Адыгэ тхыбзэм изэфэсыщт
Адыгэ къэралыгъо университетым адыгэ филологиемрэ культурэмрэкIэ ифакультет кIэщакIо зыфэхъугъэ «Адыгэ диктант» гъэтхапэм и 12-м Мыекъуапэ щатхыщт.
Адыгабзэмрэ тхыбзэмрэ я Мафэу гъэтхапэм и 14-м хагъэунэфыкIырэм ипэгъокIэу зэхащэхэрэ Iофтхьабзэхэм ар къадыхэлъытагъ. Мы факультетым адыгабзэмрэ адыгэ литературэмрэ ятхьамафэ мы мазэм и 12 — 15-м ригъэкIокIыщт, диктантри зэхащэщтхэм ащыщ.
— Мы IофтхьабзэмкIэ зэкIэмэ анахь дэгъоу бзэр зышIэрэм икъыхэгъэщын тыпылъыныр арэп пшъэрылъэу зыфэдгъэуцужьырэр, — еIо адыгэ филологиемрэ культурэмрэкIэ факультетым ипащэу Хьамырзэкъо Нуриет. — Адыгабзэр зэрагъэшIэн, ащ имэхьанэ зыкъегъэIэтыгъэн зэрэфаер, нахьыбэ зэрипхэу шIыгъэныр, къызэтедгъэнэжьыным тызэготэу тыпылъыныр арых гухэлъ шъхьаIэхэр.
Диктантым хэлажьэ зышIоигъо пстэури пчэдыжьым сыхьатыр 9-м ехъулIэу АКъУ-м и ШIэныгъэ тхылъеджапIэ къырагъэблагъэ, ныбжь зэхэдз щыIэп, ау илъэс 12-м къыщыублагъэу зыныбжьхэр къекIуалIэхэмэ, нахь тэрэзэу зэхэщакIохэм алъытэ — цIыкIухэр нахьыжъхэм адэмыхъунхэ алъэкIыщт. Лъэпкъ зэхэдзи щыIэщтэп — адыгабзэр зышIэрэ пстэури диктантым итхын хэлэжьэшъущт.
Тхэныр заухыкIэ, шIоигъоныгъэ зиIэ пстэуми Iофтхьабзэм зэрэхэлэжьагъэхэмкIэ сертификат аратыжьыщт. IофшIагъэхэр зауплъэкIухэрэ нэуж электроннэ шIыкIэкIэ, сайтэу къараIорэм ихьанхэшъ, шъхьадж икIэух зэфэхьысыжь зыфигъэнэIосэн ылъэкIыщт. Мыщ дэжьым зызымыгъэнафэ зышIоигъохэм лъэкъуацIэр кIатхэныр ищыкIагъэп — унэе кодхэр зэкIэми афашIыщтых.
Ау анахь дэгъоу тхагъэхэм ацIэхэр къараIощтых — зифэшъуашэм ищытхъу бгъэIуныр тефэ.
ЧIыпIэу агъэнэфагъэр тIысыпIи 150-мэ ателъытагъ, ау нахьыбэ къекIуалIэми, зыдагъэтIысыщтхэр къыдыхалъытагъэх. Арышъ, адыгабзэр зы-гъэлъапIэу уахътэу фыхахыгъэм къехъулIэрэ пстэури зэхэщакIохэм диктантым рагъэблагъэх.
МэщлIэкъо Саид.