Илъэхъан ицIыфыкIагъ
ЗэлъашIэрэ шIэныгъэлэжьышхоу, кIэлэегъаджэмэ якIэлэегъэджэжьэу, литературоведэу ыкIи критикэу, тхакIоу, усакIоу, драматургэу ЩэшIэ Казбек иуахътэ ицIыфыкIагъ, гупшысэкIо иныгъ. ЩыIагъэмэ, мы мафэхэм къызыхъугъэр илъэс 80 хъущтыгъэ.
ЦIыфышIум идунай зихъожьыгъэр жъоныгъокIэ мазэм илъэси 4 мэхъу, ау зышъхьамысыжьэу, лъэпкъым шIур фэзылэжьыгъэр, ныбжьырэу игушъхьэ-гупшысэ лэжьыгъэкIэ къытхэтыщт.
ЩэшIэ Казбек иуахътэ ицIыфышхуагъ, шIэныгъэ лэжьыгъэу зэIуигъэкIагъэр къыгъэшIагъэм елъытыгъэмэ, бэкIэ нахьыб. ЫцIэ къепIо къодыемэ, лIым иакъыл зынэсыщтыгъэр, игупшысэ икууагъэ Адыгеим имызакъоу, тыдэрэ чIыпIэу лъэпкъ шIэныгъэм уасэ зыщыратырэ пэпчъ ащызэлъашIэ. Пшъэрылъ инэу иIагъэр — шIэныгъэ лъэгапIэм екIугъэныр, шIэныгъэ нэфыпсымкIэ нэмыкIхэр уIэшыгъэнхэр — щытхъу хэлъэу зэшIуихыгъ. Ыгуи, ыпси зыфэгъэзэгъэ наукэм, зэрэшIоигъуагъэу, хигъэхъуагъ, зыкъыригъэIэтыгъ, лъэпкъ литературэм готэу хэгъэгу ыкIи дунэе литературэм игупшысэ лэжьыгъэкIэ анэсыгъ, игъашIэ щыщэу илъэс 50 Казбек наукэм хилъхьагъ, ишIушIагъэ гъунэнчъ.
Казбек ищыIэныгъэ ыкIи итворческэ гъогу афэгъэхьыгъэу тхыгъэ макIэп щыIэр. Ахэр зэкIэ иныбджэгъу шIэныгъэлэжьхэу, чыжьэрыплъэхэу Къуныжъ Мыхьамэт, ЛъэпцIэрышэ Хъалидэ, Пэнэшъу Сэфэр, Пэнэшъу Уцужьыкъо, Мамый Руслъан, Бэчыжъ Лейлэ, ХъокIо Фатимэ, Цуамыкъо Тыркубый, Цуекъо Нэфсэт, нэмыкIхэм ятхылъхэм, ятхыгъэхэм ащагъэунэфыгъ. Арэу щытми, ЩэшIэ Казбек къызыхъугъэ мафэм ехъулIэу илъэпкъ, хэгъэгум, цIыфхэм шIоу афилэжьыгъэм кIэкIэу игугъу къэтшIы тшIоигъу.
ИкъэхъукI, иеджакI
ЩэшIэ Казбек Хьисэ ыкъор Теуцожь районым итыгъэ къуаджэу Къэзэныкъоежъым (хы IэрышIым ычIэ хъугъэм) мэзаем и 18-м, 1939-рэ илъэсым къыщыхъугъ. Къызэрыхъухьагъэр мэкъумэщышIэ-лэжьэкIо унэгъо зэфэшIыгъагъ. Адыгэ чылэгъуабэмэ зыкIэ афэдэу, мы къуаджэри псыхъом кIэрысыгъ унэгъуи 100 фэдиз хъоу, зы урамышхо закъо кIоцIырыкIэу. ЗышIэхэрэм къызэраIотэжьырэмкIэ, къуаджэр мыиныгъэми, лъэшэу дэхагъэ: ыбгъуитIукIэ мэзым къыуцухьэу; хъупIэхэр хъоо-пщаухэу, губгъохэр лэжьыгъэкIэ зэлъыпкIагъэхэу. Ау Казбек уахътэу къызхэхъухьагъэр псынкIагъэп, адыгэ лъэпкъыми тарихъ хъугъэ-шIэгъэ зэфэшъхьафхэм яфыртынэ жьызэпео къынэсыщтыгъ. «Хабзэм ипыйхэр» цIэу афашIи, тхылъ апалъхьи лажьэ зимыIэ цIыфыбэ загъэкIодыгъэр а охътэ дэдэр ары.
