Шъолъырхэм хэхъоныгъэ аригъэшIыщт
2019-рэ илъэсым мэзаем и 13-м Дмитрий Медведевыр N 207-р зытет унашъом кIэтхагъ. 2025-рэ илъэсым нэс Урысые Федерацием ишъолъырхэм хэхъоныгъэ зэрашIыщт Стратегиер ащ щаухэсыгъ. СтратегиемкIэ гухэлъ шъхьаIэр шъолъыр зэфэшъхьафхэм арысхэр щыIэкIэ-псэукIэ амалэу яIэмкIэ нахь зэпэблагъэ шIыгъэнхэр ары.
— Урысые Федерацием хэхъоныгъэ зэришIыщт Стратегиер тэ къызкIыхэтхыгъэр шъолъыр пэпчъ хэхъоныгъэ ышIынымкIэ амалэу иIэхэр къыхэдгъэщынхэм, цIыфхэм ящыIакIэ нахьышIу тшIыным апай. Шъугу къэсэгъэкIыжьы 2018-рэ илъэсым Урысые Федерацием и Президент ащ фэдэ пшъэрылъ къызэрэтфишIыгъагъэр. Ащ фэдэ документым сэ сыкIэтхэжьыгъ, — къыщиIуагъ Дмитрий Медведевым Шъачэ щыкIогъэ форумым.
Стратегием диштэу макрорегион 12 зэхащагъ. Ахэр Гупчэ, Гупчэ-Черноземнэ, Темыр-КъохьэпIэ, Темыр, Къыблэ, Темыр-Кавказ, Волгэ-Камскэ, Волгэ-Уральскэ, Урал-Сыбыр, Къыблэ-Сыбыр, Ангарэ-Енисей, КъокIыпIэ Чыжьэ макрорегионхэр ары.
Къыблэ макрорегионым хэхьэх Адыгэ Республикэр, Къалмыкъ Республикэр, Республикэу Къырым, Краснодар краир, Астрахань, Волгоград, Ростов хэкухэр, Севастополь.
Адыгеим и ЛIышъхьэу КъумпIыл Мурат къызэриIуагъэмкIэ, Стратегием изэхэгъэуцон Адыгеир чанэу хэлэжьагъ. Адыгэкъалэ, Тэхъутэмыкъое, Теуцожь районхэр зыхэхьэрэ Краснодар агломерацием изэхэщэни ащ къыщыдэлъытагъ.
КъумпIыл Мурат зэрилъытэрэмкIэ, зэгъусэхэу стратегическэ планированием зэрэдэлажьэхэрэм шъолъырхэм амал аригъэгъотыщт энергетикэмрэ транспортымрэ алъэныкъокIэ инфраструктурэм фэгъэхьыгъэ Iофыгъохэр зэшIуахынхэмкIэ, хэхъоныгъэ лъэныкъуакIэхэмкIэ шIыгъэнхэмкIэ.