Тарихъым хэкIуакIэрэп
Хэгъэгу зэошхом иилъэсхэм гукIэ зафэдгъэзэжьызэ, хъугъэ-шIагъэхэм нахь куоу татегущыIэныр Iоф къызэрыкIоп. Фашист техакIохэм якIодылIэгъэ цIыфхэм япчъагъэ къалъытэ зыхъукIэ, шIэжьым имэхьанэ зыкъеIэты.
КъокIыпIэм щыпсэурэ лъэпкъхэм яискусствэхэмкIэ Къэралыгъо музееу Мыекъуапэ дэтым къыщызэIуахыгъэ къэгъэлъэгъоныр Хэгъэгу зэошхом илъэхъан фашистхэм жъалымыгъэу зэрахьагъэм фэгъэхьыгъ.
Темыр Кавказым фашистхэр щыхъункIэхэу заублэм, Ростов хэкум, Краснодар краим, Къэбэртэе-Бэлъкъарым, Къэрэщэе-Щэрджэсым, Ставрополь краим, Адыгеим ямамыр цIыфхэм рэхьат аратыщтыгъэп. Анахьэу зылъыхъущтыгъэхэр цыганхэр, джуртхэр арых.
Фашист техакIохэр Темыр Кавказым щызэхакъутэхи, шъолъырыр шъхьафит зашIыжьыгъэр илъэс 75-рэ зэхъум, 2018-рэ илъэсым тыгъэгъазэм и 7-м Къыблэ федеральнэ университетэу Ростов-на-Дону дэтым апэрэ къэгъэлъэгъоныр къыщызэIуахыгъ. Джуртхэм яобщинэу Ростов хэкум щызэхащагъэр кIэщакIо фэхъузэ, Новочеркасскэ, фэшъхьафхэм къэгъэлъэгъонхэр ащыкIуагъэх.
Тщыгъупшэ хъущтэп
Мыекъуапэ къыщызэIуахыгъэ къэгъэлъэгъоным нэрылъэгъу IэпыIэгъухэу щытлъэгъугъэхэм гур агъэузы. Музеим ипащэу Кушъу Нэфсэт, Адыгэ Республикэм иветеранхэм я Совет итхьаматэу Къуаджэ Аслъан, республикэ фондэу «ТекIоныгъэм» итхьаматэу Нэхэе Юр, Адыгэ Республикэм культурэмкIэ иминистрэу Аулъэ Юр, шIэныгъэлэжьхэу Елена Малышевар, Ацумыжъ Казбек, нэмыкIхэри зэхахьэм къыщыгущыIагъэх.
Фашистхэм къуаджэхэр зэрагъэстыщтыгъэр Ацумыжъ Казбек игущыIэхэм къащыхигъэщыгъ. Псэ зыпыт цIыф къамыгъэнэжьыным Германием идзэхэр пылъыгъэх.
Тарихъ шIэныгъэхэмкIэ кандидатэу, философие шIэныгъэхэмкIэ докторэу Ирина Ребровар илъэс 15 хъугъэу Хэгъэгу зэошхом итарихъ изэгъэшIэн пылъ. Ащ зэхахьэм къыщиIотагъ Темыр Кавказым фашистхэм жъалымагъэу щызэрахьагъэр щыIэныгъэм зэрэхэмыкIуакIэрэр.
ШIэныгъэлэжьхэм аужырэ илъэсхэм тхыгъэу яIэр макIэп. И. Ребровам къызэриIуагъэу, сэкъатныгъэ зиIэ кIэлэцIыкIухэр, медицинэм иIофышIэхэр фашистхэм аукIыщтыгъэх.
Ленинград хэкум къыращыгъэ кIэлэцIыкIухэр Къэрэщэе-Щэрджэсым имамыр цIыфхэм агъэбылъыщтыгъэх, джурт кIэлэцIыкIухэр фашистхэм ащаухъумэхэзэ унагъохэм ахатхэщтыгъэх…
Зэгъэпшэнхэм ямэхьан
Къуаджэ Аслъан полковник шъуашэр щыгъэу къэгущыIэу бэрэ тэлъэгъу. Къызыщытхъужьырэп. Тарихъым инэкIубгъохэр зэригъапшэхэзэ, шIэжь тиIэн зэрэфаер иеплъыкIэхэм къащыхегъэщы. Журналистхэм, тхакIохэм яопыт нахьышIоу гъэфедэгъэн фаеу зэхахьэм къыщиIуагъ. Хэгъэгу зэошхом ехьылIэгъэ къэбар нэпцIхэр зыгъэIухэрэм пхъашэу тапэуцун фаеу ащ елъытэ.
СурэтышI-модельер цIэрыIоу СтIашъу Юрэрэ Ирина Ребровамрэ гущыIэгъу зэфэхъугъэх. Нэрылъэгъу IэпыIэгъухэу музеим къыщагъэлъагъохэрэр уахътэм диштэу къытаIуагъ.
— Мыщ фэдэ къэгъэлъэгъонхэр ныбжьыкIэхэм нахьыбэрэ алъэгъунхэм сыпылъ, — еIо Ирина Ребровам. — КIэлэеджакIохэм тарихъыр нахьышIоу зэрагъашIэ зыхъукIэ, шIэныгъэм мэхьанэу ратырэм зыкъыIэтыщт.
Хэгъэгу зэошхом хэкIодэгъэ джуртхэм саугъэтхэр афагъэуцух, лъэпкъыр къэзыухъумагъэхэм щытхъур афаIо.
Сахьидэкъо Нурбый.