Казбек ащ дэжьым къэхъугъэкIэ къодыягъэми, адыгэхэр зэкIодылIэгъэхэ хъугъэ-шIагъэхэм нэужым бэрэ итхыгъэхэм ягугъу къыщишIыгъ. А пстэумэ ялъытыгъэу Казбек исабыигъо илъэхъан гъаблэм, зэошхом, егъэзыгъэ Iофыгъохэм зэтырагъэзыгъэ цIыфхэри зэрэгупсэфынчъагъэхэр, адыгэ хъулъфыгъабэ мыхэм зэрахэкIодагъэр, шъузабэхэм япчъагъэ зэрэбагъэр, ежь ятэшхэр заом зэрэщыфэхыгъэхэр, ятэу ащ къелыжьыгъэри зэо уIагъэхэм 1949-рэ илъэсым зэрахьыжьыгъэр къыIотагъ. Адыгэ бзылъфыгъэм ищэIагъэ зэрэиныр, илIыгъэ-гукIэгъу зэрэлъагэр, ны шIулъэгъум пэпшIын зэрэщымыIэр Казбек янэу Дахэ иобразкIэ ыгу ныбжьырэу къинагъ. Янэ ихъын-хьылъэ фигъэпсынкIэ шIоигъоу исабыигъо-кIэлэцIыкIугъом цIыф ымышIэу бэрэ хэкIыпIэмэ яусагъ ыкIи къыгурыIуагъ еджэн ыкIи гъэсагъэ хъун зэрэфаер. Джащыгъум щыIэныгъэр зэхифыным, хэткIи ар нахь гупсэфыпIэ-рэхьат шIыгъэным ежь ыкIуачIи хилъхьащт.
ЕджэнымкIэ сэнаущыгъэр кIалэм Тхьэм къыхилъхьагъэу къычIэкIи, а лъагъом дахэу техьагъ. 1964-рэ илъэсым Адыгэ къэралыгъо кIэлэегъэджэ институтым филологиемкIэ ифакультет дэгъу дэдэу къыухыгъ. Къэзэныкъое гурыт еджапIэм кIэлэегъаджэу, завучэу Iоф щишIагъ. ЕтIанэ иеджэн пидзэжьи, Москва дэт кIэлэегъэджэ институтым иаспирантурэ къыухыгъ. 1969-рэ илъэсым филологие шIэныгъэхэмкIэ кандидат, 1979-рэ илъэсым доктор хъугъэ.
1969-рэ илъэсым къыщегъэжьагъэу Адыгэ къэралыгъо кIэлэегъэджэ институтым кIэлэегъэджэ шъхьаIэу, доцентэу, урыс ыкIи IэкIыб хэгъэгу литературэмкIэ кафедрэм ипрофессорэу лэжьагъэ. 1982-рэ илъэсым къыщыублагъэу 2012-рэ илъэсым нэс Адыгэ къэралыгъо университетым урыс литературэмкIэ икафедрэ ипэщагъ. Мыекъопэ къэралыгъо технологическэ университетми мы IэнатIэр илъэс зэкIэлъыкIохэм щигъэцэкIагъ. Егъэджэн-гъэсэныгъэм готэу хэкум, республикэм ямызакъоу, Урысыем ичIыпIэ зэфэшъхьафхэм къарыкIыгъэхэу еджэ-пIэшхом щеджэхэрэр наукэм хэщэгъэнхэмкIэ ЩашIэм Iофышхо ешIэ, ахэм яIэшъхьэтетэу литературэм итемэ хьылъэ гъэшIэгъонхэм якъызэIухын зэдызэшIуахы. ШIэныгъэшхо зиIэ ЩэшIэ Казбек ныбжьыкIэ чанхэу, гупшысэкIэ амал инхэр зыIэкIэлъхэр къыхигъэщыгъэх ыкIи къыгъэнэфагъэх, литературэмкIэ хэгъэгум ишIэныгъэ хьасэ ыгъэбаигъ.
