Пщынаом, «Ошъадэм» къяжэх
Адыгэ Республикэм икупышхо Зэхэт Араб Эмиратхэм (ОАЭ) концертхэр къыщитынэу мэзаем и 25-м гъогу техьэ. Пщынэо цIэрыIоу ЛIыбзыу Аслъан кIэщакIохэм зэращыщыр къыдэтлъыти, гущыIэгъу тыфэхъугъ.
— Адыгэ республикэ общественнэ организациеу «Этникэм» илъэси 4 хъугъэу сырипащ. Лъэпкъ культурэм изыкъегъэIэтыжьын фэгъэхьыгъэ Iофыгъохэр тэгъэцакIэх, — къытиIуагъ ЛIыбзыу Аслъан. — Тихэгъэгу щыкIорэ зэнэкъокъум зэхэщакIохэм тыкъыщыхагъэщыгъ, грантыр къэзыхьыгъэхэм тащыщ.
— ОАЭ-м шъукIоным сыда егъэжьапIэ фэхъугъэр?
— США-м иуниверситетхэм ащыщэу ОАЭ-м итым зэзэгъыныгъэ дэтшIыгъ. Адыгэу, нэмыкI лъэпкъхэу къэралыгъом исхэм тиискусствэ ибаиныгъэ ядгъэлъэгъу тшIоигъу.
— Республикэм икIыщт купым тыщыгъэгъуазэба.
— Мыекъуапэ изэхэт IофшIапIэу «Ошъадэм» хэтхэу «Синдикэр», «Ащэмэзыр», «Бэгъэуджыр» концертхэм ахэлэжьэщтых.
— Аслъан, пщынэмкIэ бгъэжъынчыщт лъэпкъ мэкъамэхэр бэ мэхъуха?
— Сипчыхьэзэхахьэхэм ащызэхэпхыгъэхэр, кIэу зэзгъэфэгъэ едзыгъохэр пщынэмкIэ къезгъэIощтых. Тэ анахьэу тызпылъыщтыр адыгэ лъэпкъ искусствэр нахьышIоу зэрядгъэшIэщтыр ары.
— «Ислъамыер», «Къашъор», «Адыгэ зэфакIохэр», нэмыкI лъэпкъ орэдыжъхэр уирепертуар хэтых. КъышъодэIущтхэр шъошIэха?
— Къэралыгъом ипащэхэр, Урысыем ихэбзэ лIыкIохэр, искусствэр зышIогъэшIэгъонхэр къытэжэх.
— «Ошъадэм» ипащэу, Адыгэ Республикэм изаслуженнэ артисткэу Едыдж Викторие къытиIуагъ тиартистхэр концертхэм афэхьазырхэу гъогу зэрэтехьэхэрэр.
— «Ащэмэзым» ихудожественнэ пащэу, Адыгеим культурэмкIэ изаслуженнэ IофышIэу Бастэ Асыети тигъус. «Ащэмэзым» ижъырэ орэдхэр къеIох. «Синдикэр» дахэу къэшъощт, «Бэгъэуджым» адыгэ орэдышъохэр музыкальнэ Iэмэ-псымэхэмкIэ къыригъэIощтых.
— Концертым нэмыкIэу зэхахьэхэр шъуиIэщтха?
— Кавказ икIыгъэхэм, тилъэпкъэгъухэу ОАЭ-м щыпсэухэрэм зэIукIэгъухэр адытиIэ- щтых. Адыгэм идунай зэрэгъэшIэгъоныр къафэтIотэщт.
— Бзэр тшIокIоды, тымакI…
— Хьау. Тытхьаусыхэнэу, агу къызэдгъэгъунэу ОАЭ-м тыкIорэп. Урыгушхонэу адыгэхэм гъогу шIагъо къакIугъ, тилъэпкъ икультурэ, иискусствэ, спортым илIыхъужъхэм, нэмыкIхэм яхьылIэгъэ къэбархэм зядгъэушъомбгъущт. Тэри зядгъэшIэщт, ежьхэри нахьышIоу зэдгъэшIэщтых.
— Купэу ОАЭ-м кIощтыр нэбгырэ 29-рэ мэхъу.
— Ары, зэкIэми пшъэрылъ хэхыгъэ яI. ОАЭ-м ыуж, Иорданием, фэшъхьафхэм концертхэр къащыттыщтых.
— Республикэ общественнэ организациеу «Этникэм» Мыекъуапэ пчыхьэзэхахьэу щыриIагъэм теплъыгъ. Олимпиадэ джэгунхэм дышъэр къащызыхьыгъэ Мудрэнэ Бислъан ащ къежъугъэблэгъагъ.
— ЦIыф цIэрыIохэм, лъэпкъ искусствэр лъагэу зыIэты зышIоигъохэм тапэкIи таIукIэщт, тызэгъусэу тимурадхэм тафэкIощт.
— Шъуимурадхэр къыжъудэхъунхэу шъуфэтэIо.
— Тхьауегъэпсэу.
Сурэтым итхэр: тиартистхэм мэкъэгъэIоу ОАЭ-м щагъэфедэхэрэм ащыщ.