«Лидеры России» зыфиIорэ зэнэкъокъум Къыблэ федеральнэ шъолъырымкIэ ифиналныкъо мэзаем и 8-м къыщыублагъэу тыгъуасэ нэс Ростов-на-Дону щыкIуагъ. МэфэкI шIыкIэм тетэу къызэIуахыгъэ Iофтхьабзэм республикэ гъэзетхэу «Адыгэ макъэмрэ» «Советскэ Адыгеимрэ» ялIыкIохэр хэлэжьагъэх.

Зэнэкъокъум хэлэжьагъэхэм заочнэ шIыкIэм тетэу яшIэныгъэхэр аушэтыгъ. Нэужым джы­ри зэ компьютерымкIэ тестирование акIугъ. Ащ щыпхырыкIыгъэ нэбгырэ 267-рэ Къыблэ федеральнэ шъолъырымкIэ финалныкъом ихьагъэх. Ахэм Адыгеим илIыкIуи 4 ахэфагъ: «Сбербанк-Сервисым» исектор ипащэу Алексей Белый, «AXIS» зыфиIорэ компание купым игенеральнэ пащэ игуадзэу Вреж Мегрикян, «Росреестрэм» икъу­тамэу Адыгеим щылажьэрэм ипащэ игуадзэу Нэхэе Мурат, «Этсерч» зыфиIорэ хъызмэтшIапIэм иIофшIэгъоу Александр Очковыр. Шъугу къэтэгъэкIы­жьы пстэуми къахахыщтхэм шIэныгъэ зэрагъэгъотыным пэIуагъэхьанэу сомэ миллион грантэу зэраратыщтыр. УФ-м и Президентэу Владимир Путиным 2018-рэ илъэсым жъо­ныгъуакIэм и 22-м къыдигъэкIыгъэ унашъом диштэу Автоном коммерцием емыпхыгъэ организациеу «Урысыер – амалышIухэр зыIэкIэлъ къэралыгъу» зыфиIорэм ипроектэу зэнэ­къокъур щыт. Организацием пшъэрылъ шъхьаIэу иIэхэм ащы­щых цIыфхэм сэнэхьатэу къыхахыгъэм рылэжьэнхэр, шIуагъэ къэзытырэ социальнэ «лифтхэр» Урысыем щыгъэпсыгъэнхэр, нэмыкIхэри.

Мэзаем и 9-м Iофтхьабзэр мэфэкI шIыкIэм тетэу къызэIуа­хыгъ. УФ-м и Президент и Полномочнэ лIыкIоу Къыблэ федеральнэ шъолъырым щыIэ Владимир Устиновыр, лъэпкъ хъызмэтымрэ къэралыгъо къулыкъумрэ я Урысые академие иректорэу, зэнэкъокъум иегъэ­джакIоу (наставникэу) Владимир Мау, Ростов хэкум игубернаторэу Василий Голубевыр, 2017 — 2018-рэ илъэсхэм зэхащэгъэ зэнэкъокъоу «Лидеры России» зыфиIорэм текIоныгъэ къыщызыхьыгъэу, УФ-м псауныгъэр къэухъумэгъэнымкIэ иминистрэ игуадзэу Олег Салагай, нэмыкI­хэри зэхахьэм хэлэжьагъэх.

Владимир Устиновым игущыIэ къыщыхигъэщыгъ зэнэкъокъум мэхьанэшхо зэриIэр. Ащ къызэриIуагъэмкIэ, шъыпкъэныгъэ зыхэлъ, къызщыхъугъэ къэралыгъом ыгу къыдеIэу фэлэжьэным фэхьазыр цIыфхэм осэ ин яI. Ащ фэдэхэр «Лидеры России» зыфиIорэ зэнэкъокъум къегъэнафэх.

— Пэрытныгъэ зэрихьаным шъхьадж зызэрэфигъэсэщтым дакIоу зыхэтхэм загуригъэIон ылъэкIын фае, — къыIуагъ Владимир Мау. — Ныбджэгъуныгъэ ыкIи IофшIэн зэпхыны­гъэхэм яшIуагъэкIэ шъори, зэ­нэ­къокъуми, къэралыгъом игъэ­IорышIэн системи хэхъоныгъэхэр ашIынхэ алъэкIы. БлэкIыгъэ Iофтхьабзэм изэфэхьысыжьхэм къадыхэлъытагъэу пэрытхэм я Клубэу «Эльбрус» зыфиIорэм Iоф ышIэнэу ригъэжьагъ. Шъо­лъырхэми ащ фэдэхэр ащызэхащэхэмэ шIогъэшхо къахьыщт.

Олег Салагай IэпэIэсэны­гъэу IэкIэлъымкIэ зэнэкъокъум къе­кIо­лIагъэхэм къадэгощагъ. «Лидеры России» зыфиIорэ зэнэкъо­къум текIоныгъэ къызы­щехьы нэуж УФ-м псауныгъэр къэухъу­мэгъэнымкIэ иминистрэ игуа­дзэу ар агъэнэфагъ. КъараIорэм едэIунхэу, кIэу зэхахырэр зыща­мыгъэгъупшэнэу ар къяджагъ.