ЩэшIэ Казбек ытхыхэрэр 1961-рэ илъэсым къыщыублагъэу къыхиутыгъэх. Литературнэ-критическэ ыкIи литературоведческэ IофшIагъэхэр хэку, гупчэ ыкIи шъолъыр журналхэм къадэхьагъэх. Ахэр зэхэубытагъэхэу зыдэт тхылъхэр ыкIи монографиехэр адыгабзэкIи, урысыбзэкIи къыдигъэкIыгъэх. АдыгабзэкIэ къыхиутыгъэх «Уахътэм иджэмакъ» «Псэ зыпыт гущыIэхэр», «Шъыпкъэм игъогухэр» зыфиIохэрэр. ШIэныгъэ IофшIагъэхэр урысыбзэкIи къыдигъэкIыгъэх: «Художественный конфликт и эволюция жанров в адыгских литературах», «Ступени», «Живое слово», нэмыкIхэри.
Лъэпкъ гъэсэныгъэмкIэ гъэзагъэу Iоф ышIагъ, адыгэ литературэмкIэ хрестоматие я 11-рэ классхэм апае ЩэшIэ Казбек зэхигъэуцуагъ, ар тIогъогогъо къыдэкIыжьыгъ. ЩашIэм илитературнэ ыкIи критическэ IофшIагъэхэр, научнэ IофшIагъэхэм ащыщхэр гупчэ журналхэу «Наш современник», «Новый мир», «Дон» зыфиIохэрэм, гъэзетэу «Литературная Россия» ыкIи шъолъыр, республикэ гъэзетхэм къащыхиутыгъэх. Ахэм язакъоп фэукIочIыгъэр, ыгуи, ыпси зыхилъхьэгъэ художественнэ тхыгъэхэр къыIэкIэкIыгъэх. Ахэм ащыщых лирическэ повестэу «Ос фаб», усэхэр, повестьхэр дэтэу «Бжыхьэ чэщ гумэкIхэр» зыфиIохэрэр. ДраматургиемкIи Iоф ышIагъ, «Шъозэбэн» зыцIэ пьесэу ытхыгъэр Адыгэ къэралыгъо драмтеатрэм щагъэуцугъ. В. Шекспир идрамэхэу «Отелло» ыкIи «Король Лир» зыфиIохэу Казбек адыгабзэкIэ зэридзэкIыгъэхэр илъэс 35-кIэ узэкIэIэбэжьмэ Адыгэ театрэм къыщагъэлъэгъуагъэх.
2014-рэ илъэсым, К. ЩашIэм имэфэкI дахэ, ыныбжь илъэс 75-рэ зэрэхъугъэм ехъулIэу, ихэшыпыкIыгъэ тхыгъэхэр тхылъищ ушъагъэу зэхэтэу къыдэкIыгъэх, иусэхэр зыдэт поэтическэ сборникэу «Ыуасэр гъашIэ» зыфиIорэр 2015-рэ илъэсым къыхаутыгъ.
ЩэшIэ Казбек IофшIэкIо емызэщыжьэу, шIэныгъэр етIупщыгъэу зыуцэIущтыгъэ гъэсагъ. Иакъыл зэтеткIэ хьалэлэу, зафэу бэ зынэсыщтыгъэр, романыкIэу «Щылэ маз» ытхыгъ, ау къыдигъэкIынэу игъо фифагъэп. Зэчый ин зыхэлъыгъэ Казбек игупшысэ псыхьагъэхэр псынэкIэчъым фэдэхэу зэпымыоу къакIощтыгъэх, иунагъо рэхьати, гупсэфыгъуи, насыпи илъыгъ.
