Тарихъыр, культурэр, лъэхъаныр
Абхъазымрэ Адыгеимрэ культурэмкIэ язэпхыныгъэхэр гъэпытэгъэнхэм фэгъэхьыгъэ къэгъэлъэгъонэу «Абхъазыр. Тарихъыр, культурэр, лъэхъаныр» зыфиIорэр Мыекъуапэ къыщызэIуахыгъ.
КъокIыпIэм щыпсэурэ лъэпкъхэм яискусствэхэмкIэ Къэралыгъо музееу Мыекъуапэ дэтым щыкIогъэ зэхахьэм лъэпкъхэр зэфищагъэх. Музеим ипащэу Кушъу Нэфсэт пэублэ гущыIэкIэ зэхахьэр къызэIуихыгъ. Абхъазым культурэмкIэ иминистрэу Эльвира Арсалия, Адыгеим культурэмкIэ иминистрэу Аулъэ Юрэ, Абхъазым исурэтышIхэм я Союз итхьаматэу Виталий Джения, Адыгеим исурэтышIхэм я Союз ипащэу Елена Абакумовар, сурэтышI ыкIи архитектор цIэрыIоу Бырсыр Абдулахь, нэмыкIхэри зэIукIэгъум къыщыгущыIагъэх. Искусствэм лъэпкъхэр зэрэзэфищэхэрэм имэхьанэ къыхагъэщызэ, къэралыгъо екIолIакIэ Iофым зэрэфашIырэм яеплъыкIэхэр къыраIолIагъэх.
— Абхъазым исурэтышIхэм я Союз илъэс 80 хъугъэ, Адыгеим исурэтышIхэм я Союз илъэс 40 ныIэп ыныбжьыр, — къытиIуагъ тиреспубликэ исурэтышI цIэрыIоу Хъуажъ Рэмэзан. — Абхъазхэм ялъэпкъ искусствэ тапэ ишъыгъ. Живописыр, графикэр, бгъэфедэн плъэкIырэ искусствэр, скульптурэр, фэшъхьафхэри Абхъазым шIукIэ щашIэх. Адыгеими ащ фэдэ жанрэхэм чIыпIэ хэхыгъэ щагъоты. Тэри скульптурэм нахь куоу Iоф датшIэу тыублагъэ. Зэкъош республикэхэм яискусствэ зэфэдэныгъэу хэлъхэри къыхэтэгъэщых.
Абхъазым культурэмкIэ иминистрэу Эльвира Арсалия абхъаз лъэпъкъ шъуашэу ышIыгъэхэр музеим къыщагъэлъагъох. Адыгеим имызакъоу, дунаим щызэлъашIэрэ сурэтышI-модельерэу СтIашъу Юрэ къызэрэтиIуагъэу, Абхъазым илъэпкъ IэпэIасэхэм уагъэгъуазэ. Эльвира Арсалия ишъуашэхэм псэ апытэу къыпщэхъу. В. Цвижбэ, В. Джения, В. Хурхумал, Б. Джапуа, К. Черкезия, фэшъхьаф сурэтышIхэм яIэпэIэсэныгъэ узыIэпещэ.
В. Джения къызэрэтиIуагъэу, сурэт пэпчъ тарихъ иI.
ЕМТIЫЛЪ Нурбый.