Финалым ихьанхэм пае финалныкъом текIоныгъэ къызэрэщыдахын фаем дакIоу, а уахътэм къыкIоцI социальнэ мэхьанэ зиIэ гъэцэкIэн горэ яшъолъыр щызэшIуахын фае. ГъэцэкIэн хьазыр­хэр яIагъэхэп, пстэури ежь-ежьы­­рэу къаугупшысыныр, агъэцэкIэныр япшъэрылъыгъ. Зэхэща­кIохэм къызэраIуагъэмкIэ, мы гъэцэкIэныр зэрэзэшIуахырэм къыгъэлъэгъощт IэпыIэгъу афэмыхъухэу гупшысэнхэ, хэкIыпIэ къагъотын зэралъэкIырэр.

— Урысыем «илидер» гъэ­IорышIэным зэрэфэкъулаим дакIоу, социальнэ пшъэ­дэ­кIыжь зэрихьырэр къыгурыIон ыкIи ар зэшIуихын фае, — къыха­гъэщы зэхэщакIохэм.

Адыгеим икIыгъэхэм социальнэ проектэу къагъэхьазырыгъэхэр зыфэдэхэр, ахэр анахьэу зыфэгъэхьыгъэхэр тигъэзет къыфаIотагъэх.

Вреж Мегрикян тызэрэщигъэ­гъозагъэмкIэ, Свято-Успенскэ чылысэу Мыекъуапэ дэтым ишIын аухыныр ары ипроект зыфэгъэхьыгъэр. Ащ игъэпсын илъэс заулэкIэ узэкIэIэбэжьмэ рагъэжьэжьыгъ. Соборыр зэрашIыщт ахъщэр къызIэкIагъэ­хьаным пае «именной кирпич» зыфаIорэ Iофтхьабзэр Мые­къуапэ щырагъэкIокIы. Ащ ишIуагъэкIэ, шIоигъоныгъэ зиIэ пстэури ащ къыхэлэжьэнхэ алъэкIыщт.

— Проектхэм мэхьанэу яIэр дунаир нахь дэгъу, нахь мамыр хъуным фэлэжьэнхэр ары. Диным ащ уфещэ, — игупшысэхэмкIэ къыддэгуащэ Вреж. —Зэнэкъокъум къыфэзгъэзэжьмэ, ыпэкIэ улъыкIотэным ар зэрэ­фэIорышIэрэр къыхэзгъэщы сшIоигъу. Мыщ текIоныгъэ къы­щыпхьыным мэхьанэшхо зэри­Iэм фэдэу, ухэлэжьэнми осэ­шхо есэты.

Нэхэе Мурат исоциальнэ проект чIыопсым икъэухъумэн фэгъэхьыгъ — чIыопс паркэу «ТхьакIэшху» зыфиIорэм игъэ­къэбзэн.

— Адыгеим ибаиныгъэ шъхьа­Iэхэм ащыщ чIыопсыр. Ар къэ­тыухъумэным, дгъэкъэбзэным тапылъын фае, — гущыIэгъу къытфэхъугъ Нэхэе Мурат. — Къэралыгъо учреждениехэм яIофышIэхэр, студентхэр, кIэлэеджакIохэр, волонтерхэр ак­цием къыхэзгъэлэжьэнхэр ыкIи Адыгеим икъушъхьэхэр дгъэкъэ­бзэнхэр сыгу хэлъ.

ГъэIорышIэным фэгъэхьыгъэ мастер-классхэр гурыт еджапIэхэм ащызэхищэнхэ гухэлъ иI Александр Очковым.

— Корпоративнэ лъэныкъомкIэ опыт гъэнэфагъэ сиI – илъэ­си 10 фэдизрэ американскэ компанием Iоф щысшIагъ, автомобиль бизнесым епхыгъэ проектышхохэр дгъэцэкIагъэх. Мы лъэныкъом епхыгъэ IэпэIэ­сэныгъэу сIэкIэлъ хъугъэмкIэ апшъэрэ классхэм арыс кIэлэеджакIохэм садэгощэныр сшIогъэшIэгъон. Корпоративнэ лъэныкъом Iоф щыпшIэн зэрэплъэкIыщтыр, ащкIэ гухэлъэу щыIэхэр къэлэшхохэм ямыза­къоу, шъолъырхэми ащыбгъэцэкIэным иамалхэр къафэсIо­тэщт. Сыда пIомэ, компаниешхо­хэм якъутамэхэр регионхэм ащыIэх, Адыгеир пштэмэ, ахэм япчъагъэ илъэс къэс нахьыбэ мэхъу. Амалэу сIэкIэлъхэр сыушэтынхэмкIэ мы зэнэкъокъум мэхьанэшхо иI, — къыIуагъ ащ.

Iофтхьабзэр мэфэкI шIыкIэм тетэу къызызэIуах нэуж ыпэкIэ къыщытIогъэ хьакIэхэр зэнэкъо­къум хэлажьэхэрэм гущыIэгъу афэхъугъэх. ЗэдэгущыIэгъу занкIэм къыдыхэлъытагъэу упчIэ зэфэшъхьафхэр къыщаIэтыгъэх, ахэм яджэуапхэри щагъотыжьыгъэх. Зэнэкъокъум зэфэхьысыжь шъхьаIэу иIэр хэлэжьагъэр зы чIыпIэ зэримытыр, ыпэкIэ зэрэ­лъыкIуатэрэр ары. Купыр бгъэ­дэIоныр, ахэм пэщэныгъэ адызепхьаныр псынкIэп. Ащ зыфагъэсэн зэрэфаер зэхэсыгъом къыщыхагъэщыгъ.

Гъонэжьыкъо Сэтэнай.