ЩыIэныгъэр иорэд щэжъынчы
Къыблэ шъолъырым, тилъэпкъэгъухэр зыщыпсэухэрэ IэкIыб къэралыгъохэм ащыцIэрыIо орэдыIоу Быщтэкъо Азэмат ипчыхьэзэхахьэ Мыекъуапэ игъэкIотыгъэу щыкIуагъ.
Адыгэ Республикэм и Къэралыгъо филармоние щызэхащэгъэ концертыр искусствэм ишэпхъэ лъагэхэм адештэ. Быщтэкъо Азэмат шэнышIу зэрэфэхъугъэу, илъэс къэс мэзаем е гъэтхапэм иапэрэ мафэхэм концертхэр Мыекъуапэ къыщетых. ШIу зэрэлъэгъухэрэм ямафэ ехьылIэгъэ зэхахьэр тищыIэкIэ-псэукIэ илъэгъохэщхэм зыкIэ ащыщ.
Адыгэ лъэпкъым, Адыгэ хэкум афэгъэхьыгъэ орэдхэмкIэ артистым концертыр ыублагъ. Пщынаоу Ешыгоо Аскэр, шъонтырпаоу ЛIышэ Джамболэт къыдежъыухэзэ, тилъэпкъ, тиадыгэ хэгъэгу ядэхагъэ афэгъэхьыгъэ орэдхэр мэкъэ IэтыгъэкIэ А. Быщтэкъом къыIуагъэх.
— Тянэ-тятэхэр тэгъэлъапIэх. ТигумэкIи, тигушIуагъуи нахь зэтхьылIэрэр ныр ары,— игупшысэхэм къахигъэщыгъ А. Быщтэкъом. — Нэгъуцу Саидэ лъэшэу сыфэраз. Ным фэгъэхьыгъэ орэдэу ащ сфитхыгъэм шъуезгъэдэIу сшIоигъу…
ШIулъэгъу къабзэм иорэдхэр урысыбзэкIи адыгабзэкIи артистым ыгъэжъынчыгъэх.
«СшIэщтыгъэр сшIэрэп усимыIагъэмэ» зыфиIорэ орэдри гум къегущыIыкIы.
Быщтэкъо (Дзыбэ) Фатими концертым хэлэжьагъ. Зэшъхьэгъусэхэм къызэдаIогъэ шIулъэгъу орэдхэм ащыщ пшъашъэм шIу ылъэгъурэ кIалэр къызэрэхихыгъэр. Фатимэ «Адыгеим ижъогъожъыехэм» яфестивальхэм цIэрыIо ащыхъугъ, искусствэм зыкъыщигъотыгъ. Нэфынэу тепсэрэм иджанэ ыгъэжъыузэ, нэбзый нэфхэм пчэгури къагъэшIэты. Артисткэм орэд пэпчъ екIолIэкIэ хэхыгъэ къыфегъоты.
Быщтэкъо Азэмат иконцерт анахьэу къэзыгъэдэхагъэр ирепертуар диштэу нэфынэр, нэрылъэгъу IэпыIэгъухэр зэригъэфедагъэхэр ары. Мыекъуапэ иорэд къызыхедзэм, къалэм иунэ лъагэхэр, зыгъэпсэфыпIэхэр, лIыхъужъ ыкIи лэжьэкIо щытхъум япхыгъэ чIыпIэхэр, цIыфхэр зэгурыIохэу зэрэзэдэпсэухэрэр, спортым, культурэм япсэуалъэхэр нахьыбэ зэрэхъухэрэр сценэшхом дахэу къыщигъэлъэгъуагъэх.
Къэралыгъо гъэпсыкIэ зиIэ Адыгэ Республикэм ихэхъоныгъэхэри едзыгъохэм ащытлъэгъугъэх. ТиусакIохэм, композиторхэм щыIэныгъэр орэдымкIэ къаIотэн, мэкъамэу аусырэр гум щыщ ашIын зэралъэкIырэр артистым иконцерт нахь игъэкIотыгъэу къызэIуехы.
Тыкъэзыуцухьэрэ дунаир зэрэдахэм А. Быщтэкъор къытегущыIэзэ, кIымафэр нахь зэрэшIогъэшIэгъоныр орэдым хэлъ гупшысэмкIэ къызэIуехы.
Адыгэ хьакIэщхэр
Ижъырэ адыгэ орэдхэм артистым икIэрыкIэу тамэ ареты. «Къэрэкъамылым» икъежьакIэ, ащкIэ джэгур зэраублэрэм артистыр ащыгъуаз. Адыгэхэм тхакIи, еджакIи амышIэу лъэпкъ орэдэу аусыгъэхэр къызэрэтлъыIэсыжьыгъэхэм артистыр егъэгушхо, пэсэрэ орэдхэр нахьыбэрэ къыIонхэу зегъэхьазыры.
Адыгэ Республикэм и Къэралыгъо академическэ къэшъокIо ансамблэу «Налмэсыр», кIэлэцIыкIу ансамблэу «Мыекъуапэ инэфылъэхэр», нэмыкI къэшъокIо купхэр концертым хэлэжьагъэх. Быщтэкъо Азэмат адыгэ шъуашэр щыгъэу «Налмэсым» игъусэу къэшъуагъ, артистхэм адэуджыгъ, адыгэ шъуашэм идэхагъэ къэшъуакIохэм къагъэлъэгъуагъ.
Урысыем и Правительствэ ишIухьафтын къызыфагъэшъошагъэу, Адыгеим инароднэ артистэу Къулэ Амэрбыйрэ Быщтэкъо Азэматрэ искусствэм ибаиныгъэхэр, цIыф цIэрыIохэм ягущыIэ щэрыохэр пIуныгъэм зэрэфэлажьэхэрэр едзыгъом щыхагъэунэфыкIыгъ. Адыгэ хьакIэщхэр лъэпкъым иеджапIэхэр зэрэщытыгъэхэр язэфэхьысыжьхэм къащыхагъэщыгъэх.
Жъы хъухэрэп
Бэгъ Нурбый, КъумпIыл Къадырбэч ягущыIэхэм атехыгъэ орэдхэр жъы хъухэрэп. «Зыгъэгусэм» уедэIузэ, шэн-хабзэхэри гум «дэчэрэгъух», шIэжьым зыфэогъазэ. Адыгэ лъэпкъым фэгъэхьыгъэ орэдым псэ зэрэпытыр артистым къыхегъэщы. Орэдымрэ къашъомрэ зэгъусэхэшъ, пчыхьэзэхахьэр нахь гъэшIэгъон хъуным фэшI зэхэщакIохэм къыдалъытагъэр бэ.
Быщтэкъо Азэмат концертым икIэух къыщиIуагъ зэкIэ IэпыIэгъу къыфэхъугъэхэм, пчыхьэзэхахьэм къэкIуагъэхэм лъэшэу зэрафэразэр. Къэбэртэе-Бэлъкъарым къикIыхи, техникэм игъэфедэнкIэ къыдеIагъэхэм хэушъхьафыкIыгъэу «Тхьашъуегъэпсэу» ариIожьыгъ.
Сабый цIыкIоу пхъэкIычхэмкIэ къыдежъыугъэр, нэнэжъэу IаплI къезыщэкIыгъэр, гущыIэ фабэу къыфаIуагъэхэр, нэпэеплъ сурэтхэр артист цIэрыIом гукъэкIыжь лъапIэу иIэщтых.
ЕмтIылъ Нурбый.