Урысыем, IэкIыб къэралыгъохэм яоркестрэхэм ядирижерхэр, орэдыIохэр Адыгэ Республикэм щыкIохэрэ пчыхьэзэхахьэмэ ахэлажьэх, дунэе музыкальнэ искусствэм зегъэушъомбгъугъэным яIахь халъхьэ.

Адыгэ Республикэм и Къэралыгъо филармоние и Къэралыгъо симфоническэ оркестрэ иконцертэу Мыекъуапэ щыкIуагъэм Финляндием икомпозиторхэм япроизведениехэр, кинофильмэхэм къахахыгъэхэ орэдхэр щыIугъэх.

Финляндием къикIыгъэ дирижерэу Веса Хиукканен симфоническэ оркестрэм пэщэныгъэ дызэрихьагъ. Пчыхьэзэхахьэм иапэрэ кIэлъэныкъо Джон Татгенхорст, Мишель Легран, Роберт Лопес, Эрих Корнгольд япроизведениехэр щызэхэтхыгъэх. Оркестрэм пае поэмэу Д. Татгенхорст ыусыгъэмкIэ концертыр къызэIуахыгъ. «Гъатхэм цыхьэ фэшI», «Гъэмафэм зэкIэри къыгурэIо» зыфиIохэрэр, нэмыкIхэри гупшысэ куухэр озыгъэшIыхэрэм ащыщых.

ОрэдыIоу Марко Лундберг Финляндием щэпсэу. «Ошъопщэ чыжьэхэр», «Чэщ оялэр», «Лилие икъэгъагъ», нэмыкIхэри къыIуагъэх. Пчыхьэзэхахьэр зезыщэгъэ Хьакъуй Заремэ изэфэхьысыжьхэм къахигъэщыгъ М. Лундберг ирепертуар щыIэныгъэр нахьышIоу къыбгурыIоным уфэзыщэхэрэ орэдхэр зэрэхэтхэр.

Республикэ филармонием иэстрадэ купэу «Ошъутенэм» иорэдыIоу Алевтина Кобазевар пчыхьэзэхахьэм хэлэжьагъ. Ана­хьэу тшIогъэшIэгъоныгъэр Марко Лундберг игъусэу Алевтинэ шIу­лъэгъу орэдхэр къызэриIуагъэхэр ары.

«Финхэм ятанго» зыфиIорэ едзыгъом узыIэпещэ. Къашъоу къашIырэм «Танго» фаусыгъ. Орэд къызэраIорэм дакIоу, артистхэр къэшъох.

Гум ихъыкIырэр гущыIэкIэ къып­фэмыIоу къыхэкIы. Къашъом ыбзэ нахь гурыIогъошIу къызыщыпщы­хъурэ уахътэм жъыум узэлъештэ, пчэгум ущэуджы. Марко Лунд­бергрэ Алевтина Кобазевамрэ къа­шъоу «Тангор» къызэдашIыгъ. Едзыгъом ыцIэр гъэшIэгъонэу щыт «Ощхым хэтхэу тангор».

— Дунэе искусствэм цIыфхэр зэфещэх, — къытиIуагъ симфоническэ оркестрэм идирижерэу, Адыгэ Республикэм изаслуженнэ артистэу Аркадий Хуснияровым. — Урысыбзэр амышIэми, Веса Хиукканен, Марко Лундберг Адыгеим щыщхэу концертым къэкIуа­гъэхэм агурыIонхэ алъэкIы, зэ­гъусэхэу нэпэеплъ сурэтхэр аты­рахых.

Сурэтхэр зэхахьэм къыщытетхыгъэх.