Тарихъыр зыпхырыщыгъэ сурэтхэр
СурэтышI цIэрыIоу, зиIофшIагъэхэм гупшысэ куу ащыпхырызыщырэ Дыгъу Айтэк итворчествэ зышIогъэшIэгъонхэм АР-м и Лъэпкъ тхылъеджапIэ ащыIукIагъ.
Зэхахьэм къекIолIагъэх Адыгэ къэралыгъо университетым иIофышIэхэр, тхылъеджэхэр, къэбарлъыгъэIэс амалхэм ялIыкIохэр, Дыгъу Айтэк итворчествэ лъытэныгъэ фэзышIырэ цIыфхэр. Лъэпкъ тхылъеджапIэм иIофышIэу Кучмэз Аминэт Iофтхьабзэм кIэщакIо фэхъугъ ыкIи ар зэрищагъ.
Дыгъу Айтэк къызхэкIыгъэ лъэпкъымкIэ убых. 1973-рэ илъэсым Тыркуем ит къалэу Самсун къыщыхъугъ. Джыри сабый цIыкIузэ сурэт ышIыным фэщагъэ хъугъагъэ. Мы лъэныкъомкIэ шIэныгъэу IэкIэлъхэм ахигъэхъон гухэлъ иIэу 1990-рэ илъэсым Самсун дэт университетым ихудожественнэ факультет чIахьэ. Нэужым, илъэс тешIагъэу, ичIыгужъ къегъэзэжьы. ИскусствэхэмкIэ Адыгэ республикэ колледжэу Тхьабысымэ Умарэ ыцIэ зыхьэу Мыекъуапэ дэтым иеджэн щылъыпедзэжьы.
— Лъэныкъо гъэшIэгъонхэр Айтэк иIофшIагъэхэм къащегъэлъагъо. Узыгъэгупшысэу ахэлъыр макIэп, — къытфеIуатэ Кучмэз Аминэт. – Ахэм республикэм щыпсэурэ цIыфхэр нахь благъэу нэIуасэ афэтшIынхэр, итворчествэ щыдгъэгъозэнхэр тимурад.
СурэтшIыным зэрэфэкъулаим дакIоу, Айтэк илъэпкъ итарихъ дэгъу дэдэу щыгъуаз, культурэр, шэн-хабзэхэр ешIэх, елъытэх. Айтэк илъэси 3 ыныбжьыгъ къэлэмыр ыIыгъэу тхьапэм сурэтхэр тыришIыхьэхэ зэхъум. Ежь къызэриIотэжьырэмкIэ, джыри еджакIи тхакIи ышIэщтыгъэп, ау къэлэмыр IэкIэкIыщтыгъэп.
— Къалэхэр, къэралыгъо зэфэшъхьафхэр къэскIухьанхэр сикIас. Къэли 120-м ехъумэ сащыIагъ, — зэхахьэм къекIолIагъэхэм къафеIуатэ Айтэк. — ЗекIо гъогум сытетэу гупшысэу къысшъхьащыорэмэ къэлэмыр къысагъаштэ, зэрэхъурэри сымышIэу сурэтыр тхьапэм къекIу. Сэ зызщыслъэгъужьырэ IофшIагъэ сиI. Ар зэрэшIыгъэ шIыкIэм, къирыIотыкIырэ гупшысэм сищыIэныгъэ къегъэлъагъоу къысщэхъу.
СурэтышI IэпэIасэм иIофшIагъэхэм ащыщхэр Iофтхьабзэм къырихьылIагъэх. Ахэм къекIолIагъэхэр нэIуасэ афэхъугъэх, гупшысэу апхырыщыгъэхэр зэхашIэн амал яIагъ. НахьыбэрэмкIэ ахэр зыфэгъэхьыгъэхэр адыгэ лъэпкъыр, тарихъыр ары. Айтэк къэлэмыр дэгъоу зэригъэIорышIэрэм дакIоу сурэттехынми фэкъулай. Зэхахьэм къекIолIагъэхэм ар агъэунэфыгъ.
— Сурэтхэм тяплъы зыхъукIэ, итыр зыщыхъугъэ охътэ чыжьэм тыхэхьагъэ фэдэу къытщэхъу. Ащ фэдэу гум нэсэу нэгухэр, пкъыгъохэр сыдэущтэу пшIынхэ плъэкIыра? — къыкIэупчIэ Iофтхьабзэм къекIолIагъэхэм ащыщ.
— Сурэтыр сшIынэу зезгъажьэкIэ, зэкIэ ежь-ежьырэу сигупшысэ къыхэхьэ. СыгукIэ слъэгъугъэхэр тхьапэм есэгъэкIужьых, — къеIуатэ Дыгъу Айтэк. – Къыхэзгъэщы сшIоигъу сурэтышIым шIэныгъэу IэкIэлъым къыщыуцу зэрэмыхъущтыр. ЫпэкIэ лъыкIотэн, тарихъым еджэн, музейхэр къыкIухьанхэ фае.
Айтэк иIофшIагъэхэр хьакIэщхэм, шхапIэхэм, нэмыкI чIыпIэхэу адыгэ тарихъыр зыщагъэлъапIэхэрэм ащыплъэгъунхэ плъэкIыщтых. Iофтхьабзэм къекIолIагъэхэр ашIогъэшIэгъонэу сурэтхэм яплъыгъэх, упчIэхэр авторым ратыгъэх.
Гъонэжьыкъо Сэтэнай. Сурэтхэр Iэшъынэ Аслъан тырихыгъэх.