Унэе мэкъумэщ хъызмэтым изэхэщэн кIагъэгушIущтых
Шъолъыр проектхэр пхырыщыгъэнхэм тегъэпсыхьагъэу къэралыгъо IэпыIэгъоу республикэм щарагъэгъотырэм зырагъэушъомбгъущт. 
Республикэм и ЛIышъхьэу КъумпIыл Мурат мэзаем и 25-м зэхищэгъэгъэ пресс-конференцием къызэрэщиIуагъэмкIэ, фермерхэм IэпыIэгъу ягъэгъотыгъэным, мэкъумэщ кооперацием зегъэушъобгъугъэным Адыгеим анаIэ щатырагъэтыщт, сомэ миллион 43-рэ ахэм апэIуагъэхьанэу щыт.
Республикэм ипащэ ишIошIкIэ, унэгъо былымэхъо фермэхэмрэ унэе IэпыIэгъу хъызмэтхэмрэ язэхэщэн къуаджэхэм хэхъоныгъэ ягъэшIыгъэнымкIэ, унагъом нахьыбэу хахъо иIэнымкIэ, Iофыр шIу алъэгъоу ныбжьыкIэхэр къэтэджынхэмкIэ амалышIухэм зэу ащыщых.
«НыбжьыкIэхэр къуаджэхэм къадэкIыжьхэ тэ тшIоигъоп. Ау ащ пае IофшIэпIэ чIыпIэхэр зэхэщэгъэнхэ, къуаджэм щыIэкIэ-псэукIэ дэгъу дэлъын фае. Зыпкъ итэу къуаджэм хэхъоныгъэ езыгъэшIыщт программэхэм япхырыщын лъыдгъэкIотэщт, IэпыIэгъу хъызмэтхэр зиIэхэм тишIуагъэ ядгъэкIыщт. Ащ фэдэ шIыкIэм цIыфхэм шIуагъэ къафихьыщт. Яхахъо нахьыбэ зэрэхъущтым имызакъоу, кIэлэцIыкIухэри IофшIэным фагъэсэщтых. ЛIэуж пчъагъэхэр джащ фэдэу апIугъэх, хъызмэтымкIэ сянэ-сятэхэм садеIэзэ сэри сыкъэтэджыгъ», — къыIуагъ КъумпIыл Мурат.
Адыгеим мэкъу-мэщымкIэ и Министерствэ къызэритыгъэмкIэ, 2019-рэ илъэсым зиIофшIэн езыгъэжьэщт фермерхэм мылъкукIэ нахь къафыдеплъыщтых.
«Лэжьэнэу езыгъэжьэгъэкIэ фермерым проектым игъэцэкIэн пае пстэумкIи хъарджэу ышIыхэрэм япроцент 30-м нахь мымакIэр ежь имылъкоу тапэкIэ хилъхьан фэягъ. Мыгъэ былым пIашъэхэм яхъункIэ хъарджхэм япроценти 10 нахь макIэп ищыкIэгъэщтыр. НэмыкI IофшIэн лъэпкъхэр зэрахьанхэм пае процент 30-м ар къыщыкIэщтэп. Цумпэ лъэпкъхэр алэжьыхэ, куандэхэр къагъэкIыхэ, былымхэр ахъухэ зыхъукIэ, аквакультурэхэмрэ къохэмрэ ахэмытхэу, IофшIэныр езыгъэжьэгъэкIэ фермерым иунэе мылъку ипроцент 20-м нахь мымакIэу Iофым къыхилъхьэмэ хъущт», — къыщаIуагъ республикэм мэкъу-мэщымкIэ и Министерствэ.
Фермерхэм грантхэр зэраратыщтхэм нэмыкIэу, унэгъо былымэхъо фермэхэм, мэкъумэщ потребительскэ кооперативхэм IэпыIэгъу арагъэгъотыщт. 2019-рэ илъэсым узэшIушIэн фэе чIыгухэр химическэ мелиорацие ашIыщтых. Федеральнэ, шъолъыр бюджетхэм къахэкIыщт мылъкумкIэ ахъщэу агъэкIодыгъэм ипроцент 30-р къафызэкIагъэкIожьынэу щыт.
Республикэм мэкъу-мэщымкIэ и Министерствэ къызэритыгъэмкIэ, илъэсиблым къыкIоцI бюджетым имылъкоу сомэ миллон 511-рэ хъурэ грантхэр мэкъумэщышIэ хъызмэтшIэпIэ 240-мэ Адыгеим къащаратыгъ. Грантхэр зэратыгъэхэм сомэ миллион 765-рэ зытефэгъэ продукцие къахьыжьыгъ, IофшIэпIэ чIыпIэ 200-м ехъу зэхащагъ.
2018-рэ илъэсым федеральнэ проекти 2-мэ ателъытагъэу сомэ миллиони 130-рэ хъурэ грант 51-рэ къыхагъэкIыгъ. 2019-рэ илъэсми джащ фэдиз грант къаратынэу рахъухьэх. Ащ нэмыкIэу къуаджэхэм зыпкъ итэу хэхъоныгъэ ягъэшIыгъэным пае сомэ миллиони 150-м ехъурэ федеральнэ мылъку Адыгеим къыфыхагъэкIыщт.
Адыгэ Республикэм и ЛIышъхьэ ипресс-къулыкъу