ЩыIэныгъэм орэд къыфаIо
Адыгэ Республикэм и Къэралыгъо филармоние иунэжъые лIыхъужъныгъэм, мамыр псэукIэм игъэдэхэн афэгъэхьыгъэ пчыхьэзэхахьэ щыкIуагъ.Зэхахьэр зезыщэгъэ Юлия Никоновам Урысыем и УIэшыгъэ КIуачIэхэм ятарихъ щыщ нэкIубгъохэр къыIотагъэх. Анахьэу къыхигъэщыгъэр тидзэкIолIхэм мамыр псэукIэр зэрагъэлъапIэрэр, хэгъэгум игъунапкъэхэр цыхьэшIэгъоу къызэраухъумэрэр, шIэжь яIэу ныбжьыкIэхэр пIугъэнхэр ары.
Мамыр псэукIэр зэкIэми зэдыряIоф. Пчыхьэзэхахьэм изэхэщакIохэм ащыщэу Вера Пособиловам къызэрэтиIуагъэу, культурэмрэ искуссвэмрэ яIофышIэхэм лIэужхэм язэпхыныгъэхэм яхьылIэгъэхэ концертхэр филармонием тапэкIи къыщатыщтых.
Къэралыгъо филармонием иорэдыIохэу, Урысыем, Адыгеим язаслуженнэ артисткэу Баджэ Дзэхъан, Адыгэ Республикэм инароднэ артисткэу Нэгъой Маринэ, Адыгэ Республикэм изаслуженнэ артистэу Хъут Рустам Къыблэм, Темыр Кавказым ащыцIэрыIох.
Осыр машIом зэрэзэлъикIурэм ехьылIэгъэ орэдыр Хъут Рустам мэкъэ IэтыгъэкIэ къыIуагъ. Шъхьэтехъо шхъуантIэм фэгъэхьыгъэ орэдэу хэгъэгум щашIэрэр Нэгъой Маринэ къызыхедзэм, дежъыу зышIоигъохэу залым чIэсхэм тшIогъэшIэгъонэу талъыплъагъ.
В. Соловьев-Седоим, А. Пахмутовам, нэмыкI композитор цIэрыIохэм яорэдхэр зэхахьэм къыщаIуагъэх. Дз. Баджэмрэ М. Нэгъоимрэ зэгъусэхэу патриотическэ, шIулъэгъу орэдхэр агъэжъынчыгъэх. ЛIыIужъу Адам ыусыгъэ «Нартхэр» Хъут Рустам къызэриIогъэ шIыкIэри тыгу рихьыгъ. УрысыбзэкIэ тхыгъэ гущыIэхэм адыгэ жъыур адештэ.
ОрэдыIо ныбжьыкIэхэу Сергей Трутневым, Наталья Амельченкэм, Нэгъой Бэлэ пчыхьэзэхахьэр къагъэбаигъ. ЛIыхъужъ, шIулъэгъу орэдхэу гум щыщ хъугъэхэр къаIуагъэх. Музыкальнэ Iэмэ-псымэхэмкIэ макъэхэр зыгъэжъынчыгъэхэ Анна Шапоровар, Никита Гнидиныр артистхэм къадежъыугъэх. ФортепианэмкIэ Набэкъо Бэлэ произведениехэр къыригъэIуагъэх.
МэфэкIхэм афэгъэхьыгъэ концертхэр артистхэм къатынэу загъэхьазыры. Сурэтым итхэр: пчыхьэзэхахьэм хэлэжьагъэхэр.
ЕМТIЫЛЪ Нурбый.