ЩашIэр ыгукIэ къэбзагъ, лъэпкъымкIи, цIыф къызэрыкIохэмкIи хьалэлыгъ, гукIэгъугъ, ишIушIагъэ гъунэнчъагъ. ШIу зышIэрэм шIу фыщылъ хабзэти, зэлъашIэрэ шIэныгъэлэжьышхом, тхакIом, литературоведым, критик цIэрыIом, цIыфышIум ифэшъошэ щытхъуцIэ лъапIэхэр къырапэсыгъэх. Казбек АР-м шIэныгъэхэмкIэ изаслуженнэ IофышIэшху, АР-м и Къэралыгъо премие шIэныгъэм ылъэныкъокIэ илауреат, Дунэе Адыгэ Академием иакадемикыгъ, ащ инаучнэ гупчэу Адыгеим щыIэм итхьамэтагъ. Адыгеим ишIэныгъэлэжьхэм я Союз ипэщагъ, естественнэ шIэныгъэхэмкIэ Урысые академием иакадемикыгъ. Медалэу «Адыгеим и Щытхъузехь» зыфиIорэр къыфагъэшъошагъ.
К. ЩашIэр УФ-м итхакIохэм я Союз 1982-рэ илъэсым къыщыублагъэу хэтыгъ. Казбек илъэпкъ, ихэгъэгу апаемэ, зэблэжьыщтыгъэп, шIур ыгъэунэфэу, ыгъэбагъоу щыIагъ. ГъэшIэ дахэр хэткIи щысэ ин. Казбек илъэуж тырэплъэ, тыкIырэплъы, тегъэгупшысэ, щыIэныгъэм цыхьэ ин фытигъэшIэу къытхэтыщт ыкIи игушъхьэкIэнкIэ къытэшIушIэщт.
ИIофшIэгъухэм, иныбджэгъухэм къыраIуалIэхэрэр
ШъхьэкIэфэныгъэ-лъытэныгъэр щытхъумэ анахь лъапI ыкIи зэгъэгъотыгъошIоп. Ощ фэдэ цIыфыбэр къыпфэныкъоныр, къыпщыгугъынхэр къэлэжьыгъошIоп. Ау ежь фэдэ цIыфыр изышIыкIэу, ащ шIоу фишIэщтыр зигупшысэм ар къыдэхъу. ЩэшIэ Казбек литературэр, адыгабзэр, лъэпкъ культурэр — зэкIэ щыIэныгъэр лъэшэу зилъапIэу, зикIэсагъэх. Ар къэIогъэ къодыеу щытэп, къыгъэшIэгъэ илъэсхэмкIэ, имафэ пэпчъкIэ къыушыхьатыгъ.
ШIэныгъэлэжь иныр, тхакIор, гупшысэкIо гъэшIэгъоныр псэкIэ гъашIэм зэрэхэтыр, зэрэзафэр, ишIэныгъи, иакъыл-амал дахи зэрэфэлъэкIэу хэгъэгум, илъэпкъ ыкIи лIэужхэм зэрафигъэIорышIагъэр, шъыпкъэм готэу зэрэпсэугъэр, иIофшIэгъугъэхэм, иныбджэгъугъэхэм ягущыIэ фабэхэу Казбек фэгъэхьыгъэу къаIуагъэхэм дэгъоу къыплъагъэIэсы.
ЗыцIэ къетIощтхэу, зигупшысэ кIэкIхэр къыхэдгъэщыщтхэр Темыр Кавказым ишIэныгъэлэжьых, шIэныгъэхэмкIэ IофышIэшхох, ау, гухэкIми, ахэтых ахэм непэ къытхэмытыжьхэр, ау ягущыIэ ыуасэ, мэхьанэу иIэр зыкIи къыкIичырэп.
