Адыгэ Республикэм и ЛIышъхьэу КъумпIыл Мурат кIэщакIо зэрэфэхъугъэм тетэу гъот макIэ зиIэ унагъохэм апае республикэ бюджетым зэтыгъо ахъщэ IэпыIэгъоу къыхагъэкIырэм Адыгеим щыхэхъуагъ.

Адыгеим и ЛIышъхьэ иунашъо къэралыгъом исхэм ящы­IэкIэ-псэукIэ зыкъегъэIэтыгъэнымкIэ Урысые Федерацием и Президент жъоныгъуакIэм ышIыгъэ унашъом щыгъэнэфэгъэ пшъэрылъхэм ягъэцэкIэн тегъэпсыхьагъэу щыт.

Адыгэ Республикэм и Премьер-министрэу Александр Наролиныр зыкIэтхэжьыгъэ унашъом къызэрэщыдэлъыта­гъэмкIэ, Iоф зышIэн зылъэкIырэ нэбгырэ пчъагъэу унагъом исым елъытыгъэу ахъщэ IэпыIэгъум процент 70-м нэсэу афыхагъэхъощт.

Адыгэ Республикэм IофшIэнымрэ социальнэ хэхъоныгъэм­рэкIэ и Министерствэ къызэ­ритыгъэмкIэ, гъот макIэ зиIэхэм ащ фэдэ IэпыIэгъу къаратыным пае IофшIэнымкIэ ыкIи цIыфхэр социальнэу ухъумэ­гъэнхэмкIэ Гупчэм ялъэIу тхылъ рахьылIэн фае.

Республикэм ис унагъоу гъот макIэ зиIэм илъэсым зэ ащ фэдэ IэпыIэгъу къызэрэратырэр. Сомэ миллион 17 фэдиз хъурэ ащ фэдэ ахъщэ IэпыIэгъу гъэрекIо гъот макIэ зиIэ унэгъо мини 7-м ехъумэ аIукIагъ.

Республикэм ис цIыф куп заулэмэ нэмыкI шIыкIэкIи IэпыIэгъу афэхъух. Адыгеим щыпсэурэ нэбгырэ мин 85-м ехъумэ бюджет зэфэшъхьафхэм къахэкIырэ ахъщэ Iэпы-Iэгъу къаIокIэ. Ахэм ащыщэу нэбгырэ мин 49,5-рэ фэдизмэ ахъщэ IэпыIэгъоу аратырэр рес­публикэ бюджетым къыхэкIы, къытыгъ Адыгэ Республикэм и ЛIышъхьэ ипресс-къулыкъу.