Осэшхо къафашIыгъ
Нэгъэплъэ Аскэрбый адыгэхэм, лъэпкъэу къызыхэкIыгъэм, тарихъэу къыкIугъэм яхьылIагъэу кино тырехы. ИIофшIагъэхэм цIыфхэм лъытэныгъэ къафашIы, шэн-хэбзэ дахэу адыгэхэм зэрахьэщтыгъэхэр къащегъэлъагъо, ныбжьыкIэгум ахэм зафикъудыиным, зыныбжь хэкIотагъэм ыгу къыгъэкIыжьыным фещэх.
Гупшысэ куухэр зыхэлъхэ фильмэхэр тезыхырэ режиссерыр тилъэпкъэгъухэу Тыркуем щыпсэухэрэм рагъэблэгъагъ ыкIи иIофшIагъэхэр IэкIыбым щыIэ адыгэхэм аригъэлъэгъугъэх. Тыркуем щыIэ Адыгэ хасэхэм ялIыкIохэр Iофтхьабзэм кIэщакIо фэхъугъэх.
Тыркуем зыщэIэм Нэгъаплъэм гупшысэу ышIыгъэхэмкIэ «Адыгэ макъэм» къыдэгощагъ. Пстэуми апэу игущыIэ къызэрэригъэжьагъэр Iофтхьабзэр зэхэщагъэ хъунымкIэ IэпыIэгъу къыфэхъугъэхэм ацIэ къыриIоныр, ахэм зэрафэразэр къыхигъэщыныр ары. Стамбул дэт Адыгэ Хасэм ипащэу Шэуджэн Умид, КАФФЕД-м хэтэу Къушъхьэ Догъан, илъэсыбэм зыщыщ адыгэ лъэпкъым ыцIэ дахэкIэ зыгъэIугъэ Нэгъой Яшар Iофтхьабзэр Тыркуем щырекIокIыным иамалхэр зэрахьагъэх. КАФФЕД-м ипащэу Хьагъундэкъо Яшар джащ фэдэу иIахьышIу хишIыхьагъ. Тыркуем къикIыжьи ихэкужъ къэзыгъэзэжьыгъэ Чэтэо Ибрахьимэ Адыгеим IэпыIэгъу къыщыфэхъугъ.
Нэгъэплъэ Аскэрбый илъэс зэкIэлъыкIохэм Iоф зыдишIэгъэ фильмхэр IэкIыбым щыIэхэ тилъэпкъэгъухэм уасэ къафашIын амал яIагъ. «Черкесия», «Черкесия. Хабзэ», «Черкесия. Чужбина», «Черкесия. Возвращение», «Черкешенка» зыфиIохэрэм ащыщхэ пычыгъохэм, «Шагди» зэрэпсаоу яплъыгъэх. ТыркубзэкIэ къызэрэкIатхэрэм ишIуагъэкIэ, адыгабзэр икъоу зымышIэхэрэри пэрыохъу ямыIэу еплъынхэ алъэкIыгъ.
— Мазаем и 2-м Стамбул сыщыIагъ, — къытфеIуатэ Аскэрбый. — Апэрэ пчыхьэм Азиатскэ лъэныкъом тет Адыгэ Хасэм фильмхэм щяплъыгъэх. ЯтIонэрэ пчыхьэм Европэ лъэныкъом щыIэхэ кинотеатрэхэм ащыщ къыщыдгъэлъэгъуагъ. Ящэнэрэ мафэм къалэу Адана сыбыбыгъ.
Нэужым къалэхэу Мараш, Къайсэр, Анкара, Бурса Нэгъаплъэм къыкIухьагъэх. ТыдэкIи тIысыпIэ лые щымыIэжьэу цIыфхэр къыщызэрэугъоищтыгъэх. Фильмхэм зяплъыхэхэ нэуж зэдэгущыIэгъухэр ашIыщтыгъэх. Тилъэпкъэгъухэм алъэгъугъэм гупшысэхэу аригъэшIыгъэхэр къыраIотыкIыщтыгъэх, ядунэееплъыкIэкIэ режиссерым дэгуащэщтыгъэх.
— Адыгэ лъэпкъыр къэтыухъумэныр, ныбжьыкIэхэр къызыхэкIыгъэм уасэ фашIыным, якультурэ, яшэн-хабзэ ашIэнхэм фэщэгъэнхэр ары анахьэу Iофтхьабзэм мэхьанэу иIагъэр, — къеIуатэ Аскэрбый. — Яхэку къызэряжэрэр агурызгъэIоным ыуж ситыгъ. ТызэшIокIодыным ищынагъо зэрэщыIэр, зы хэку тыщыпсэуным кIочIэ ин зэриIэр зэхязгъэшIэным сыпылъыгъ.
Нэгъэплъэ Аскэрбый режиссер сэнэхьат иIэп, фильмэ техыным феджагъэп, ау гъэсэныгъэ дэгъоу ыгъотыгъэм ыкIи лъэпкъым шIулъэгъоу фыриIэм ащ фэдэ амал къыраты. Телефильмхэм ягъэуцун фэIазэхэ цIыфхэм зэралъытэрэмкIэ, щыIэныгъэм анахь уасэ щызиIэр къыбгурыIоным пае ащ тырихыгъэхэм уяплъын фае. Мыщ иIофшIагъэхэм узыгъэгупшысэн, тарихъыр нэгум къыкIэзыгъэуцон чIыпIабэ ахэт.
— 2007-рэ илъэсым апэрэ фильмэу тесхыгъэр къыдэкIыгъ, — къытфеIуатэ Аскэрбый. —Нэужым адыгэхэр цIыф лъэпкъ зэфэшъхьафхэм къахэзыгъэщыхэрэ шэн-хэбзэ дахэхэу ахэлъхэм афэгъэхьыгъэ фильмэ къыдэзгъэкIыгъ. Ящэнэрэ IофшIагъэу «Черкесия. Чужбина» зыфиIорэр тесхы зэхъум, Грузием щыщ режиссер цIэрыIоу Вахтанг Микеладзе Iоф дэсшIагъ. Ащ бэмэ сызэрафигъэсагъэр къыхэзгъэщы сшIоигъу. Анахьэу сынаIэ зытезгъэтын фэе лъэныкъохэр къысфигъэнэфагъэх, опытэу IэкIэлъымкIэ къыздэгощагъ.
Мы уахътэм Нэгъэплъэ Аскэрбый анимационнэ фильм тырихынэу пылъ. Адыгэ пшысэу, таурыхъыжъэу къыднэсыжьыгъэхэм атехыгъэу ар гъэпсыгъэщт, сценариер тхыгъахэ. СурэтышIым персонажхэр къызишIхэкIэ, макъэ кIагъэуцощт, нэужым анимациер ашIыщт. Къыхэгъэщыгъэн фае серие зэкIэлъыкIоу техыгъэ фильмэр адыгабзэкIэ къызэрэдэкIыщтыр.
Гъонэжьыкъо Сэтэнай.