РАН-м иакадемикэу Г. Гамзатовыр:
— Апэдэдэ Казбекрэ сэрырэ тызызэIукIагъэр я 70-рэ илъэсхэм якIэух ары. Тбилиси ар зыщыхъугъэр, Шота Руставели и Институт. Институтым идиректорэу, ыужым шIэныгъэхэмкIэ Грузинскэ академием бзэмрэ литературэмрэкIэ икъутамэ иакадемик-секретарыгъэу Георгий Цицишвили нэIуасэ тызэфишIыгъагъ. ЦIыфышIу гъэшIэгъонэу къычIэкIыгъ, псынкIэу тызэгурыIуагъ. Лъэшэу ащкIэ сыфэраз грузин тхакIоу ыкIи литературоведэу ЩэшIэ Казбек сыфэзгъэнэIосагъэм. Казбек зэчый дахэ, гулъытэ, цIыфыгъэшхо ыкIи гупшысэкIэ гъэшIэгъон зыIэкIэлъ гъэсэгъэшхуагъ. Темыр Кавказым икультурологхэм ыкIи литературоведхэм анахь къахэщыхэрэм ащыщэу сэлъытэ ЩэшIэ Казбек. Инаучнэ IофшIагъэхэр куух, произведением къэбзэгъэ-лъэшыгъэ лъапсэу иIэм лъэIэсых, литературэ хъугъэ-шIагъэм художественнэ шIыкIэ-хабзэхэр зэращыIорышIэхэрэр икъукIэ ащыгъэунэфыгъ, гупшысэ зещакIэм, лъэпкъ ыкIи шъолъыр гущыIэм иискусствэ къыубытыныр ыкIи ыгъэунэшкIуныр фэукIочIы. ЩашIэр ушэтэкIошху, гурыгъозэ ин ыкIи ахэм афырикъужьырэ шIэныгъэ зыгъотыгъэу, зыгъэфедэрэ; гущыIэр ыкIи образыр псынкIэу егъэунэфых; хъурэ-шIэрэмкIэ гъэзагъэу шIэныгъэ уасэ фешIы; литературэм фыриIэ фэщэныгъэр, художественнэ ыкIи гушъхьэлэжьыгъэм икъэIотакIоу, икIэщакIом шъхьакIэфэныгъэшхо дызэрехьэ.
Щэч зыхэмылъыр, ЩэшIэ Казбек Темыр Кавказым иушэтэ-кIо анахь цIыф гъэсэгъэшхо акъылышIохэм зэращыщыр, творческэ гупшысэкIэ гъэшIэгъон зэрэIэкIэлъыр иIофшIакIэкIэ къеушыхьаты. ТизэIукIэгъу пэпчъ IофшIэгъакIэхэм япхыгъ, искусствэм ишъэфхэм якъызэIухын ыкIи зэгъэшIэн зэкIэ фэкIожьы. ЩэшIэ Казбек купкIышхо пытэ зиI ыкIи творческэ гупшысэ мыухыжьым сыдигъуи зылъащэ.
Джащ фэд, тиIофшIэгъоу, тишъэогъу-ныбджэгъоу ЩэшIэ Казбек Хьисэ ыкъор.
ШIэныгъэлэжьэу, литературоведэу Бэчыжъ Лейла:
— ШIэныгъэлэжь-литературоведэу, профессорэу ЩэшIэ Казбек илитературнэ гупшысэ-ушэтынхэр анахьэу къызынэфагъэхэр я 60 — 80-рэ илъэсхэр арых. Темыр Кавказым щыпсэурэ цIыф лъэпкъхэм ялитературоведение дэгъугъэ шапхъэр зиштагъэр мы уахътэр ары.
