улIын» зыфиIорэр ары. Лъэпкъыжъ дэдэу адыгэхэм ялIыгъэрэ яцIыфыгъэрэ зэпагъэщачэу къызэрэрыкIуагъэхэр джыри зэ кIэсэгъэтхъы, ар къэбэртаехэм Къэнджал заом къыщагъэлъэгъуагъ.
— Романэу «Дорога смерти» зыфиIоу Къэнджал заом фэгъэхьыгъэр урысыбзэкIэ къыдэкIыгъ, адыгабзэкIэ сыдигъуа къызыдэкIыщтыр?
— Сэ зэкIэ стхырэр сыдигъуи зэрэстхырэр адыгабзэ, адыгабзэкIэ тхылъыр тхылъ тедзапIэм чIэлъ, къыдэкIыщт.
ТхылъыкIэм лъэпэ мафэ ыдзынэу фатIозэ, ныбжьи зэо тхьамыкIагъо къэмыхъужьынэу, тиблэкIыгъэ чыжьэ зэдгъашIэзэ, тимэфакIэхэр нэфынэхэу, рэхьатхэу, фабэхэу итхынхэу, щытынхэу тэлъаIо.
Мамырыкъо Нуриет.