Литературэр ищыIэныгъагъ
ШIэныгъэлэжьышхоу, литературоведэу, критикэу, тхакIоу ЩэшIэ Казбек къызыхъугъэр мэзаем и 18-м илъэс 80 хъугъэ.
ЛIы гъэсэгъэ-еджэгъэшхом ыцIэкIэ Адыгэ Республикэм и Лъэпкъ тхылъеджапIэ мэфэкI къэгъэлъэгъонэу «Гордость адыгской словесности» зыфиIорэр къыщызэIуахыгъ. Ар К. ЩашIэм ищыIэныгъэ, итворчествэ, иIофшIэкIагъэр къыриIотыкIэу щыт. Мэхьанэ зиIэ мэфэкI къэгъэлъэгъоным Iоф дэзышIагъэхэр тхылъеджапIэм краеведениемрэ литературэмрэкIэ иотдел иIофышIэхэр ары. Отделым ипащэу ГъукIэлI Фатимэ къызэриIуагъэмкIэ, шIэныгъэлэжьым илитературоведческэ тхылъхэр, критикэ тхыгъэхэр, ежь ышъхьэкIэ ихудожественнэ тхылъхэр анахь къызкIэупчIэхэу агъэфедэхэрэм ащыщых. Мыхэм студентхэм ямызакъоу, ныбжь зэфэшъхьафхэм арытхэу адыгэ литературэм исэнэхьаткIэ епхыгъэхэр, егъэджакIохэр, шIэныгъэмкIэ зиушэтыныр зыпэ илъхэр, аспирантхэр сыдигъуи афэныкъох; литературэр зыгукIэ зикIасэхэми ЩашIэм итхыгъэхэр зэрагъашIэх, ашIогъэшIэгъоных.
Тхылъ къэгъэлъэгъоныр Iахь заулэу гощыгъэ: шIэныгъэлэжьым ищыIэныгъэ гъогу ыкIи итворчествэ зэрэуцугъэр къэзыIуатэхэрэр; ежь ишIэныгъэ IофшIэгъэ пчъагъэхэр – статьяхэр, монографиехэр, сборникхэр, тхылъхэр. Ахэр адыгабзэкIэ ыкIи урысыбзэкIэ Москва, Мыекъуапэ къащытырадзагъэх.
Литературэу ежь юбилярым фэгъэхьыгъэри, цIыф зэфэшъхьафхэм Казбек игушъхьэлэжьыгъэ къыраIуалIэхэрэри мыщ хэлъых.
Анахь унаIэ зытеозгъадзэхэрэр Казбек ихудожественнэ произведениехэу илъэс зэфэшъхьафхэм ытхыгъэхэр арых: «Ос фаб», «Бжыхьэ чэщ гумэкIхэр» зыфиIоу усэхэр, повестьхэр зыдэтыр, иусэ тхылъэу «Ыуасэр гъашIэ», изэдзэкIыгъэхэр, ипьесэу театрэм щагъэуцугъэ «Шъозэбэныр».
МэфэкI къэгъэлъэгъонэу ЩэшIэ Казбек иилъэс 80-кIэ агъэхьазырыгъэр, лъэпкъ литературэм имызакъоу, Темыр Кавказ литературэр ыкIи хэгъэгу литературэр нахь пшIэнхэмкIэ, зэхэпфынхэмкIэ IэпыIэгъу дэгъу. ЗэлъашIэрэ шIэныгъэлэжьым литературэр ищыIэныгъэу, ащ иилъэсхэр, имафэхэр епхыгъэу зэрэщыIагъэр, шIэныгъэшхо зэрэкъолъыгъэр, зэрилэжьыгъэр ыкIи къызэрэщинагъэр къэгъэлъэгъоным джыри нахь къыпфызэIуехы. ШIур зышъхьамысыжьэу зылэжьыгъэ гъэсэгъэшхо акъылышIоу ЩэшIэ Казбек шъхьащэ фыуегъэшIы.
Мамырыкъо Нуриет.