Адыгэ литературэхэмкIэ тарихълэжьэу ыкIи теоретикэу ЩэшIэ Казбек, шъыпкъэм тетэу пIон хъумэ, гушъхьэ лъэгапIэм зэрэфакIорэр гуетыныгъэшхо хэлъэу лъэпкъ литературоведениер ыкIи критикэр зэрилэжьхэрэмкIэ, ахэм лъапсэ ягъэгъотыгъэнымкIэ Iофышхоу ышIэрэмкIэ къеушыхьаты.
К. ЩашIэм ифундаментальнэ IофшIагъэу «Художественный конфликт и эволюция жанров в адыгских литературах» (Тбилиси, 1978), адырэ уасэ зиIэ иIофшIагъэхэм зыкIэ афэдэу, тхыгъэ литературэ ныбжьыкIэхэм зыкъагъэнэфэнымкIэ лъапсэ хъугъэ. К. ЩашIэм иIофшIагъэхэм адыгэ шIэныгъэлэжьхэм лъэбэкъукIэхэр ашIынхэмкIэ, гупшысэ гъунапкъэхэр зэпачынхэмкIэ, узэрэлэжьэщт шIыкIэхэр, лъэпкъ литературэм иупчIэ шъхьаIэхэр ыкIи Урысыем илъэпкъыбэ литературэ Iоф зэрэдэпшIэщт шIыкIэ-амалхэр ащызэхэфыгъэх. ЩэшIэ Казбек джырэ литературнэ практикэми иIахьышхо хэхьагъ. Псэ зыпыт гущыIэм ыкIуачIэ илъэшыгъэ критикэу ЩашIэм сыдигъуи екIоу зэрэкIигъэтхъырэм ухэтми гу зылъыуегъатэ. Исэнэхьат хэшIыкIышхо зэрэфыриIэр, игущыIэ зыфэгъэзагъэр ышIэу, шIэныгъэ дэгъу зыгъотыгъэ ЩашIэр ыкIи а зэкIэми ялъытыгъэу, ар адыгэ литературэхэм ялъэгэпIэ хъугъэ-шIагъэу плъытэныр зифэшъуаш, адыгэ литературэхэм язэгъэшIэнкIэ теоретикэ-методологическэ лъапсэр зэзыгъэкIугъэ шIэныгъэлэжь.
Хэгъэгум ыкIи Кавказым щыпсэурэ лъэпкъхэм ялитературэ ыкIи яхудожественнэ культурэ кIэугъоегъэнымкIэ Iофышхо зылэжьыгъэ ЩэшIэ Казбек. Адыгэхэр шIу умылъэгъоу, ахэм уафэмыгумэкIэу, IэкIыб къэрал чыжьэу Америкэм нэс укIонышъ, хымэ чIыгум хэхэсэу исыгъэ КIубэ Щэбан итворчествэ хэкужъым къэпщэжьыныр пфызэшIокIыщтэп, мы лъэбэкъури шIэныгъэлэжь-ушэтакIоу ЩэшIэ Казбек шъыпкъэгъэ-цIыфыгъэу хэлъым, литературэр зэрэщытэу игупшысэ зэпымычэу, ищыIэныгъэу зэрэхъугъэм ищыс.
ТхакIоу МэщбэшIэ Исхьакъ:
— ЛIэшIэгъуныкъо фэдизым ЩэшIэ Казбекрэ сэррэ тызэныбджэгъугъ, а уахътэм лIыр дэгъоу зыфэдэр сшIагъэ. Пытагъэ хэлъэу къэсIон слъэкIыщт: адыгэ лъэпкъым къыхэкIыгъэ анахь цIыф гъэсэгъэшхо, гупшысэкIо инхэм ащыщыгъ, Темыр КавказымкIэ анахь зыцIэ раIорэ литературовед. Иапэрэ рецензиехэмкIэ ыкIи статьяхэмкIэ лъэпкъ литературэхэм яушэтэкIо инэу зыкъигъэлъэгъуагъ.
