«АГУ-Адыиф» Мыекъуапэ — «Ростов-Дон» Ростов-на-Дону — 18:35 (11:17). Мэзаем и 15-м спорт Унэшхоу Кобл Якъубэ ыцIэ зыхьырэм щызэIукIагъэх. Зезыщагъэхэр: Андрей Будагов, Руслан Ханмагомедов. «АГУ-Адыиф»: къэлэпчъэIутхэр: Толмачева, Кушнырь, Баскакова; ешIакIохэр: Васильева — 5, Кириллова — 3, Дворцевая — 5, Загайко — 2, Краснокутская, Долина, Неупокоева — 1, Зубова, Кучеренко — 1, Казиханова, Дмитриева — 1, Пуленко. «Ростов-Доным» къыхэщыгъэхэр: Сень — 7, Макеева — 7, Кожокарь — 6, Судаква — 3, Маслова — 3, Адинг — 2, Петрова — 2, Бобровникова — 2, Калиниченко — 2, Таженова — 1.

Хэгъэгум ибзылъфыгъэ командэ анахь лъэшхэр зыхэт купым апэрэ чIыпIэри «Ростов-Доным» щиIыгъ. «Адыифыр» ауж къи­нэхэрэм ащыщ. Арэу щытми, ешIэгъум иапэрэ такъикъ 15 за­ухым, текIоныгъэр зыхьыщтыр къэшIэгъошIугъэп. Пчъагъэр зэ­рэлъыкIуатэщтыгъэр: 0:2, 3:3, 4:4, 7:8.

Алиса Дворцеваям ухъумакIор къызэринэкIи, хъагъэм Iэгуаор дахэу ридзагъ — 8:8. Марина Судаковам, Анна Сень тикъэла­пчъэ Iэгуаор зырызэ къыдадзэ. А. Загайко банэзэ пчъагъэм хе­гъахъо шъхьае, гумэкIыгъоу тиIэхэм къакIичырэп.

Апэрэ едзыгъор 17:11-у «Рос­тов-Доным» ыхьыгъ. ТиешIакIохэу В. Долинар, И. Неупокоевар, фэшъхьафхэри мэгуIэх, ау зэIу­кIэгъум къырыкIощтыр тэркIэ нахь хьылъэ мэхъу. Линием ще­шIэрэ М. Васильевар хэпшIыкIэу къахэщы, банэзэ хъагъэм Iэ­гуаор редзэ. М. Петровар М. Васильевам къыпэуцу. ГъэшIэгъоныр, нэ­бгыритIуми ямайкэхэм N 7-р атедзагъ. Майя Петровар Урысыем ихэшыпыкIыгъэ командэ хэт. Ухъумэн Iофхэр цыхьэшIэгъоу егъэцакIэх, ыпэкIэ илъынэуи игъо ефэ.

М. Судаковар, А. Сень, нэ­мыкI­хэри Урысыем игандбол хэшыпыкIыгъэ командэ хэтых, щысэ атепхынэу ешIэх. «Рос­тов-Доным» «Адыифыр» непэ текIон зэримылъэкIыщтыр зэIукIэгъум иятIонэрэ едзыгъо къыщылъэ­гъуагъ. ХьакIэхэм якомандэ опыт зиIэу хэтыр бэ. Зым зыр зэбли­хъугъэми, зэнэкъокъум лъэшэу къыхэщырэп.

«Ростов-Доным» икъэлэпчъэ­Iутэу Галина Мехдиевар ятIонэрэ едзыгъом ешIапIэм къихьагъ, ащи IэпэIэсэныгъэ дэгъу къыгъэ­лъэгъуагъ. «Адыифыр» псынкIэу ыпэкIэ илъынэу, ухъумакIохэр ыгъэгумэкIынхэу тыфэягъ шъхьае, ащ фэдэ ешIакIэм зыфигъэса­гъэгоп.

Пресс-зэIукIэр

Майя Петровам, нэмыкIхэм къызэрэтаIуагъэу, «Ростов-Доныр» дышъэм фэбанэ. «Адыифым» итренер шъхьаIэу Александр Реввэ Марина Васильевар тиешIакIохэм къахигъэщыгъ. Уры­сыем ихэшыпыкIыгъэ командэ хэтэу Ксения Дьяченкэр зэрэ­сымаджэм къыхэкIэу зэIукIэгъум хэлэжьагъэп. Мэзаем и 24-м «Адыифыр» «Алиса» Уфа Мые­къуапэ щыIукIэщт, тикомандэ текIоныгъэр къыдихыщтэу тэгугъэ.