ЩэшIэ Казбек, уеджэнджэ-шынэу щымытэу, темыр-кавказ литературоведениемкIэ анахь зэлъашIэрэ гупшысакIу. ИшIэныгъэ статьяхэм, монографиехэм якуугъэ, лъэшыгъэ зэхэошIэ, гъунэгъу республикэхэм ыкIи Кавказым арыс лъэпкъхэм ялитераторхэм зэпхыныгъэ дэгъурэ шъхьэкIэфэныгъэрэ адыриIагъ, ишIошI кIэдэIукIхэу, игупшысэ псыхьагъэкIэ лъэпкъ литературэ ныбжьыкIэхэм шIэныгъэ лъапсэ афэшIыгъэнымкIэ пэрытныгъэр зыфагъэшъошэгъэ гъэсагъ.
ЩэшIэ Казбек литературнэ критикэм ежь илъэгъо гъэнэфагъэ щыпхырищыгъ. IофшIэгъэ-шхо иI, литературэм игъашIэ зэрэщытэу фэгъэзэгъагъ. Литературнэ творчествэм хэшIыкIышхо фыриIагъ: поэзиер, прозэр, драматургиер зэфэдэу къыупкIэпкIыгъэх. Сэ сипроизведениехэмкIэ тхылъыбэ ытхыгъ ишъхьэгъусэу ЩэшIэ-Ергъукъу Щамсэт игъусэу, лъэшэу сыфэраз, цIыф дэгъу хьалэлэу, ныбджэгъу зафэу сшIагъэ.
Литературоведэу, критикэу ЛъэпцIэрышэ Хъалид:
— ЩэшIэ Казбек литературэр гъэшIэгъонэу, эмоциональнэу елъэгъу, ныр исабый нэплъэгъу фабэкIэ зэреплъырэм фэдэу еплъы. Литературэр тхылъыпIэм тетхэгъэ усэ, рассказ, роман къодыеп, псэ зыхэмылъ, бзэ зыIумылъ тхыгъэп — литературэр ежьыркIэ псэ зыпыт гущыIэх, псэ зиIэ организм. Жьы къыщэу, дунаим игушIуагъохэр, игукIаехэр зыхэзыщэхэу, щыIэныгъэр хъуаоу зыщыжъотырэ шъолъыр. НэмыкIэу къэпIон хъумэ, литературэр — шъыпкъэм ишъыпкъэжь фэблэрэ щыIэныгъэр ары.
ЩэшIэ Казбек илитературнэ ыкIи литературоведческэ-критическэ IофшIагъэхэм, ицIыфыгъэ яхьылIагъэу псэлъэ зэфэшъхьафхэр, ахэбдзын ахэмытэу, къаIуагъэх Щ. Хъутым, С. Пэнэшъум, М. Къуныжъым, Къ. Пэрэныкъом, Е. Шибинскаям, Н. Цуекъом, Т. Степановам, мыхэм анэмыкIхэми. Ахэм ЩэшIэ Казбек игъашIэ шIэныгъэ лэжьыгъэкIэ зэрэбаир, культурэ шэпхъэ иным итэу зэрэщыIагъэр, уиIофшIэгъущтми, уиныбджэгъущтми шъыпкъэгъэ-зэфагъэ ыкIи шъхьэкIафэ зэрэхэлъыгъэр, къыткIэхъухьэрэ ныбжьыкIэхэр шIэныгъэм фэщэгъэнхэмкIэ фэлъэкIырэр зэришIагъэр, ишIушIагъэ зэрэгъунэнчъэр ащыкIэгъэтхъыгъ. ЩэшIэ Казбек Хьисэ ыкъор (щыIагъэмэ), къызыхъугъэр мэзаем и 18-м илъэс 80 хъущтыгъэ. Казбек илъэгъо-гъогу дахэ адыгэ лъэпкъымкIэ, лIэужхэмкIэ гъозэнэфэу щытыщт, лIэшIэгъум ицIыфышхуагъ, ыгу зэIухыгъагъ.
Мамырыкъо Нуриет.